«Vuški nie stajać, raście bajaźliŭcam. Kaho vy nam pradali?» Padrabiaznaści pra mužčynu, jaki zbyŭ sotni ščaniukoŭ pad vyhladam aŭčarak
Fota SK / Pavieł Marcinčyk
Spravaj pradprymalnika Vasila Tumaša sa Smarhonskaha rajona zaraz zajmajecca Śledčy kamitet, mužčyna zatrymany — jaho abvinavačvajuć u machlarstvie, paviedamlaje kp.by.
Vasil pradstaŭlaŭsia zavodčykam parodzistych sabak, kazaŭ, što pradaje aŭčarak, u tym liku i siłavym viedamstvam. Na słovach u sabak byli ŭsie dakumienty i radavod — pakupnikam Vasil abiacaŭ papiery abaviazkova pieradać, ale ŭsio zastavałasia na ŭzroŭni abiacańniaŭ.
Adzin ščaniuk kaštavaŭ ad 100 da 300 dołaraŭ. Kab uvajści ŭ davier da pakupnikoŭ, abvinavačany prapanoŭvaŭ kupić ščaniukoŭ ŭ rasterminoŭku.
U damovie, jaki mnohija pakupniki padpisvali nie čytajučy, było skazana «ščaniuk sabaki», a voś kankretnaja paroda nie ŭdakładniałasia.
Tamu, kali pakupniki, nazirajučy za sabakami, razumieli, što heta nie aŭčarki, i pierastavali płacić, zavodčyk źviartaŭsia ŭ sud i spravy časta vyjhravaŭ.
— My kuplali ŭ Tumaša niamieckuju aŭčarku, u raśpiscy mama pakazała, što pavinna zapłacić za jaje ŭ rasterminoŭku 200 dołaraŭ, — raspaviadaje Hanna ź Lidy. — Kali sabaka padros, my stali padazravać, što niešta nie tak. Moj znajomy, jaki raniej byŭ kinołaham, ubačyŭšy našaha sabaku, skazaŭ pra toje, što heta zvyčajnaja dvarniažka. Mama nie stała płacić za jaje hrošy, paśla hetaha Tumaš padaŭ na jaje ŭ sud. Na pasiadžeńniach prysutničaŭ prafiesijny kinołah — jana paćvierdziła, što heta nie niamieckaja aŭčarka. Zatym było jašče niekalki ekśpiertyz — usio paćvierdzili, što heta nie aŭčarka, a sumieś dvarniahi z aŭčarkaj. My vyjhrali sud, z Tumaša spahnali hrošy ŭ prymusovym paradku, bo ŭ raśpiscy my pisali, što kuplajem mienavita niamieckuju aŭčarku.
Volha Hiermašuk z-pad Baranavičaŭ taksama trapiłasia na chitryk mužčyny.
— Pračytała abjavu ŭ haziecie ab tym, što pradajucca ščaniuki niamieckaj aŭčarki. Umovy byli vyhadnyja: adrazu ŭsiu sumu možna nie płacić, rasterminoŭka na hod. My pahadzilisia, kupili sabaku.
Jon ros, i padabienstvaŭ z aŭčarkaj było ŭsio mienš: vuški nie ŭstavali, sabaka byŭ bajaźliŭkam, bajaŭsia ŭsiaho. My dumali, što treba jašče pačakać. Kali zrazumieli, što ničoha nie mianiajecca, patelefanavali Tumašu, skazali, što sabaka na aŭčarku nie padobny, pryjazdžajcie pahladzicie, kaho vy mnie pradali. Jon mnie adkazaŭ, što, kali jašče raz pazvaniu, sustreniemsia ŭ sudzie.
Hrošy ja jamu nie płaciła — jon padaŭ u sud, i mianie abaviazali vypłacić za ščaniuka $ 400 — heta suma razam ź pieniaj. Tamu što ŭ damovie paroda ŭkazanaja nie była. Niadaŭna my jamu vypłacili ŭsiu sumu. Mnie pryjšłosia pradać usio zołata.
A voś Łarysa z Kobryna kupiła ŭ Vasila Tumaša za 250 dołaraŭ mienavita niamieckuju aŭčarku. Ale sabaka apynuŭsia chvorym.
— Jon pieršapačatkova byŭ uvieś u ranach. Ale tady my vyrašyli, što heta projdzie, moža być, ščaniuka pakusali nasiakomyja. A potym pačalisia prablemy surjoźniejšyja: ščaniuk pačaŭ siabie hryźci. Na chvaście litaralna nie było poŭści, bo jon usio vyhryz. Potym pačali hnić kipciury, choć, zdavałasia b, jak heta mahčyma ŭ maładoha sabaki. Hrošaj na lačeńnie syšło vielmi šmat. Ale ja ŭsio roŭna rada, što hetaja aŭčarka dastałasia mnie — nie ŭsim chočacca dahladać chvoraha sabaku, tracić prystojnyja sumy. Jaho mahli b prosta vykinuć. Tamu farmalna jon ŭmovy dahavora nie parušyŭ, za toje, što sabaka apynuŭsia chvorym, mnie vidavočna nichto płacić nie budzie.
U hrupie ŭ sacsietcy, jakuju stvaryli paciarpiełyja, takaja historyja — nie adzinaja. Maryja ź Minska raspaviadaje, što na kuplu i lačeńnie sabaki vydatkavali ŭ sumie 500 — 600 dołaraŭ. Irynie dastaŭsia ščaniuk z pryrodžanaj epilepsijaj, sabaka pamior. Zavodčyk zajaviŭ, što pradavaŭ sabaku zdarovym, i hrošy viartać nie staŭ — zamiest hetaha, nie dačakaŭšysia płaty za ščaniuka, padaŭ u sud i vyjhraŭ jaho.
Ciapier tolki pa Hrodzienskaj vobłaści ŭstanoŭlena 250 paciarpiełych. Zajavy ad padmanutych pakupnikoŭ praciahvajuć pastupać z Mahiloŭskaj, Minskaj, Homielskaj, Viciebskaj abłaściej. Paciarpiełymi mohuć apynucca i žychary Bresckaj vobłaści. Śledčyja źviartajucca z prośbaj da ludziej, jakija paciarpieli ad takich dziejańniaŭ, paviedamić pra heta pa telefonach: 8-0152-72-40-40 abo 102.
Kamientary