Analityk: Rasija viadzie ŭ Biełarusi doŭhaterminovuju apieracyju

Meta Rasiei — dalejšy rost upłyvu ŭ Biełarusi z nastupnaj inkarparacyjaj, piša palityčny i abaronny analityk Jahor Lebiadok.

«Važna razumieć, chto i za što tarhujecca. Łukašenka viadzie torh usiaho tolki za «padtrymańnie štanoŭ» na hod-try, Pucin ža — za raźvićcio apieracyi ŭpłyvu na Biełaruś i nabližeńnie jaje kančatkovaha stanoŭčaha dla jaho vyniku, — piša analityk Jahor Lebiadok. — Pieršy vyrašaje taktyčnaje pytańnie, druhi — stratehičnaje. Jak śledstva,

Pucin całkam moža i pajści na sastupki ci zaciahnuć praces, pakolki ŭsie dziejańni ŭsio roŭna iduć u ramkach praciahłaj stratehii i jość surjoznyja ryčahi ŭździejańnia na Łukašenku. (Varta zaŭsiody pamiatać, što «Krym» pačaŭsia nie z vajennaj apieracyi ŭ lutym 2014, nie z pryčyny Majdanu-2013, a z padpisańnia Pucinym u 2001 hodzie zakona Rasii «Ab paradku pryniaćcia ŭ Rasijskuju Fiederacyju i ŭtvareńnia ŭ jaje składzie novaha subjekta Rasijskaj Fiederacyi» i abviaščeńnia kursu na adnaŭleńnie ŭpłyvu na postsavieckaj prastory.)

Nazirajecca i pieršapačatkova vasalny ŭzrovień zychodnaha pasyłu ŭ pieramovach, ahučanaha samim Łukašenkam: «Hałoŭnaje, kab byli roŭnyja ŭmovy». Hučyć byccam by jak patrabavańnie roŭnaści, ale faktyčna heta aznačaje, što farmiravać umovy budzie Rasieja, pakolki roŭnyja ŭmovy patrabujuć ad jaje, i hetyja ŭmovy RF budzie farmavać i dla Biełarusi, — piša Jahor Lebiadok.

«Bolšaja častka zaspakajalnych artykułaŭ zamianiaje stratehičnuju pahrozu straty dziaržaŭnaści vajennaj pahrozaj, nivielirujučy ŭzrovień apošniaj i tym samym pakazvajučy nibyta adsutnaść pahrozy straty niezaležnaści. Samo saboj, što vajennaja pahroza ŭ ciapierašniaj situacyi mała vierahodnaja, ale całkam mahčymaja pry źmienie kiraŭnictva Biełarusi,

pakolki, zhodna z vajennaj daktrynaj RF, «ustanaŭleńnie ŭ dziaržavach, sumiežnych z Rasijskaj Fiederacyjaj, režymaŭ… palityka jakich pahražaje intaresam Rasijskaj Fiederacyi» adnosicca da asnoŭnych vajennych niebiaśpiek. Nie važna, źmianiŭsia režym pry dapamozie vybaraŭ abo revalucyi — kali vy pahražajecie intaresam Rasiei, to vy vajennaja niebiaśpieka, pryčym asnoŭnaja. A «pahroza» i «interasy» ŭ RF vielmi fryvolna interpretavany: toje, što dla nas moža być prosta viadzieńniem samastojnaj unutranaj palityki (naprykład, u dačynieńni da movy i kultury), dla RF moža być «pahrozaj», — piša Lebiadok.

«Viartajučysia da apieracyi ŭpłyvu RF, varta adznačyć, što asnoŭnaja asoba, jakaja ažyćciaŭlaje jaje ŭ Biełarusi, — heta A.H. Łukašenka.

Im asabista realizavany asnoŭnyja mierapryjemstvy, jakija pryviali da zaležnaści ad RF u ekanamičnaj, vajennaj, kulturnaj (kvintesiencyja čaho «biełarus — heta ruski sa znakam jakaści») śfierach. I łahična, što ciapier zaviaršalny etap apieracyi — poŭnaja zaležnaść ŭ palityčnaj śfiery.

A. Łukašenka heta ŭśviadomiŭ (z 2014 hoda ŭ poŭnaj miery), ale tak sam siabie i krainu zaciahnuŭ u piatlu, što vyjści ŭžo składana biez surjoznych nastupstvaŭ», — piša analityk.

«Supakojvacca, na žal, nielha i ŭžo dakładna nielha dapuskać zakałychvańnia, — ličyć Jahor Lebiadok. — U nas idzie doŭhaterminovaja rasijskaja apieracyja pa inkarparacyi Biełarusi, tamu vystupy suprać hetaj dobryja ŭ lubym vypadku, pakolki važnyja nie pluški na hod-try, a doŭhaterminovaja ŭstojlivaść dziaržavy ŭ palityčnaj śfiery (jakaja farmuje ŭstojlivaść i ŭ vajennaj, i ekanamičnaj u kryzisnyja momanty)».

• 0
• 0
• 0
• 0
• 0
• 0
• 0
• 0