Šrajbman: Makiej prama skazaŭ, što Minsk naohuł moža ničoha nie padpisać u śniežni

Palityčny ahladalnik Arciom Šrajbman u svaim telehram-kanale praanalizavaŭ intervju ministra zamiežnych spraŭ Uładzimira Makieja.

— Vajennaja baza nam nie patrebna, my jaje bolš nie abmiarkoŭvajem. Pad ciskam takija rašeńni prymać nie budziem.

Heta akreślivańnie miažy abaronnaha sajuźnictva. Vučeńni, sumiesnaja pazicyja ŭ AAN — tak, kali łaska. Novyja vojski — tut my suvierennyja.

Cikavaje pieraplacieńnie intaresaŭ z našymi zachodnimi susiedziami, jakija prosiać sajuźnika-ZŠA raźmiaścić u siabie bolš vojskaŭ, bo ŭsprymajuć rasijskija vojski jak pahrozu. Minsk ža patrabuje ŭ sajuźnika-Rasii nie raźmiaščać u siabie vojski, bo taksama ličyć ich pahrozaj.

— Maskva vystaŭlała nieprymalnyja prapanovy pa nadnacyjanalnych orhanach u sajuznaj dziaržavie. Ich źniali z paradku razmovy, jak i adzinuju valutu.

Heta pryvitańnie ŭsim ałarmistam, jakija pavieryli ŭ kazki pra «kanfiederacyju», «bolš ciesna, čym u ES». Biez nadnacyjanalnych orhanaŭ nie moža pracavać ni adna ciesnaja intehracyja. Kropka. Precedentaŭ u śviecie niama.

Navat u druzłym JEAES jość takija orhany. A ŭ sajuznaj dziaržavie Minsk ciapier zabłakavaŭ ich stvareńnie.

Biez takich orhanaŭ heta dźvie niezaležnyja stalicy, jakija niešta sprabujuć uzhadnić. Da Jeŭrasajuza tut jak da Miesiaca. Da kanfiederacyi — jak da Płutona.

— Adziny padatkovy kodeks z Rasijaj — heta «takaja palityčnaja meta». Makiej skazaŭ, što nie razumieje, jak možna chutka pryniać taki dakumient, i što Minsk nie budzie prosta prymać na siabie rasijski kodeks.

Usio ŭvohule, jak ja i kazaŭ. Heta pačatak jašče adnaho biaskoncaha torhu, dzie Minsk nie źbirajecca sastupać, a budzie patrabavać ad Maskvy nievykanalnaha — pamianiać rasijski padatkovy kodeks z ulikam biełaruskich normaŭ.

— I narešcie samaje hałoŭnaje: Makiej užo nie prazrysta namiaknuŭ, a prama skazaŭ, što Minsk naohuł moža ničoha nie padpisać u śniežni, kali Maskva nie vykanaje biełaruskija zapyty da hetaha momantu: pa padatkovym manieŭry, hazie i barjerach na rasijskim rynku.

Heta, ja b skazaŭ, rezka. Maskva naŭrad ci daść kampiensacyju padatkovaha manieŭru biez chacia b prykmietna realizavanych darožnych kart. Minsk admaŭlajecca ich navat padpisvać biez kampiensacyi.

Paciešna pahladzieć, jak jany vybierucca z hetaha tupika da 8 śniežnia. Niepadpisańnie dakumientaŭ u 20-hodździe sajuznaj dziaržavy budzie skandałam.

• 0
• 0
• 0
• 0
• 0
• 0
• 0
• 0