Paŭnočnaja Kareja zrabiła puski rakiet. Jany padali ŭ mora

Hałoŭnaja siońniašniaja navina – puski rakietaŭ siaredniaha i dalokaha radyjusa dziejańnia, zroblenyja za minułyja sutki Paŭnočnaj Karejaj. Tearetyčna niekatoryja z hetych rakietaŭ mohuć dalacieć da Złučanych Štataŭ. Paŭnočnakareskaja demanstracyja siły vyklikała nadzvyčaj rezkuju mižnarodnuju reakcyju, Rada biaśpieki AAN sabrałasia siońnia na terminovaje pasiadžeńnie, kab abmierkavać sytuacyju.

Pavodle acenak ekspertaŭ, hetyja vyprabavańni byli nia nadta ŭdałymi. Rakiety padali ŭ mora ŭ chutkim časie paśla startu, adna rakieta dalokaha radyjusa dziejańnia abrynułasia ŭ mora praz 40 sekundaŭ paśla pusku. Tak što kali KNDR chacieła prademanstravać śvietu svaju vajennuju moc, to dasiahnuła hetaj mety adnosna, prademanstravaŭšy peŭnuju techničnuju niedaskanałaść svaich rakietnych mahčymaściaŭ.

Apošnim razam KNDR rabiła padobnyja vyprabavańni 8 hadoŭ tamu. Jašče dva hady tamu Paŭnočnaja Kareja aficyjna zajaviła, što budzie prytrymlivacca maratoryja na puski rakietaŭ. Zaraz Pcheńnian faktyčna parušyŭ ŭłasnyja abiacańni. Pavodle ekspertaŭ vyprabavańni – svajeasablivy srodak cisku na mižnarodnuju supolnaść, prynamsi na Złučanyja Štaty. Apošnim časam na Pcheńnian rabiŭsia dyplamatyčny cisk, a Vašynhton admaŭlaŭsia abmiarkoŭvać patrabavańni KNDR, źviazanyja ź jaje admovaj ad jadziernaj prahramy. Mahčyma, parušyŭšy ŭłasny maratoryj, Paŭnočnaja Kareja sprabavała pakazać śvietu, što i ŭ jaje jość arhumenty ŭ dyplamatyčnym spabornictvie. Da hetych arhumentaŭ naležyć i zajava paŭnočnakarejskich uładaŭ, jakaja prahučała pazaŭčora, što KNDR hatova nanieści jadzierny ŭdar pa Złučanych Štatach, kali jaje jadziernyja abjekty buduć atakavanyja ZŠA. Vašynhton nazvaŭ pahrozu «hłyboka tearetyčnaj» i zaklikaŭ KNDR viarnucca za stoł šaścibakovych pieramovaŭ nakont spynieńnia paŭnočnakarejskaj jadziernaj prahpramy.

Pra toje, što heta chody mienavita ŭ dyplamatyčnaj hulni, śviedčyć toj fakt, što Pcheńnian razam z tym zajaviŭ, što nie skasoŭvaje zaprašeńnie naviedać Paŭnočnuju Kareju Krystaferu Hiłłu - pradstaŭniku amerykanskaha ŭradu ŭ pytańni jadziernaj prahramy KNDR.

Mižnarodnaja reakcyja była žorstkaj i salidarnaj. Japonija nazvała vyprabavańni pahrozaj svajoj nacyjanalnaj biaśpiecy, Tokia na poŭhady zakraŭ paromnuju pierapravu ŭ Paŭnočnuju Kareju. Japonija pryhraziła ekanamičnymi sankcyjami suprać KNDR. Złučanyja Štaty nazvali vyprabavańni paŭnočnakarejskich rakietaŭ pravakacyjaj, ZŠA stali adnym ź inicyjataraŭ siońniašniaha sklikańnia Rady biaśpieki AAN, pryśviečanaha hetaj prablemie. Susiedniaja Kareja kanstatavała, što vajennaja demanstracyja Pcheńnianu pahłybić mižnarodnuju izalacyju KNDR. Rasieja vystupiła z zajavaj, što rakietnyja vyprabavańni padarvali mižnarodnyja vysiłki asłabić napružanaść na Karejskaj vyśpie.

Radyjo Svaboda

• 0
• 0
• 0
• 0
• 0
• 0
• 0
• 0