Zabudoŭščyk Dana Holdings rekłamujecca naŭprost u navinach pa TB — heta zakonna?
«Unikalnaja akcyja tolki da kanca leta», «biez pracentaŭ i paručycielaŭ», «prapanova vyklikała ažyjataž», «dom vyłučajecca pa kamforcie i architekturnych rašeńniach», «novyja standarty budaŭnictva». Tak telekanał ANT u zvyčajnym vypusku navin raskazvaje pra kvatery ad sierbskaj kampanii Dana Holdings, jakaja aktyŭna zabudoŭvaje Minsk. Z vusnaŭ viadučych nie hučyć ni słova pra toje, što heta rekłama. A tak možna było? Raźbirajecca «Jeŭraradyjo».
Na vidavočna rekłamnyja roliki Dana Holdings u vypuskach navin na telekanałach ANT i STB źviarnuŭ uvahu palityčny analityk Andrej Jelisiejeŭ:
«Telekanały ŭ vypuskach ahulnanacyjanalnych viačernich navin prademanstravali saładžavyja, čystaj vady rekłamnyja materyjały 5-chvilinnaj praciahłaści (!) na karyść adnoj kankretnaj pryvatnaj deviełapierskaj kampanii (Dana Holdings), pry hetym siužety nie mieli ni najmienšaj hramadskaj kaštoŭnaści. I ni na jakim etapie ni televiadučyja, ni reparciory nie zrabili zaŭvahu pra rekłamny typ materyjału, heta nijak nie było paznačana.
Kolki kaštuje 10 chvilin rekłamy na STB i ANT u prajm-tajm, kolki było zapłačana kampanijaj Dana Holdings za hetyja materyjały i čamu nidzie nie paznačany rekłamny typ materyjału? Što na heta skaža Ministerstva antymanapolnaha rehulavańnia? I naohuł, čamu ŭ vypuskach ahulnanacyjanalnych telekanałaŭ dapuskajecca dzikaja rekłama pryvatnaj kampanii? Heta pasłuha dastupnaja ŭsim?»
Voś prykład takoha siužeta pra Dana Holdings, jaki vyjšaŭ u efir 20 žniŭnia:
Rekłama ci nie?
Tolki na jutub-kanale ANT možna znajści dziasiatki šabłonnych rolikaŭ pra «ščaślivych navasiołaŭ», «supiersučasnyja žyllovyja kompleksy» i «ŭnikalnuju rasterminoŭku na kvatery», jakuju prapanoŭvaje kampanija sierbskich aliharchaŭ Karyčaŭ:
U markietynhavaj słužbie telekanała ANT nie chavajuć, što siužety Dana Holdings padčas vypusku navin — rekłama. Adnak, pa słovach supracoŭnicy adździeła, zakanadaŭstva nie patrabuje heta niejak abaznačać:
«Niama patrabavańniaŭ, kab kamiercyjnyja materyjały na kanale ANT byli z paznakaj «Kamiercyjnyja materyjały». Kali pačytać «Zakon ab ŚMI», to ŭ dačynieńni da telebačańnia tam jość asablivyja ŭmovy. Na žal, našy hledačy nie ŭsie vałodajuć hetaj infarmacyjaj, ale jany nie abaviazanyja čytać zakony daskanała. Ale litary zakona my prytrymlivajemsia».
Chiba možna rekłamavacca ŭ navinach?
Ministerstva antymanapolnaha rehulavańnia i handlu prymaje bok biełaruskich telekanałaŭ i kampanii, jakaja na ich rekłamujecca. U adkazie za podpisam ministra Uładzimira Kałtoviča paviedamlajecca, što «raźmiaščeńnie (raspaŭsiudžvańnie) rekłamy ŭ pieradačach navin zakonam nie zabaraniajecca».
Taksama tam pieraličana, jakija materyjały abaviazkova musiać być paznačanyja jak rekłamnyja. Heta datyčycca «rekłamy lekavych srodkaŭ, mietadaŭ akazańnia miedycynskaj dapamohi, rabot i (abo) pasłuh, jakija składajuć miedycynskuju dziejnaść, vyrabaŭ miedycynskaha pryznačeńnia, miedycynskaj techniki i bijałahična aktyŭnych dabavak da ježy». Budaŭničych pasłuh u pieraliku niama — značyć, i paznaka pra rekłamny charaktar materyjału nie abaviazkovaja!
Na dumku ministerstva, «raźmiaščeńnie (raspaŭsiudžvańnie) rekłamnaha siužeta ŭ pieradačy navin na padstavie dahavora pamiž rekłamadaŭcam i rekłamaraspaŭsiudžvalnikam nie źjaŭlajecca schavanaj rekłamaj». Značyć, usio dobra!
Ci dastupnaja padobnaja rekłama inšym biźniesam?
U markietynhavym adździele ANT kažuć, što nijakich asablivych umoŭ dla Dana Holdings niama. Prosta sierbski zabudoŭščyk maje hrošy, kab apłacić padobnyja pasłuhi:
«Niama manapolii na raźmiaščeńnie kaho-niebudź. Mohuć usie kampanii, jakija majuć mahčymaść finansava za siabie adkazvać. Praŭda, treba prajści redakturu šef-redaktara prahramy navin, tamu što ŭsie temy ŭzhadniajucca i nie ŭsio zmoža vyjści ŭ prahramie «Našy naviny». Kali chtości zachoča raskazać pra, naprykład, zubnuju pastu, to my jak respublikanski kanał raskazvać pra jaje nie budziem. Ale kali havorka datyčycca zabudoŭščykaŭ, to žyllovaja tema va ŭsie časy chvaluje našych hramadzian».
Kolki kaštuje rolik praciahłaściu ad 4 da 6 chvilin u vypusku prahramy «Našy naviny» na temu, jakaje chvaluje hramadzian, supracoŭnica ANT nie paviedamiła.
***
Kampanija Dana Holdings naležyć sierbskim biźniesmienam bratam Karyčam. Drahamir Karyč źjaŭlajecca hanarovym konsułam Biełarusi ŭ Białhradzie. Biźniesmieny asabista znajomyja z Alaksandram Łukašenkam. U 2009 hodzie kiraŭnik Biełarusi pa zaprašeńni bratoŭ Karyčaŭ pabyvaŭ na samym papularnym sierbskim harnałyžnym kurorcie Kopaanik.
U 2015 hodzie Alaksandr Łukašenka asabista zakłaŭ kapsułu ŭ padmurak kompleksu «Minsk-Mir» na miescy staroha staličnaha aeraporta, prava zabudoŭvać jaki sierby atrymali ŭ spadčynu ad kampanii «Itera» eks-mera Maskvy Juryja Łužkova i jaho žonki Aleny Baturynaj. Akramia «Minsk-Miru», Dana Holdings viadomaja manstruoznym budynkam na Kastryčnickaj płoščy, na miescy muzieja Vialikaj Ajčynnaj vajny, i niekalkimi žyłymi kompleksami.
Hałoŭny ideołah Biełarusi znajšoŭ u krainie «psieŭdapatryjatyčnyja jačejki» i zaklikaŭ da zmahańnia ź imi «adzinym bajavym kułakom»23
Kamientary