Da 25 hod pazbaŭleńnia voli. Vyniesieny prysud pa rezanansnaj spravie ab napadzie na žycharoŭ Juravičaŭ

Spaleny dom u Juravičach. Fota: SK.

Sudovaja kalehija pa kryminalnych spravach Homielskaha abłasnoha suda ŭ zakrytym pasiadžeńni razhledzieła spravu ab žorstkim napadzie na žycharoŭ ahraharadka Juravičy Kalinkavickaha rajona, paviedamlaje Źviazda sa spasyłkaj na BiełTA.

Padsudnymi pa spravie prachodzili troje maładych ludziej. Jak paviedamlałasia, u noč z 3 na 4 listapada 2018 hoda ŭ ahraharadku Juravičy niećviarozyja maładyja ludzi (25-hadovy, 20-hadovy, 17-hadovy — uzrost na momant ździajśnieńnia złačynstva) pranikli ŭ dom muža i žonki. Jany źbili ich z asablivaj žorstkaściu. Zatym napali na susieda paciarpiełych, jaki apynuŭsia pobač ź miescam złačynstva. Ad atrymanych cialesnych paškodžańniaŭ jon pamior u balnicy. Muž i žonka vyžyli. Rasśledavańniem dziorzkaha napadu na viaskoŭcaŭ zajmałasia śpiecyjalna stvoranaja śledčaja hrupa, praca jakoj była na asabistym kantroli načalnika ŭpraŭleńnia SK. Taksama byli sabranyja dokazy pa inšych faktach supraćpraŭnaj bijahrafii abvinavačanych.

Čytajcie taksama: 

Pryjšli pakarać muža, bo žonka napisała zajavu ab zhvałtavańni. A zabili susieda — kryvavaja razborka ŭ Juravičach

Razborki ŭ Juravičach praciahvajucca: miascovyja spalili dom adnaho ź fihurantaŭ spravy ab kryvavym zabojstvie

Na padstavie sabranych dokazaŭ dziejańni 25-hadovaha abvinavačanaha byli kvalifikavanyja śledstvam jak zamach na zabojstva dvuch i bolš asob, učynienaje z asablivaj žorstkaściu, hrupaj asob; zabojstva, ździejśnienaje z asablivaj žorstkaściu, z chulihanskich pamknieńniaŭ, hrupaj asob, asobaj, jakaja raniej učyniła zabojstva; ŭciahvańnie niepaŭnaletniaha va ŭčynieńnie asabliva ciažkich złačynstvaŭ; asabliva złosnaje chulihanstva; zhvałtavańnie; hvałtoŭnyja dziejańni sieksualnaha charaktaru; niezakonnyja nabyćcio, našeńnie sastaŭnych častak ahniastrelnaj zbroi; niezakonnyja nabyćcio, zachoŭvańnie vybuchovych rečyvaŭ.

Dziejańni 20-hadovaha abvinavačanaha kvalifikavanyja jak zamach na zabojstva dvuch i bolš asob, učynienaje z asablivaj žorstkaściu, hrupaj asob; zabojstva, ździejśnienaje z asablivaj žorstkaściu, z chulihanskich pamknieńniaŭ, hrupaj asob, asobaj, jakaja raniej učyniła zabojstva; ŭciahvańnie niepaŭnaletniaha va ŭčynieńnie asabliva ciažkich złačynstvaŭ; asabliva złosnaje chulihanstva.

Samy juny chłopiec abvinavačvaŭsia ŭ zamachu na zabojstva dvuch i bolš asob, zroblenym z asobaj žorstkaściu, hrupaj asob; zabojstvie, ździejśnienym z asablivaj žorstkaściu, z chulihanskich pamknieńniaŭ, hrupaj asob, asobaj, jakaja raniej učyniła zabojstva; asabliva złosnym chulihanstvie.

Starejšy z kampanii pryznany vinavatym pa ŭsich artykułach. Pa sukupnaści złačynstvaŭ, šlacham častkovaha składańnia pakarańniaŭ, jon pryhavorany da 25 hadoŭ pazbaŭleńnia voli ŭ papraŭčaj kałonii va ŭmovach strohaha režymu. Taksama dałučana nieadbytaja častka pakarańnia pa pryhavory suda Śvietłahorskaha rajona ad 23 lutaha 2016 hodu - štraf Br2,6 tys. z ulikam denaminacyi.

Vina druhoha maładoha čałavieka taksama pryznana pa ŭsich pradjaŭlenych artykułach. Pa sukupnaści złačynstvaŭ, šlacham častkovaha składańnia pakarańniaŭ, jamu kančatkova vyznačana 23,5 hoda pazbaŭleńnia voli ŭ papraŭčaj kałonii va ŭmovach ŭzmocnienaha režymu.

Małodšy z ulikam častkova dałučanaha nieadbytaha im pakarańnia pa pryhavory suda Kalinkavickaha rajona ad 17 kastryčnika 2018 hoda kančatkova prysudžany da pazbaŭleńnia voli na 13,5 hady ŭ papraŭčaj kałonii va ŭmovach ahulnaha režymu.

Taksama ŭ salidarnym paradku abvinavačanyja pavinny pakryć na karyść dvuch paciarpiełych Br10 tys. I Br100 tys. za maralnuju škodu.

Prysud u zakonnuju siłu nie ŭstupiŭ i moža być abskardžany i apratestavany va ŭstanoŭlenym zakanadaŭstvam paradku.

• 0
• 0
• 0
• 0
• 0
• 0
• 0
• 0