Pravakacyja ci nakrutka? Što nie tak z hałasami ŭ internet-prajmieryz za Mikałaja Kazłova?

Jašče adna sprečnaja situacyja padčas prajmieryz.

Pavialičyć

U apošni dzień krasavika skončyłasia internet-hałasavańnie na prajmieryz apazicyjnych palitykaŭ, jakija chočuć stać adzinym demakratyčnym kandydatam na budučych prezidenckich vybarach.

Ahułam u hałasavańni anłajn uziało ŭdzieł 4457 karystalnikaŭ. Arhanizatary, viadoma, spadziavalisia na bolšuju ličbu, ale ŭmiašaŭsia karanavirus, tamu vynik atrymaŭsia nie samy ŭnušalny.

U vyniku za Mikałaja Kazłova prahałasavali 39,8% (1774 čałavieki), za Juryja Hubareviča 36,12% (1610), za Volhu Kavalkovu — 24,07% (1073). Zdavałasia b, heta ŭžo kančatkovyja ličby, ale na spravie zastajecca šmat pytańniaŭ.

Telehram-kanał «Vybary. Biełaruś», blizki da ruchu «Za Svabodu», apublikavaŭ skrynšoty bolš za sotni hałasoŭ, jakija nibyta byli padadzienyja za kiraŭnika AHP Mikałaja Kazłoŭ. U čym asablivaść hetych hałasoŭ?

Pavialičyć

Karystalniki nie paznačali imia, a zamiest hetaha ŭvodzili składanyja nabory litar i ličbaŭ. Miescam žycharstva byŭ paznačany «Minsk». Elektronnaja pošta — kozlov@tut.by (heta mejł nie naležyć kiraŭniku AHP). A ŭ hrafie telefony paznačalisia ci mabilnik Kazłova, ci haradski numar jahonaj partyi. Taksama paŭsiul paznačałasia «Za Kazłova!»

«Tak, mohuć być pytańni pa tym, što adbyvałasia ŭ rehijonach, byŭ upłyŭ viertykali. Byŭ upłyŭ viertykali ci śpiecsłužbaŭ, chutčej za ŭsio, i padčas internet-hałasavańnia, bo my bačyli, jak imkliva raśli ličby za Mikałaja Kazłova ciaham apošnich hadzin. Heta ŭsio dziŭna vyhladała», — skazaŭ lidar ruchu «Za Svabodu» Juraś Hubarevič u efiry «Jeŭraradyjo».

Mikałaj Kazłoŭ nazyvaje heta nie nakrutkami, a pravakacyjaj. Sprava ŭ tym, što ŭsio napisanaje zusim nie aznačaje, što dziŭnyja karystalniki hałasavali mienavita za Mikałaja Kazłova. Napisać možna było ŭsio, što zaŭhodna, pry hetym addaŭšy hołas zusim za inšaha kandydata.

«Ad siabie mahu skazać, što naša kamanda dziejničała sumlenna i prazrysta. A heta niejkaje skoctva», — kaža Mikałaj Kazłoŭ. Pa jahonych słovach, pravieryć ajpi-adrasy hałasoŭ niemahčyma praz toje, što źviestki znachodziacca ŭ Čechii, a ź Jeŭrasajuza nie buduć pieradavać asabistyja danyja.

Plus da ŭsiaho Mikałaj Kazłoŭ adznačaje, što takija dziŭnyja «hałasy» išli nie raŭnamierna ciaham adnaho dnia, a na praciahu ŭsiaho hałasavańnia.

Kiraŭnik štaba prajmieryz, lidar BSDP Ihar Barysaŭ paćviardžaje, što sproby paŭździejničać na vyniki internet-hałasavańnia byli. Ciapier pravodzicca pravierka hałasoŭ, u jakoj udzielničajuć pradstaŭniki ŭsich kandydataŭ.

Taksama Barysaŭ adznačaje, što z 4500 hałasoŭ, jakija byli padadzienyja padčas anłajn-hałasavańnia, tolki prykładna ŭ 60% ludzi naprykancy paznačali svaje danyja, a jašče ŭ 40% hetaha nie było. I nieviadoma, ci nie było sprobaŭ niejak upłyvavać na vyniki hałasavańnia ŭ hetaj «šeraj zonie», u jakoj nie paznačanyja nijakija asabistyja danyja.

Hladzi taksama: Rymašeŭski choča źniać Hubareviča z prajmieryz «za amaralnyja pavodziny». U apazicyi ŭsio składana

• 0
• 0
• 0
• 0
• 0
• 0
• 0
• 0