Viktar Marcinovič pra pieramovy Łukašenki i Pucina: Jak padpisać Ništo

Viktar Marcinovič na budzma.by piša pra toje, čamu nie varta čakać «pahłyblenaj» intehracyi z Rasijaj u bližejšaj pierśpiektyvie.

Jak my pisali napiaredadni, sprečka padčas «losavyznačalnych» pieramovaŭ u Sočy razharnułasia vakoł scenaroŭ «Lublinskaja unija» (za jaho «tapiła» Maskva) i «Błabłabła» (varyjant, simpatyčny Minsku). Jak my pradkazvali, sustreča skončyłasia ničym.

Z tym tolki niuansam, što baki vyrašyli nie padpisvać toje Ništo ŭ jakaści «pieramožnaha» vyniku.

Adkładańnie intehracyjnaha dedłajnu na 20 śniežnia nie moža padmanuć nikoha, zdolnaha dumać.

Lubuju sprečnuju situacyju možna razrulić za 5 hadzinaŭ sprečki za začynienymi dźviaryma. Kali hetaha nie adbyłosia za hod, a «intensifikacyja źjadnańnia» idzie ŭžo hod, hetaha — pry ciapierašnich pazicyjach bakoŭ — nie adbudziecca nikoli.

U Biełarusi niama instrumientaŭ viarnuć sabie byłuju vuhlevadarodnuju rentu, nie pazbaviŭšysia častki suvierenitetu. Adziny rubiel, adzinaje kiravańnie (sapraŭdnaje, a nie virtualnaje, jak heta było z «vyšejšaj dziaržaŭnaj radaj» «sadružnaści») — voś toje, što prapanoŭvałasia naŭzamien. I ŭsie razumieli, što nijaki tanny haz nie zamienić aficyjnamu Minsku asałody ad prava pryznačać svaich Daš, Maš i Loš u «parłamient».

Ź inšaha boku, u Maskvy niama šancaŭ zabrać častku paŭnaŭładździa biełaruskaj viertykali navat u abmien na istotnyja patańnieńni enierhanośbitaŭ.

Tut usio prosta: dabrabyt zbolšaha nikomu kateharyčna nie patrebny. Bo jon nie ŭpłyvaje na kiravanaść krainy, vybudavanaj na tych pryncypach, na jakich vybudavanaja Biełaruś. Jahonaja adsutnaść rezultujecca adno ŭ buchciažy ŭ sacyjalnych sietkach i na YouTube-kanałach, što aficyjny Minsk imkliva vučycca pryciskać z dapamohaj sudovych rašeńniaŭ ab ekstremiźmie i bot-atak sa skarhami na nieprymalny dla dziaciej kantent. Čynavienstva jak jeździła, tak i budzie jeździć na naviutkich mašynach. Kali haz byŭ tannym, jany «ciahnuli» ź biudžetu. Ciapier, jak vynikaje z tych-sich situacyj, vučacca «ciahnuć» ź jeŭrapiejskich fondaŭ (całkam źmianiajučy sens paniaćcia «hrantasos»).

Ja pamiataju 90-ja i viedaju, jak byvaje, kali ekanomika pieražyvaje «ciažkija časy». Novyja «inšamarki» dla vykankamaŭ pierastajuć nabyvacca na aukcyjonach za srodki pustych biudžetaŭ. Zamiest taho va ŭsie niezaležnyja miedyi idzie płyń skarhaŭ ad zamiežnikaŭ i tranzicioraŭ, u jakich adcisnuli šykoŭnyja tarantasy praz pamarki ŭ mytnych dekłaracyjach.

Kali donaram dla siłkavańnia sistemy pierastaje być Rasija, u hetaha donara pieratvarajucca hramadzianie. Padatki, ceny na paliva, niapoŭnahadovyja, jakich možna rassadzić pa kałonijach biaspłatna dzierci drot z brakavanych šynaŭ. Narešcie, u kožnym z nas siadzić unutranych orhanaŭ na 40 tysiač jeŭra — pałovu ź ich možna kanfiskavać biez vokamhniennaj straty zdolnaści hałasavać daterminova.

To hłabalna supakoicca mohuć jak tyja, što prahnuć intehracyi, tak i tyja, što bajacca jaje jak čorta. Pry najaŭnych uzajemnych cikavaściach bakoŭ nijakaha pahłybleńnia sajuza adbycca nie moža.

Ale, jak zaŭsiody, jość mikraskapičnaja mahčymaść radykalnaj źmieny raskładu. Pryčym tolki z adnaho boku. Bo ŭjavić sabie situacyju, kali raptam pamiahčeje pazicyja Rasii i taja adnović fundavańnie Biełarusi, nie patrabujučy realnaha palityčnaha zbližeńnia, možna tolki ŭ scenary kino pra inšapłanietnaje ŭvarvańnie ŭ Kreml.

Dyk voś, kali (jak my patłumačyli) nijakaje paharšeńnie ŭ ekanomicy nie viadzie da padvyšeńnia zacikaŭlenaści ŭ Rasii ź biełaruskaha boku, to musić skłaścisia karcina, pry jakoj ščylnaje partniorstva z Kramlom źjaŭlajecca adzinym instrumientam utrymańnia ŭłady. I ŭjavić sabie taki scenar u bačnaj budučyni my nie možam pa troch pryčynach.

Pa-pieršaje, u Rasii niama vopytu vonkavaj źmieny režymaŭ za miažoj palityčnymi mietadami. Rasija na postsavieckaj prastory zaŭsiody pracuje ź dziejnymi lidarami i chutčej supraćstaić «aranžavym revalucyjam», čym spryčyniajecca ich. Pa-druhoje, luboje palityčnaje abvastreńnie paśla 25 hadoŭ «zastoju» ŭ Biełarusi vyviedzie na viaršyniu chvali nacyjanalna-demakratyčnyja ci kansiervatyŭnyja siły: nijakaj inšaj ideałohii, što kantrastavała b z «savietyzmam», niama. A Rasija, vidavočna, vielmi nie zacikaŭlenaja ŭ źjaŭleńni ŭ kreśle pieramoŭcy ź biełaruskaha boku Sieviarynca, Niaklajeva ci Paźniaka. Pa-treciaje, usia kraina staić na prasłušcy, samaj mocnaj palityčnaj siłaj tut źjaŭlajecca Žoŭty dom, jaki kantraluje Šery dom, jaki manitorycca Šklanym domam.

Navat Łanistery tut nie zdolnyja byli b ničoha zamucić.

U hetych umovach i 20-ha, i paźniej adzinym hatovym dla padpisańnia Łukašenkam i Pucinym budzie Ništo.

Kali nabor kozyraŭ u rukach hulcoŭ źmienicca, my heta adčujem, bo stratu palityčnaj stabilnaści i kiravanaści krainaj niemahčyma schavać za sakretnymi pratakołami.

Pakul ža nam niama pra što chvalavacca, daražeńkija

• 0
• 0
• 0
• 0
• 0
• 0
• 0
• 0