Sud nad Zielankovym
Na 29 červienia pryznačany sud nad 22-hadovym žłobinskim aktyvistam Eduardam Zielankovym: navučenca metalurhičnaha technikumu vinavaciać u dziejnaści ad imia niezarehistravanaj arhanizacyi «Małady front» (art.193 č.1 KK). Sprava Zielankova – pieršaja, što dajšła da sudu pavodle «sucharenkaŭskich» dabavak u Kryminalny kodeks, zroblenych napiaredadni vybaraŭ.
Eduarda zatrymali 13 sakavika padčas napisańnia hrafici «Za svabodu!», «Za Milinkieviča!», «Małady front». Śpiarša na chłopca raspačali administracyjnuju spravu, adnak nieŭzabavie materyjały zapatrabavaŭ načalnik Žłobinskaha rajonnaha adździaleńnia KDB. Supracoŭniki KDB zatrymali Zielankova na 3 sutak jak padazravanaha ŭ kryminalnym złačynstvie. Praz 10 sutak jany pieradali spravu ŭ Žłobinskuju prakuraturu, adtul jana trapiła ŭ śledčaje adździaleńnie rajonnaj milicyi, a ŭrešcie raśśledavańnie praviali milicyjanty Centralnaha adździełu Homielu.
12 červienia z Eduarda ŭziali padpisku pra niavyjezd. 19 červienia jamu pryjšła pozva ŭ sud. Usie čatyry śviedki, vyklikanyja na sud, – z boku abvinavačańnia.
16 červienia
U Słucku na akcyi ŭ Dzień salidarnaści zatrymali siabra PBNF Vitala Amialkoviča, moładzievych aktyvistaŭ Dzianisa Bałakira i Juliju. Na ich skłali pratakoły za niesankcyjavanaje pikietavańnie. Niepaŭnaletniuju Juliju 19 červienia vyklikali ŭ škołu, dzie zmusili napisać tłumačeńnie nakont udziełu ŭ akcyi.
21 červienia
Pravaabaronca Andrej Sańnikaŭ paviedamiŭ, što mytnaja słužba aeraportu «Miensk-2» užo 3 miesiacy admaŭlajecca viarnuć jamu hrošy: 26 sakavika ŭ jaho zabrali na ekspertyzu 1040 dalaraŭ ZŠA i 260 eŭra.
Prakuratura Miensku pieradała ŭ sud spravu palitviaźnia Alaksandra Kazulina, jakoha vinavaciać u chulihanstvie i arhanizacyi vuličnych biesparadkaŭ. 22 červienia źniavoleny admoviŭsia ad charčavańnia ŭ Žodzinskaj turmie j pierajšoŭ tolki na pradukty z charčovych pieradačaŭ, bo jamu nie dazvolili pierajści na dyjetyčnaje charčavańnie. 26 červienia pryznačany sudździa ŭ jahonaj spravie – Alaksiej Rybakoŭ z Maskoŭskaha rajonnaha sudu.
U sudzie Maskoŭskaha rajonu razhladałasia sprava aktyvista AHP Siarhieja Ilkieviča, zatrymanaha napiaredadni ŭviečary za naklejvańnie nalepki «Dastaŭ». Jaho zatrymaŭ milicyjant Siatoj, jaki nie pakazaŭ paśviedčańnia, tamu chłopiec nie pajšoŭ za im. Milicyjant pavaliŭ aktyvista na asfalt i vyklikaŭ padmohu. Adzin z novaprybyłych pamočnikaŭ, Ratkievič, udaryŭ Siarhieja ŭ tvar. Sudździa Nadzieja Revuckaja, jakoj zabaronieny ŭjezd u krainy Eŭraźviazu, razhladała spravu pavodle art.166 KaAP (supraciŭ rabotnikam milicyi). Razhlad spravy pieraniesieny na niapeŭny čas.
Žurnalista rasiejskaj hazety «Kommiersant'» Vadzima Doŭnara aštrafavali na 1 bazavuju vieličyniu za «drobnaje chulihanstva». Žurnalista zatrymali 21 krasavika kala administracyi prezydenta: achoŭnik Illa Płotnikaŭ, jaki vystupiŭ śviedkam na sudzie, zajaviŭ, što Doŭnar łajaŭsia matam i źnievažaŭ kiraŭnika dziaržavy. Sud, na jaki žurnalist navat nie atrymaŭ pozvy, doŭžyŭsia 7 chvilinaŭ.
Aktyvista Antona Jasinoviča ŭ Połacku zatrymali za raspaŭsiud drukavanych vydańniaŭ biez vychodnych źviestak, zaadno abvinavaciŭšy ŭ niecenzurnaj łajancy na adras rabotnikaŭ pravaachoŭnych orhanaŭ. Noč jon prabaviŭ u izalatary časovaha ŭtrymańnia. Sud doŭžyŭsia 22 i 23 červienia i skončyŭsia apraŭdańniem zatrymanaha, bo ŭ pratakołach zatrymańnia było šmat niedakładnaściaŭ.
U Śvietłahorsku adbyłasia akcyja salidarnaści siarod siabroŭ TBM pa zbory srodkaŭ na karyść Natalli Bordak, jakaja straciła pracu za ŭdzieł u vybarčaj kampanii.
22 červienia
U Mahilovie pastanovaj sudu likvidavany resursavy centar «Koła siabroŭ», jaki dziejničaŭ 10 hadoŭ. Padstavaj dla zakryćcia stali parušeńni: u statut byli ŭniesienyja źmieny pry niedastatkovaj kolkaści ŭdzielnikaŭ schodu.
Čyhunačny rajonny sud Viciebsku pačaŭ pierahladać administracyjnyja spravy Jaŭhiena Babkoviča i Ivana Burykina, zatrymanych u Viciebsku 18 červienia.
Na stancyi metro «Mahiloŭskaja» ŭ Miensku milicyjanty zatrymali aktyvistaŭ AHP Aleha Korbana, Mikałaja Siarhiejeva i hramadzianku Rasiei Volhu Niačajevu, na jakich byli sakołki z emblemaj AHP i słovam «Nadakučyŭ». Zatrymanym skazali, što na ich byli skarhi ad pasažyraŭ metro: maŭlaŭ, moładź «kiepska hladzieła na pasažyraŭ».
23 červienia
Palitviaźnia Siarhieja Laškieviča pieraviali z Haradzienskaj turmy ŭ Hłybokaje.
Viarchoŭny sud pačaŭ razhlad spravy pa prypynieńni da 1 vieraśnia dziejnaści RHA «Biełaruski Chelsynski kamitet»: Minjust ličyć, što arhanizacyja nie spłaciła padatkaŭ, a taksama nia vypraviła šerah niedakładnaściaŭ na svaim sajcie. Pravaabaroncy kažuć, što sprava ź finansami jašče vyrašajecca ŭ Vyšejšym haspadarčym sudzie (VHS), a vypravić niedakładnaści na sajcie jany nia mohuć, bo blakavany rachunak arhanizacyi. BCHK adrazu padaŭ chadajnictvy pra prypynieńnie pracesu ŭ suviazi z razhladam nahladnaj skarhi ŭ VHS. Sud abviaściŭ pierapynak da 27 červienia.
23 červienia stała viadoma, što prakuratura apratestoŭvaje rašeńnie sudu Maskoŭskaha rajonu pa spravie Jurja Radziviła, asudžanaha na 3 miesiacy aryštu. Prakurorskija rabotniki patrabujuć bolš žorstkaha pakarańnia.
U Miensku padčas praviadzieńnia samitaŭ EŭrAzES i ADKB zatrymali moładzievych aktyvistaŭ: niepaŭnaletnija Alaksandar Čarnyšoŭ, Rusłan Maćviejeŭ, Nastaśsia Šyškova, Daniła Barysievič i Jaŭhien Leščanka vyjšli na płošču Pieramohi z raściažkaj «Rasiejski sałdat – idzi damoŭ!», a taksama z nacyjanalnym i aficyjnym biełaruskimi ściahami. Pa karotkim časie aktyvistaŭ zatrymali, razam ź imi zatrymali Alaksieja Laŭkoviča i Alenu Kopač, jakija viali fota- i videazdymki akcyi. Na niepaŭnaletnich skłali administracyjnyja pratakoły za ŭdzieł u niesankcyjavanaj akcyi i drobnaje chulihanstva dy adpuścili. Na A.Laŭkoviča i A.Kopač skłali takija samyja pratakoły, ale dastavili ich u turmu na vuł.Akreścina. Da A.Kopač vyklikali chutkuju i zabrali na lekavańnie, a Laŭkoviča asudzili na 10 sutak aryštu.
U Pałacy mastactvaŭ 23 i 24 červienia byli sarvanyja kancerty rok-hurtoŭ na «Adboryšča» – padrychtoŭčy tur dla «Basovišča». Nie zvažajučy na dazvoł ad Minkultu, damovu z administracyjaj Pałacu i apłačanuju za 2 dni arendu, supracoŭniki Ministerstva pa nadzvyčajnych sytuacyjach zabaranili kancert, abhruntavaŭšy heta «niebiaśpiekaj abvału stoli».
Padčas červieńskaj sesii z roznych VNU Miensku vyklučanyja siabry «Moładzi BNF», jakija brali aktyŭny ŭdzieł u viasnovych vuličnych pratestach 19–25 sakavika. Ściapan Śviderski i Jaŭhien Nietkačaŭ navučalisia na histaryčnym fakultecie Biełaruskaha dziaržaŭnaha ŭniversytetu, Ihar Padalinski – na filalahičnym fakultecie BDU (usie troje adbyli turemnyja aryšty za ŭdzieł u vuličnych akcyjach), Makar Vaŭčok byŭ studentam Mienskaha linhvistyčnaha ŭniversytetu.
26 červienia
Źmitra Daškieviča vyklikali na dopyt u prakuraturu ŭ spravie «Maładoha frontu». Adnak u sam dzień dopytu jamu paviedamili, što vizyt pieranosicca. Daškievič śviedčyć, što takija pieranosy adbyvajucca ŭžo ci nia piaty raz.
Arturu Fińkieviču nazvali miesca adbyvańnia pakarańnia: 29 červienia jon pavinien prybyć u Mahiloŭ na praspekt Puškina, 65. Za palityčnyja hrafici chłopiec asudžany na 2 hady chimii.
Aktyvist Jury Śvietłakoŭ z Babrujsku atrymaŭ adkaz na svaju skarhu: prakuratura Leninskaha rajonu Babrujsku pačała dyscyplinarnuju spravu na asobaŭ, jakija niezakonna zatrymali Śvietłakova 25 krasavika, Mikitu Bycenku i Alaksieja Radomskaha, źvinavaciŭšy ŭ niecenzurnaj łajancy j antyhramadzkich pavodzinach. Sud tady spyniŭ spravu praz adsutnaść pravaparušeńnia.
Kamientary