Kiraŭnik Narodnaha antykryzisnaha ŭpraŭleńnia (NAU) Pavieł Łatuška daŭ vialikaje intervju najbujniejšamu błohieru Biełarusi Ściapanu Puciłu.
Błohier anansavaŭ heta videa jak «intervju z nastupnym prezidentam Biełarusi». Što cikavaha raskazaŭ Łatuška?
Asnoŭnymi kirunkami svajoj dziejnaści Łatuška nazvaŭ stvareńnie Adzinaj knihi rehistracyi złačynstvaŭ, Narodnyja pasolstvy, admiena Čempijanatu śvietu pa chakiei ŭ Biełarusi.
Kiraŭnik NAU ahučyŭ źviestki, što ŭsie bujnyja čynoŭniki krainy atrymlivajuć pa sakretnaj viedamaści dadatkovy zarobak.
«Ni mnoha ni mała — 600 jeŭra štomiesiac. Heta sakretnaja viedamaść, indyvidualnaja. Kožny ź ich moža atrymlivać bolš. Premjer moža atrymlivać i tysiačy [jeŭra], kiraŭnik parłamienta — tysiačy, ministr — 600. Samaje cikavaje, što dadatkovaja zarpłata ŭ kanviercie nie vypłačvajecca ŭ biełaruskich rublach, a mienavita ŭ jeŭra», — adznačyŭ Łatuška.
Jon pryznaŭ, što taksama atrymlivaŭ takija zarobki, adnak ličyć, što ŭ budučyni ŭsie pavinny buduć zapłacić ź jaho padatak.
«Padtrymki Łukašenki ŭžo niama siarod čynoŭnikaŭ. Sistema znutry zhniła, ja nie viedaju, što z hetym budzie rabić KDB, ale źmianić uvieś dziaržaparat budzie niemahčyma», — ličyć były ministr kultury.
«Davajcie hlaniem na narady, jakija adbyvajucca pad kiraŭnictvam Łukašenki. Siadziać ludzi ŭ pahonach, a kali nie ŭ pahonach, to pad cyvilnymi pinžakami śvieciacca zorački. I jon viaščaje adzin, jon nikoha nie čuje i ŭžo nie pačuje. Jon žyvie va ŭłasnym śviecie, vielmi zamknutaj prastory. Navat siarod svaich siabroŭ jon pastajanna bačyć zdrady, vyhaniaje kahości, nabližaje, ja mnohich ź ich viedaju, ale jany źnikli, ich bolš niama, chacia jany dzieści žyvuć», — padzialiŭsia svaim mierkavańniem Łatuška.
«Ja zastajusia mocnym ducham i ŭpeŭnieny ŭ tym, što rablu. Ni siekundu, ni imhnieńnie ja nie sumniajusia ŭ tym, što ŭsio rablu pravilna. I mianie vielmi časta padtrymlivajuć kupałaŭcy.
U žniŭni ja nie razumieŭ, što ŭsio zaležyć ad ciabie. Ty pavinien stać napieradzie kałony i pakazać, što idziom naleva. Ja tady dumaŭ, što chtości hetym kiravaŭ, a ŭ sapraŭdnaści nie kiravaŭ nichto.
U sistemy vielmi šmat treščyn užo, u adzin momant jana rassyplecca ŭ parašok, u pył. NAU hatovaja ŭziać na siabie adkaznaść za budučyniu krainy, my razumiejem usie ryzyki, što tyja pieršyja, chto vychodzić, mahčyma, buduć źmiecienyja z palityčnaj areny, jany chutčej straciać, čym nabuduć, ale tut pytańnie nie ambicyj, a adkaznaści», — skazaŭ Pavieł Łatuška.
Ciapier čytajuć
«Jon kazaŭ, što zołata z saboj nie zabiareš, lepiej zrabić niešta dla inšych». Dačka biznesmiena Kalina raskazała, jak razam z bratam čakaje jaho z kałonii
Kamientary