Asambleja delehataŭ Mižnarodnaha PENu na 85-m štohadovym Kanhresie, jaki adbyvajecca ŭ Manile (Filipiny) 1—5 kastryčnika, vykazała zaniepakojenaść praciahłaj styhmatyzacyjaj biełaruskaj movy ŭ Biełarusi, dzie ŭłady ŭžo amal try dziesiacihodździ imknucca zamacavać daminavańnie rasiejskaj movy.
«Niekalki hadzin tamu 85 Kanhres Mižnarodnaha PENa pryniaŭ prapanavanuju Biełaruskim PENam rezalucyju adnosna biełaruskaj movy. My vielmi dobra razumiejem: na rezalucyi praca nie zakančvajecca, a tolki pačynajecca. Biełaruski PEN u kansorcyŭmie ź inšymi biełaruskimi arhanizacyjami pracuje nad supolnaj kampanijaj pa advakatavańni biełaruskaj movy. I tut takaja padtrymka [Kanhresa] niazvykła istotnaja, bo časta mienavita źniešni intares dazvalaje zastavacca ŭ tonusie intaresu ŭnutranamu — na ŭsich uzroŭniach», — kamientuje padzieju staršynia Biełaruskaha PEN-centru Taćciana Niadbaj.
U zakliku PENu adznačajecca, što ŭłady curajucca biełaruskaj movy. Na aficyjnym uzroŭni ŭsie zakony napisanyja pa-rasiejsku. Abmiažoŭvajecca dostup da adukacyi na biełaruskaj movie: tolki 13 % vučniaŭ navučajucca pa-biełarusku, a ŭ krainie niama nivodnaha ŭniviersitetu ź biełaruskaj movaj vykładańnia. U Biełarusi 85 % knih vydajucca pa-rasiejsku.
U toj ža čas biełaruskija ŚMI nie mohuć płatna prasoŭvać ułasny videakantent na svaich ža «YouTube»-kanałach, bo «Google Ads» nie padtrymlivaje biełaruskaj movy. Heta surjozna ŭpłyvaje na efiektyŭnaść sprobaŭ pašyreńnia hladackaj aŭdytoryi dy raspaŭsiudu peŭnaj i spraŭdžanaj infarmacyi.
Asambleja delehataŭ Mižnarodnaha PENu zaklikaje Biełaruś dziejać zhodna z Artykułam 17 Kanstytucyi Respubliki Biełaruś, jaki zakanadaŭča zamacavaŭ status biełaruskaj movy jak dziaržaŭnaj.
Asambleja delehataŭ Mižnarodnaha PEN-kłubu zaklikaje «Google» dy inšyja internet-płatformy: pryznać biełaruskuju movu i zabiaśpiečyć biełarusam mahčymaść vykazvacca i svabodna kamunikavać z pradstaŭnikami ŭłasnych supolnaściaŭ dy inšymi ludźmi na biełaruskaj movie.
Kamientary