Abarona Viktara Babaryki atrymała ad Kamiteta pa pravach čałavieka AAN paćvierdžańnie rehistracyi indyvidualnaha paviedamleńnia, padadzienaha ad jaho imia advakatami Natallaj Mackievič i Dźmitryjem Łajeŭskim. U padadzienym paviedamleńni havorycca ab parušeńni artykuła 9 Mižnarodnaha pakta ab hramadzianskich i palityčnych pravach u vyniku nieabhruntavanaha zatrymańnia Viktara Babaryki i zaklučeńnia jaho pad vartu, piša tut.by.
U Kamitet Viktar Babaryka źviarnuŭsia 6 lipienia. Indyvidualnamu paviedamleńniu nadadzieny rehistracyjny numar 3788/2020.
— Paviedamleńnie Viktara Babaryki źmiaščaje ŭ tym liku zapyt ab terminovych mierach, a mienavita, kab Kamitet pravoŭ čałavieka vykazaŭ prośbu dziaržavie nie pieraškadžać jaho ŭdziełu ŭ prezidenckich vybarach, kab jon moh efiektyŭna karystacca svaimi pravami jak pretendent u kandydaty, uklučajučy dostup da ŚMI, vybarščykaŭ i čalcoŭ svajho štaba, — raspaviali Mackievič i Łajeŭski.
Pa stanie na 13 lipienia Kamitet pa pravach čałavieka zapytaŭ u Biełarusi infarmacyju ab tym, ci acaniła dziaržava naležnym čynam ryzyki taho, što zaklučeńnie pad vartu budzie pieraškadžać realizacyi palityčnych pravoŭ zajaŭnika ŭ budučych prezidenckich vybarach. Infarmacyja pavinna być dadziena Kamitetu da 22 lipienia.
Advakaty nahadvajuć, što Kamitet pravoŭ čałavieka — heta orhan manitorynhu i kantrolu za vykanańniem Mižnarodnaha pakta ab hramadzianskich i palityčnych pravach. Respublika Biełaruś z 1973 hoda źjaŭlajecca dziaržavaj-udzielnicaj hetaj mižnarodnaj damovy, tamu abaviazałasia pavažać i zabiaśpiečvać harantavanyja ŭ joj pravy.
— Staŭšy ŭdzielnicaj pieršaha Fakultatyŭnaha pratakoła ŭ Pakcie ŭ 1992 hodzie, Biełaruś pryznała kampietencyju Kamiteta pa pravach čałavieka prymać i razhladać paviedamleńni ad asob, jakija zajaŭlajuć, što dziaržavaj parušanyja ich pravy, praduhledžanyja paktam, — adznačajuć abaroncy.
Nahadajem, 14 lipienia ŭ CVK nie zarehistravali Viktara Babaryku kandydatam u prezidenty. Štab eks-bankira zajaviŭ, što budzie abskardžvać rašeńnie CVK u sudzie.
