Mastakom stužki moža stać Artur Klinaŭ, roli prapanavanyja Katu i Kołbyšavu. U stužcy moža źjavicca i Volski.
«Biełaruśfilm» padpisaŭ damovu z Andrejem Kudzinienkam, aŭtaram «Akupacyi», na zdymki hatyčnaj trahikamiedyi žachaŭ. Mastakom stužki moža stać Artur Klinaŭ, roli prapanavanyja Katu i Kołbyšavu. U stužcy moža źjavicca i Volski.
Scenar, składzieny pa addalenym matyvam «Łokisa» Praśpiera Meryme, prydumali Alaksandr Kačan i Andrej Kudzinienka. Kudzinienka pry hetym žartuje: «Masakra» — heta takaja dziaŭčyna», kali jaho zapytvajuć pra nazvu. Zrešty, luboŭnaja historyja ŭ siužecie taksama majecca.
Naprykancy minułaha hodu Nacyjanalnaja kinastudyja «Biełaruśfilm» prapanoŭvała režysioru, napaŭzabaronienamu ŭ Biełarusi, pastavić na radzimie hatyčny chorar. Kudzinienka zhadziŭsia, ale damovy nie padpisvaŭ.
U Rasiei i Polščy taksama zacikavilisia kasavym siužetam, ale rasiejskuju kinaindustryju chutka napatkaŭ kryzis — a polskim partnioram nie padabalisia moŭnyja hulni, firmovyja dla duetu Kačana j Kudzinienki. U papiarednim filmie «Akupacyja. Misteryi» — hieroi razmaŭlajuć na movie, što adpaviadaje ichniamu nacyjanalnamu j sacyjalnamu statusu (movie biełaruskaj, polskaj, rasiejskaj).
Narešcie, kryzis pryjšoŭ i ŭ Polšču — i mahčymyja vonkavyja inviestycyi byli zamarožanyja. U vyniku na minułym tydni Kudzinienka skłaŭ damovu z Nacyjanalnaju kinastudyjaj. Jamu abiacali nie čaplacca ź ideałahičnymi prydzirkami i finansavać ščodra. Zapusk karciny pryznačany na vosień.
Ciapier režysior źbiraje svaju kamandu, kab možna było pastavić hodnuju karcinu na kinastudyi, što advučyłasia ad mastactva. Rola hrafa, jaki pieratvarajecca ŭ miadźviedzia, prapanavanaja Anatolu Katu; śviatarom (i byłym paŭstancam) — moža stać Alaksandr Kołbyšaŭ (viadomy, jak zuchavaty Štyrkin z «Akupacyi»). Nahadaju, što dziejańnie ŭ filmie adbyvajecca paśla paŭstańnia Kastusia Kalinoŭskaha; hatyčnaja žachaŭka nasyčanyja histaryčnymi j sacyjalnymi realijami tych časoŭ.
Režysior chacieŭ by zaprasić na stužku i Lavona Volskaha (na rolu muzyki), i hurt «Trojca» (dla miadźviežaha saŭndtreku).
A pierad Arturam Klinavym pastaŭlenaja admysłovaja zadača — nie tolki namalavać prydumany śviet, ale i stvaryć zahadku, jakaja maje vialikaje (i kamičnaje) značeńnie ŭ siužecie.
Kamientary