Шрайбман: Макей прама сказаў, што Мінск наогул можа нічога не падпісаць у снежні
Палітычны аглядальнік Арцём Шрайбман у сваім тэлеграм-канале прааналізаваў інтэрв'ю міністра замежных спраў Уладзіміра Макея.
— Ваенная база нам не патрэбна, мы яе больш не абмяркоўваем. Пад ціскам такія рашэнні прымаць не будзем.
Гэта акрэсліванне мяжы абароннага саюзніцтва. Вучэнні, сумесная пазіцыя ў ААН — так, калі ласка. Новыя войскі — тут мы суверэнныя.
Цікавае перапляценне інтарэсаў з нашымі заходнімі суседзямі, якія просяць саюзніка-ЗША размясціць у сябе больш войскаў, бо ўспрымаюць расійскія войскі як пагрозу. Мінск жа патрабуе ў саюзніка-Расіі не размяшчаць у сябе войскі, бо таксама лічыць іх пагрозай.
— Масква выстаўляла непрымальныя прапановы па наднацыянальных органах у саюзнай дзяржаве. Іх знялі з парадку размовы, як і адзіную валюту.
Гэта прывітанне ўсім алармістам, якія паверылі ў казкі пра «канфедэрацыю», «больш цесна, чым у ЕС». Без наднацыянальных органаў не можа працаваць ні адна цесная інтэграцыя. Кропка. Прэцэдэнтаў у свеце няма.
Нават у друзлым ЕАЭС ёсць такія органы. А ў саюзнай дзяржаве Мінск цяпер заблакаваў іх стварэнне.
Без такіх органаў гэта дзве незалежныя сталіцы, якія нешта спрабуюць узгадніць. Да Еўрасаюза тут як да Месяца. Да канфедэрацыі — як да Плутона.
— Адзіны падатковы кодэкс з Расіяй — гэта «такая палітычная мэта». Макей сказаў, што не разумее, як можна хутка прыняць такі дакумент, і што Мінск не будзе проста прымаць на сябе расійскі кодэкс.
Усё ўвогуле, як я і казаў. Гэта пачатак яшчэ аднаго бясконцага торгу, дзе Мінск не збіраецца саступаць, а будзе патрабаваць ад Масквы невыканальнага — памяняць расійскі падатковы кодэкс з улікам беларускіх нормаў.
— І нарэшце самае галоўнае: Макей ужо не празрыста намякнуў, а прама сказаў, што Мінск наогул можа нічога не падпісаць у снежні, калі Масква не выканае беларускія запыты да гэтага моманту: па падатковым манеўры, газе і бар'ерах на расійскім рынку.
Гэта, я б сказаў, рэзка. Масква наўрад ці дасць кампенсацыю падатковага манеўру без хаця б прыкметна рэалізаваных дарожных карт. Мінск адмаўляецца іх нават падпісваць без кампенсацыі.
Пацешна паглядзець, як яны выберуцца з гэтага тупіка да 8 снежня. Непадпісанне дакументаў у 20-годдзе саюзнай дзяржавы будзе скандалам.
Каментары