Polski treveł-błohier, jaki padarožničaŭ pa Biełarusi i Rasii, raskazaŭ pra chejt, reputacyjnyja straty i ŭražańni ad pajezdki

Nie škaduje, što pajechaŭ u padarožža na Uschod

U intervju na kanale Studio Rozmów by Hanna błohier kaža, što, kali vyrašyŭ jechać u Biełaruś i Rasiju, jon uśviedamlaŭ, što heta moža vyklikać nieparazumieńnie z ulikam taho, jaki ciapier čas.

«Ludzi zaŭždy «viedajuć, jak lepš», tamu ja ŭžo pierastaŭ abapiracca na toje, što kažuć ludzi. Ja chaču pajechać sam i ŭbačyć, jak tam u hetym miescy, i acanić, pakazać ludziam, kab jany taksama zmahli zrabić vysnovu. Heta i była maja meta — pajechać i pakazać, jak vyhladaje zvyčajnaje žyćcio ŭ Biełarusi i Rasii», — kaža Tomaš.

Pavialičyć

Błohier atrymaŭ šmat pretenzij, što jon pakazvaŭ žyćcio ŭ Biełarusi i Rasii zanadta kalarovym, paźbiahajučy niehatyvu. Tomaš tłumačyć: jon nie staviŭ sabie metu pahłyblacca ŭ palityku, bo jon nie palityk. Choć, jak jon sam zaŭvažaje, padčas padarožžaŭ usio ž časam zakranaje palityku. (I prynamsi ŭ vypuskach ź Biełarusi adznačaŭ, naprykład, što ludziam moža być niebiaśpiečna ščyra vykazvacca na kamieru pa niekatorych temach).

«Ja pajechaŭ pahladzieć, jak žyvuć, što jaduć, zajści ŭ kramu, zanočyć u hateli. Pahavaryć ź ludźmi, pakazać, jak jość u niestabilny kryzisny čas», — tłumačyć padarožnik.

Što da razmoŭ sa zvyčajnymi ludźmi, to, na dumku padarožnika, adčuvalisia takija momanty, kali ludzi havaryli nie ŭsio, što dumajuć. Asabliva kali havorka išła pad zapis. A časam i sam błohier nie ŭstaŭlaŭ u videa kamientary biełarusaŭ, aścierahajučysia, što rezkija słovy mohuć vyklikać prablemy ŭ ich.

U Polščy Tomaš paśla hetych pajezdak sutyknuŭsia ź niehatyvam.

«U internecie, na telebačańni abo radyjo jość kankretny prahramny naratyŭ: jon dobra adhukajecca pra Biełaruś, a Biełaruś — naš vorah, i biełaruski ŭrad choča źniščyć Polšču», — kaža Tomaš.

Padarožnik kaža, što pazityŭnyja publikacyi ŭ polskich ŚMI byli.

Što zrazumieŭ pra biełarusaŭ?

«Viadoma, my viedajem, što palityčna nie čysta toje, što robić biełaruskaje kiraŭnictva. Ale nie treba pieramiešvać heta sa zvyčajnymi žycharami Biełarusi, jany nie za toje, kab siłaj pchać mihrantaŭ, kab destabilizavać situacyju ŭ Polščy, kab padstrakać.

Biełarusy nie za kanflikt z palakami, a naadvarot. Ale, na žal, ułada jość ułada, i jany nie majuć vialikaha ŭpłyvu na jaje. Asabliva kali jość vialiki ŭpłyŭ Rasii na Biełaruś», — razvažaje Tomaš.

Sam Tomaš biełarusaŭ nazyvaje vielmi blizkimi da palakaŭ jak u kulturnym, tak i ŭ histaryčnym płanie.

Błohier adznačaje, što biełarusy vielmi ciopła staviacca da palakaŭ. «Šmat biełarusaŭ, ź jakimi ja sutykaŭsia na svaim šlachu, kazali: «Ja napałovu adčuvaju siabie palakam, ja naohuł maju kartu palaka, ja žyŭ u Biełastoku, va Urocłavie, u Varšavie. Vučyŭsia tam, mieŭ biznes, maju svajakoŭ».

Pavialičyć

Ahułam, što da krytyki, to Tomaš ličyć, što čym bolšaja aŭdytoryja, tym bolš budzie krytyki.

Błoh palaka ź siaredziny listapada, kali vyjšaŭ pieršy rolik pra Biełaruś, vyras z 339 tysiač padpisčykaŭ da 368 tysiač ciapier.

Padčas padarožžaŭ, pa nazirańniach błohiera, ludzi ŭ Biełarusi i Rasii stavilisia da jaho haścinna, bieź jakoj-niebudź varožaści praz toje, što jon palak.

Tomaš ličyć, što ŭ vypadku čaho biełarusy z usich susiedziaŭ Polščy byli b pieršymi, chto adhuknuŭsia b na prośbu ab dapamozie.

Admietna, što pieršy vypusk pra Biełaruś nabraŭ 593 tysiačy prahladaŭ i staŭ druhim pa papularnaści videa na kanale błohiera za ŭvieś čas jaho isnavańnia. Jašče adzin z vypuskaŭ ź Biełarusi nabraŭ 369 tysiač prahladaŭ i zaniaŭ 9‑ie miesca pa papularnaści.

Raniej u abaronu taho, jak Tomaš raspaviadaje pra biełarusaŭ i Biełaruś, vykazvaŭsia biełaruski žurnalist Dźmitryj Hurnievič. 

• 23
• 3
• 0
• 2
• 1
• 0
• 0
• 0