kremlin.ru
Pasoł Biełarusi ŭ Rasii Uładzimir Siamaška siońnia padčas anłajn-bryfinhu, prymierkavanaha da Dnia Niezaležnaści Biełarusi, raspavioŭ niekatoryja padrabiaznaści ab prapanovach rasijskaha boku ŭ dačynieńni da dalejšaha raźvićcia intehracyi.
Pavodle jaho słoŭ, adno ź ich, zroblenaje ŭ 2019 hodzie, praduhledžvała pieradaču Biełaruśsiu na nadnacyjanalny ŭzrovień 95% paŭnamoctvaŭ, piša BIEŁTA.
Adkazvajučy na pytańnie, ci mahčymaje pahłybleńnie intehracyi biez škody suvierenitetu, Uładzimir Siamaška adznačyŭ, što pieradača paŭnamoctvaŭ na nadnacyjanalny ŭzrovień pavinna adbyvacca «ŭ razumnych miežach, biez škody suvierenitetu». «Ja ŭspaminaju 13 lutaha 2019 hoda, kali ŭ Sočy nam pakłali pieršuju prapanovu (nie budu nazyvać aŭtaraŭ z rasijskaha boku).
I kali my pahladzieli i jaho pieradali prezidentu, prezident zaprasiŭ mianie, i ja kažu: nu heta poŭnaje «ruki ŭvierch» nazyvajecca, - raspavioŭ pasoł. - Ja navat nie budu dalej epitety praciahvać: tam było ŭsio addać navierch i, pa-mojmu, zastavałasia paru momantaŭ takich, jak u nas milicyja, u vas palicyja i hetak dalej. Ale tak nie moža być».
Uładzimir Siamaška ŭ jakaści prykładu pryvioŭ Jeŭrapiejski sajuz. «Kali praanalizuješ funkcyi nacyjanalnyja i nadnacyjanalnyja, ja naličyŭ tolki 18%, jakija addadzieny byli na nadnacyjanalny ŭzrovień, astatnija funkcyi zastavalisia nacyjanalnymi, - adznačyŭ jon. — A ŭ tym dakumiencie, jaki nam 13 lutaha 2019 hoda prapanavali, ja naličyŭ 95% funkcyj nadnacyjanalnych».
Kažučy pra ŭviadzieńnie ahulnaj valuty ŭ Sajuznaj dziaržavie, pasoł padkreśliŭ, što, niezaležna ad pamieraŭ ekanomik, u adzinym emisijnym centry pavinna być raŭnapraŭje. «Kali prymajecca niejkaje rašeńnie pa emisii, devalvacyi, to jano pavinna prymacca kansensusam», - pierakanany jon. «Tady nie ŭščamlajucca intaresy ni adnaho, ni druhoha boku», - dadaŭ Uładzimir Siamaška. Što tyčycca padatkovaha i mytnaha zakanadaŭstva, to jany apryjory ŭ siłu adroźnieńniaŭ u ekanomicy nie mohuć być adnolkavymi, pierapisanymi pad kapirku, jany mohuć być tolki unifikavanymi, padkreśliŭ dypłamat.
«Treba razumna padyści da hetaha pytańnia, ni ŭ Rasii, ni ŭ Biełarusi nichto nie choča hublać svoj nacyjanalny suvierenitet», - reziumavaŭ pasoł.
Nadnacyjanalny ŭzrovień — heta niejkaje mifičnaje ŭtvareńnie kštałtu Sajuznaj dziaržavy ci Dziaržsavieta Biełarusi i Rasii. U ich rašeńnie prymajucca z ahulnaj zhody dvuch bakoŭ albo ŭ zaležnaści ad «vahi» kožnaha z udzielnikaŭ.
