Na Dzień Voli hramadzkija aktyvisty Mahilova zładzili akcyju la Krajaznaŭčaha muzeju. Pavodle historykaŭ, u hetym budynku ŭ 1918 hodzie pradstaŭniki hramadzkaści pryznali ŭładu BNR.
Akcyja pačałasia a 18‑aj hadzinie. Da budynku pryjšli niekalki dziasiatkaŭ hramadzkich aktyvistaŭ. Mahiloŭcy pryčapili da vopratki bieł‑čyrvona‑biełyja stužki dy vinšavali adzin adnaho z Dniom Voli. Zatym udzielniki akcyi ŭskłali kvietki da stvoranaj demakratami šyldy ŭ honar BNR. Paśla čaho la ŭvachodu ŭ muzej adbyŭsia niepraciahły mitynh, jaki zavieršyŭsia vokličam «Žyvie Biełaruś!». Za akcyjaj nazirali čaćviora milicyjantaŭ. Adzin ź ich padyšoŭ da kiraŭnika Mahiloŭskaj filii Partyi BNF Ryhora Kastusiova, kab pacikavicca, chto arhanizavaŭ akcyju.
Pavodle historykaŭ, mienavita ŭ budynku Krajaznaŭčaha muzeju12 lipienia 1918 hodu ź inicyjatyvy Mahiloŭskaha nacyjanalnaha kamitetu adbyŭsia schod z udziełam pradstaŭnikoŭ mahiloŭskaj hramadzkaści. U mierapryjemstvie ŭziali ŭdzieł kala čatyrochsot čałaviek. Balšynioj hałasoŭ udzielniki schodu padtrymali abviaščeńnie niezaležnaści Biełaruskaj Narodnaj Respubliki.
Letaś moładzievyja aktyvisty źbirali podpisy za ŭstalavańnie na budynku Krajaznaŭčaha muzeju infarmacyjnaj šyldy ŭ honar Biełaruskaj Narodnaj Respubliki. Usiaho było sabrana niekalki sotniaŭ podpisaŭ mahiloŭcaŭ. Adnak harvykankam inicyjatyvy nie padtrymaŭ — čynoŭniki spasłalisia na nibyta admoŭnaje staŭleńnie muzejnych supracoŭnikaŭ dy na adsutnaść dakumentalnaha paćvierdžańnia histaryčnaj padziei.
Ciapier čytajuć
Zahinuŭ biełaruski dobraachvotnik Vasil «Dzir» Rapicki11
Kamientary