Navukoŭcy: U Zachodniaj Jeŭropie virus pajšoŭ na spad, dziakujučy karancinu

Abaviazkovy karancin i inšyja abmiežavalnyja miery, uviedzienyja amal va ŭsich jeŭrapiejskich krainach, užo dapamahli skaracić patencyjnuju kolkaść achviar karanavirusa amal na 60 tys. čałaviek. Mahčyma, da kanca sakavika vyratavać udałosia navat udvaja bolš žyćciaŭ, piša bbc.com.

Da takoj vysnovy pryjšła kamanda navukoŭcaŭ Impierskaha kaledža Łondana ŭ svaim apošnim daśledavańni, apublikavanym u aŭtorak u časopisie Nature.

Pryčym havorka idzie tolki pra 11 krain Zachodniaj Jeŭropy. U ahulnajeŭrapiejskim i tym bolš suśvietnym maštabie havorka idzie pra sotni tysiač ludziej, jakija mahli b zahinuć, kali b nie pryniatyja miery pa strymlivańni pandemii.

U svaim papiarednim daśledavańni ad 26 sakavika navukoŭcy Impierskaha kaledža śćviardžali, što bieź jakich-niebudź mier strymlivańnia pandemija Covid-19 pavinna była dakacicca praktyčna da kožnaha žychara płaniety i zarazić amal 7 młrd čałaviek.

Kolkaść zahinułych ad karanavirusa pry takim raskładzie skłała b kala 40 młn.

Adnak, vyvučyŭšy apošnija źviestki ab kolkaści chvorych i zahinułych u 11 krainach Zachodniaj Jeŭropy — u tym liku Italii, Ispanii, Francyi i Vialikabrytanii, — navukoŭcy pryjšli da vysnovy, što rost epidemii zapavoliŭsia amal na dźvie traciny.

Dzie-nidzie jon navat pajšoŭ na spad, heta značyć uzrovień uznaŭleńnia virusa (kolkaść zdarovych ludziej, jakich u siarednim zaražaje kožny infikavany) upaŭ nižej za 1.

U vyniku ŭ Jeŭropie ŭžo ŭdałosia vyratavać prykładna 59 tysiač ludziej, jakija ŭ advarotnym vypadku zahinuli b ad karanavirusa da kanca sakavika. Minimalnaja kolkaść vyratavanych žyćciaŭ aceńvajecca ŭ 21 tysiaču, maksimalnaja — u 120 tysiač.

Aŭtary dakładu śćviardžajuć, što heta stała mahčymym za košt pryniaćcia strohich abmiežavalnych mier: zakryćcia škoł, zabarony masavych schodaŭ, abmiežavańnia hramadskaha transpartu i pierasoŭvańnia ludziej u cełym, uviadzieńnia abaviazkovaha karancinu i režymu samaizalacyi i h.d.

Asobna padkreślivajecca, što pakul niemahčyma vyznačyć, jakija mienavita abmiežavańni najbolš paŭpłyvali na spad epidemii. Adnak u sukupnaści pryniatyja miery praciahvajuć davać vidavočny vynik.

Navat u Italii, dzie kolkaść zahinuŭšych ad Covid-19 užo nabližajecca da 12 tysiač, biez abmiežavalnych mier achviar było b amal 50 tysiač, śviedčać raźliki.

Zrešty, adznačajuć aŭtary artykuła, z-za doŭhaha inkubacyjnaha pieryjadu chvaroby ŭ bolšaści krain efiekt ad pryniatych abmiežavalnych mier možna budzie ŭ poŭnaj miery acanić tolki praź niekalki tydniaŭ.

Adnak, kali biahučy trend zachavajecca, u nas jość padstava dla aptymizmu, zaklučajuć navukoŭcy.

• 0
• 0
• 0
• 0
• 0
• 0
• 0
• 0