Ciapier «šenhien» dla biełarusaŭ kaštuje 35 jeŭra, ale jechać niama kudy
1 lipienia ŭstupajuć u siłu pahadnieńni Biełarusi i Jeŭrasajuza ab readmisii i spraščeńni vizavaha režymu. A heta značyć, što košt karotkaterminovych šenhienskich viz dla biełarusaŭ źnižajecca da 35 jeŭra. Košt «šenhiena» źniziŭsia — heta plus, ale krainy ES nie śpiašajucca adkryvać miežy dla biełarusaŭ, zaŭvažaje Tut.by.
Pahadnieńni padpisali 8 studzienia 2020 hoda ŭ Bruseli. 29 maja Biełaruś atrymała ad ES Aficyjnaje apaviaščeńnie ab zaviaršeńni aficyjnaj pracedury ratyfikacyi.
Z 2 lutaha 2020 hoda ŭ Jeŭrasajuzie dziejničaje novy Vizavy kodeks, zhodna ź jakim cana za «šenhien» dla biełarusaŭ składała 80 jeŭra, ciapier — 35 jeŭra. Akramia taho, pa novych praviłach, skaračajecca śpis nieabchodnych dakumientaŭ, možna atrymać šmatrazovuju vizu na termin ad adnaho hoda da piaci hadoŭ, da 10 dzion pamianšajecca čas pryniaćcia rašeńnia ab vydačy vizy, mnohija katehoryi hramadzian mohuć źviartacca za biaspłatnaj vizaj.
Jeŭrasajuz z-za pandemii karanavirusa ŭ kancy sakavika začyniŭ źniešnija miežy i pakul nie śpiašajecca adkryvać ich dla ŭsich žadajučych. 30 červienia byŭ apublikavany śpis krain, dla hramadzian jakich z 1 lipienia buduć adkrytyja miežy JEZ. Biełaruś u hety śpis nie patrapiła. Śpis majuć namier pierahladać kožnyja dva tydni.
Jeŭrasajuz hatovy puskać praz svaje miežy tolki hramadzian tych krain, dzie kolkaść novych vypadkaŭ COVID-19 na 100 tysiač žycharoŭ za apošnija 14 dzion blizkaja da siaredniaha pakazčyka JEZ abo nižejšaja za jaho.
Naprykład, u Litvu možna pryjazdžać, kali ŭzrovień zachvorvańnia za apošnija 14 dzion składaje 15-25 vypadkaŭ na 100 tysiač žycharoŭ (pryčym kali da 15 vypadkaŭ, izalacyja nie patrabujecca, 15-25 — izalacyja na 14 dzion). U Biełarusi za apošnija dva tydni hety pakazčyk roŭny 75 vypadkam na 100 tysiač žycharoŭ.
Kamientary