6 sakavika zavieršana śledstva pa kryminalnaj spravie ŭ dačynieńni da čatyroch žycharoŭ vioski Puchavičy Žytkavickaha rajona, jakija abvinavačvajucca ŭ žorstkim zabojstvie adnaviaskoŭca.
Jak paviedamiŭ BiełaPAN śledčy adździeła pa važnych spravach prakuratury Homielskaj vobłaści Siarhiej Bielikaŭ, kryminalnaja sprava pieradadziena prakuroru Homielskaj vobłaści, zatym jana pastupić dla razhladu ŭ Homielski abłasny sud. Płanujecca, što abłsud razhledzić spravu na vyjaznym pasiadžeńni ŭ Žytkavičach.
Pavodle słoŭ Bielikava, psichijatryčnaja ekśpiertyza pryznała, što čatyry abvinavačvanyja, u liku jakich dziaŭčyna, znachodzilisia ŭ stanie śviadomaści. Im pradjaŭlena abvinavačvańnie ŭ zabojstvie ŭ adpaviednaści z častkaj 2 artykuła 139 Kryminalnaha kodeksa (zabojstva, učynienaje hrupaj asob), što karajecca pazbaŭleńniem voli na termin ad vaśmi da 25 hadoŭ, abo pažyćciovym źniavoleńniem, abo śmiarotnym pakarańniem.
Žorstkaje zabojstva Mikałaja Makareviča, 1957 hoda naradžeńnia, adbyłosia 31 śniežnia 2008 hoda. Jaho cieła sprabavali spalić, a zatym advieźli i schavali kala vioski Bieleŭ Žytkavickaha rajona.
10 studzienia pa padazreńni ŭ zabojstvie byli zatrymanyja try miascovyja žychary — 1972, 1974 i 1985 hadoŭ naradžeńnia. Ich źmiaścili ŭ śledčy izalatar,
adnak 6 lutaha, paśla ŭmiašańnia prezidenta krainy, miera strymańnia była źmienienaja na chatni aryšt.
24 lutaha abvinavačańnie ŭ zabojstvie było pradjaŭlena 21‑hadovaj žycharcy Puchavičaŭ, jakaja raniej była asudžana za naniasieńnie ciažkich cialesnych paškodžańniaŭ svajmu sužycielu i adbyvała pakarańnie ŭ vyhladzie abmiežavańnia voli.
