«Ad chvalavańnia spać nie mahła». Vypusknica z Maładziečanščyny raskazała, jak atrymała sto bałaŭ na CT pa biełaruskaj movie

Sioleta sto bałaŭ na CT pa biełaruskaj movie nabrała 78 čałaviek. Siarod ich — vypusknica Haradziłaŭskaj siaredniaj škoły, Hanna Biernackaja. Dziaŭčyna rasskazała karespandentu «Rehijanalnaj haziety» pra toje, jak rychtavałasia i atrymała vysoki vynik.

Biełaruskaja mova — bolš prostaja i zrazumiełaja

— Dla mianie biełaruskaja mova zaŭsiody była kudy bolš prostaja i zrazumiełaja ŭ paraŭnańni z ruskaj. Tamu ja navat nie dumała, jakuju movu zdavać. Dakładna viedała — heta budzie biełaruskaja, — tłumačyć Hanna svoj vybar.

Pa słovach dziaŭčyny, da CT jana rychtavałasia dva hady — padčas vučoby ŭ dziasiatym i adzinaccatym kłasach. Da repietytara nie źviartałasia. Zajmałasia tolki sa svajoj nastaŭnicaj biełaruskaj movy i litaratury Halinaj Jakavickaj. Rašała šmat testaŭ, zajmałasia pa tematyčnych zbornikach, paŭtarała praviły.

— Niadrennyja vyniki na repietycyjnym teściravańni: na pieršym i trecim etapach — pa 87 bałaŭ, na druhim — 90, — pryhadvaje dziaŭčyna.

Jak zdajuć CT u pandemiju

Hanna kaža, što ź biełaruskaj movaj siabravała zaŭsiody. Ź piataha kłasa ŭdzielničała ŭ respublikanskim konkursie «Buślik», dzie byli peŭnyja pośpiechi. U pradmietnaj alimpijadzie taksama ŭdzielničała, ale nie prachodziła dalej pieršych etapaŭ.

Pierad CT abituryjentka chvalavałasia tak, što nie mahła navat spać. Nastrojvała siabie na toje, što ŭsio pavinna być dobra.

— Na rašeńnie testa mnie spatrebilisia chvilin sorak. Jašče dvaccać — na pierapravierku i ŭniasieńnie vynikaŭ u błank. Jak zaŭsiody, častka «V» padałasia lahčejšaj za častku «A», — zhadvaje Ania dzień CT.

Pandemija ŭniesła svaje źmieny ŭ praviadzieńnie teściravańnia. Pa słovach Ani, u aŭdytoryi było nie tak šmat čałaviek, jak zvyčajna. Ludzi siadzieli za partami ŭ šachmatnym paradku, rekamiendavali nadziavać masku.

Rytuałaŭ nakštałt knižki pad padušku ci piać kapiejek u čaravik u dziaŭčyny niama. Zatoje jość mocnaja padtrymka siamji.

Spadziavałasia na dzievianosta bałaŭ

Paśla napisańnia testa dziaŭčyna spadziavałasia, što pavinna być bałaŭ dzievianosta. Na sto nie raźličvała. Tamu, kali zajšła na sajt Respublikanskaha instytuta kantrolu viedaŭ, adrazu nie pavieryła vačam:

— Pačała hartać staronku tudy-siudy. Nie mahła zrazumieć, ci maje heta bały. Potym pačała praviarać adkazy, i ŭsie akazalisia pravilnymi. Była ŭ šoku, — dzielicca surazmoŭca.

Pieršymi pra pośpiech dziaŭčyny daviedalisia členy jaje siamji, potym — nastaŭnica biełaruskaj movy i litaratury.

Jak zdać? Vučyć i vieryć u siabie

Hanna pryznajecca, što ŭ apošnija školnyja hady joj na ŭsio chapała času. Byli nie tolki padručniki, a sustrečy ź siabrami, muzyčnaja škoła, vystupleńni na školnaj scenie, čytańnie dla dušy.

Budučaj śpiecyjalnaściu dziaŭčyna vyrašyła abrać miedycynu. Kankretnuju ŭstanovu abiare tady, kali buduć viadomyja ŭsie vyniki CT. Kaža, miedycyna blizkaja joj. U joj pracavali i pracujuć rodnyja.

Na pytańnie, jak zdać CT na sto bałaŭ, adkaz u Hanny taki: vučyć i vieryć u siabie.

• 0
• 0
• 0
• 0
• 0
• 0
• 0
• 0