Navat na Karanacyi Michałok byŭ nieprystojnym

Chopić. Treba ŭžo pryznacca, u nas nie samaja lepšaja kraina. Jak u inšych dziaržavach treciaha śvietu, u nas bujaie dziciačaje «Jeŭrabačańnie», ale dosyć nieraźvity duet «Huk i Ček» (u prostamoŭi — šoŭ‑biznes). U dadatak hodzie chłusić, što Minsk — stalica. Piša Pavał Kaściukievič.

Tyja, chto pryjechaŭ na «Rok‑karanacyju» ŭ maładziečanski Dom kultury, mahli bačyć, dzie ŭ rytmie roku hrukaje serca Biełarusi. Sprytny biełaruski bamond jak mileńki sieŭ na elektryčku «Minsk—Maładziečna». Vy viery nie daścio: tut jość vialiki simfaničny arkiestr imia Michała Kleafasa Ahinskaha (hučyć, hučyć jak!), a taksama bluz‑bend. A paśla psichadeličnaha solnaha vystupu na «Rok‑karanacyi» kampazitara Andreja Ivanova, naŭzboč jakoha stajała bandura, jakaja zamianiała ŭvieś hurt «Zarcipo», zrazumiełasia, što vialiki adronny kałajder krainy taksama mieścicca tut. Nu i, viadoma, stalica ŭ Maładziečnie, bo mienavita tut, u paŭniutkaj zale na 900 miescaŭ, byŭ karanavany novy rok‑karol.

Jak zaŭsiody adstaronienaja «Troica», uzbrojenaja niespaścihalnym žalem, a taksama ŭsimi svaimi žalejkami i žaleječkami atrymali pryz «Tradycyi i sučasnaść». Vitalik Artyst z «Bieź bileta», jaki atrymaŭ karony za «Vykanaŭca hodu» i «Klip hodu», paćvierdziŭšy renamie, uzrušyŭšy zału refrenam «U‑u, Afryka!». «Niejradziubieli» pankavali i «huzikavali». Pra žyćcio, što jak dziŭny son, ciahnuli jašče pieršyja rok‑karali «Krama». Pryznavałasia viaśnie ŭ kachańni pa‑dziecidziciačamu niepasrednaja Hanna Chitryk, novaśpiečanaja rok‑kniazioŭna.

I tut źjaviŭsia jon. Va ŭniformie španiuka, nakačany i taki małady. Naš karol. Niebaluča ŭkusiŭ za nohu viadučuju, słoŭna padkusiŭ presu, prymieraŭ rok‑karonu pamiž noh. Ź pieršymi jaho krokami pa scenie zała ŭspomniła, što jana nie aby‑dzie, a na rok‑kancercie i žvava padniałasia. A jon čytaŭ vieršy, pabudavanyja na supraćpastaŭleńni tytanaŭ i pacukoŭ. Chaciełasia nabić sabie jahonuju tatujavanku i pajści ŭ trenažornuju zału. Heta chłopčykam. Dziaŭčatam, što puścilisia ŭ impetnyja skoki, chaciełasia ŭs(jaho) i całkam.

Pieramožcy ŭ naminacyjach

Adkryćcio hodu — hurt «Esprit»

Tradycyi i sučasnaść — hurt «Troica»

Rok‑kniazioŭna — Hanna Chitryk («DzieciDziaciej»)

Vykanaŭca hodu — Vital Artyst («Bieź bileta»)

Klip hodu — «Miečtatieli» («Bieź bileta»)

Pieśnia hodu — «Zorački» («Lapis Trubiackoj»)

Albom hodu — «Manifiest» («Lapis Trubiackoj»)

Rok‑karona (hurt hodu) — «Lapis Trubiackoj»

Dypłomam «Za vialiki ŭniosak u raźvićcio biełaruskaha rok‑n‑rołu» adznačany Andrej Ivanoŭ (hurt «Zarcipo»). Admysłovyja ŭznaharody atrymali: «Avanhardškoła» — ad «Našaj Nivy», «Troica» — ad hramadskaje inicyjatyvy «Budźma!», IQ48 — ad Generation.bY, Esprit — ad univer.by, «Krama»; — ad piśmieńnika i vydaŭca Ŭładzimira Siŭčykava, «Sad» — ad Eŭrapiejskaha radyjo, «Kniaź Čaradziej» — ad Global CD.

Hałasy:

Piatnaccaty rok‑karol Siarhiej Michałok: «Dziakuj usim lečaščym daktaram, jakija viarnuli ludziam viesiałość».

Dziaŭčaty, jakija prarvalisia ŭ hrymiorku i sfatahrafavalisia ź Michałkom: «Ciapier tut z nami ŭsie fatahrafavacca buduć!»

Čałaviek u cyvilnym, sprabujučy prajści za kulisy: «Puścicie ja choć z krajočku stanu, pahladžu. Ja milicyjanier. Voś paśviedčańnie». Nie puścili.

• 0
• 0
• 0
• 0
• 0
• 0
• 0
• 0