Prakuror patrabuje paŭtara hoda źniavoleńnia chłopcu, jaki zakleiŭ vočka videakamery na Akreścina
A «Miensktrans» paličyŭ, što za spynieńnie ruchu transpartu padčas «Maršu vyzvaleńnia palitviaźniaŭ» adkazvać pavinien adzin Ihar Pražeńnikaŭ, choć jon dziejničaŭ u «hrupie niavyznačanych asobaŭ». «Miensktrans» patrabuje spahnać z Pražeńnikava 18 624 rubli 45 kapiejek, paviedamlaje «Radyjo Svaboda».
«Prakuratura ličyć, što ŭsie straty «Miensktransu» pryčyniŭ mienavita Pražeńnikaŭ»
Druhoje sudovaje pasiedžańnie pačałosia z razhladu pazovu «Miensktransu», jaki paličyŭ, što mienavita Ihar Pražeńnikaŭ nanios pradpryjemstvu škodu ŭ pamiery bolš za 18 tysiač rubloŭ — padčas masavaj akcyi na niekatory čas byŭ spynieny ruch transpartu.
Juryskonsult «Miensktransu» Natalla Rybak na pytańnie advakata, jak rabiŭsia padlik strataŭ, adkazała, što jana nia viedaje: hetym zajmaŭsia adździeł pieravozak i ekanamičny adździeł. A zhodna z «Aktam ab spynieńni haradzkoha transpartu» ŭ raźlik išła maksymalnaja ŭmiaščalnaść transpartu, čas prastoju, kilametraž.
Advakat pytajecca: jakim terminam možna nazvać straty, jakija nibyta panios «Miensktrans»? Juryskonsult nia moža adkazać. Advakat sprabuje padkazać: «Heta niedaatrymany prybytak?»
«Vy mianie pravakujecie na kankretny adkaz. Prakuratura padała pazoŭ u intaresach pradpryjemstva. Prakuratura ličyć, što ŭsie straty «Miensktransu» pryčyniŭ mienavita Pražeńnikaŭ. Vinu vyznačaje prakuratura», — kaža juryskonsult «Miensktransu» Natalla Rybak.
Advakat zapytvajecca, ci vystaŭlalisia pazovy inšym ludziam, bo Pražeńnikaŭ dziejničaŭ u hrupie niavyznačanych asobaŭ. I kali inšym udzielnikam buduć vystaŭlenyja takija ž sumy, heta budzie nieabhruntavanaje ŭzbahačeńnie.
Natalla Rybak abaraniajecca: «Heta nia my vystaŭlali pazoŭ, heta prakuratura».
Ihar Pražeńnikaŭ pazoŭ u 18 tysiač 624 rubli nie pryznaje.
«Hatovy pryznać, što nanios škodu «Miensktransu» ŭ pamiery 10 rubloŭ», — kaža chłopiec.
«Aktyŭnaja rola Pražeńnikava paćviardžajecca videazapisami»
Dziaržabvinavaŭca padčas sudovych sprečak kaža, što vina Ihara Pražeńnikava całkam dakazanaja: jon braŭ aktyŭny ŭdzieł u hrupavych dziejańniach, jakija hruba parušajuć hramadzki paradak, akazaŭ niepadparadkavańnie pradstaŭnikam ułady, pieraškadžaŭ ruchu transpartu.
«Aktyŭnaja rola Pražeńnikava paćviardžajecca videazapisami — jon ruchaŭsia pa prajeznaj častcy, išoŭ nie ŭ siaredzinie natoŭpu, a zaŭsiody byŭ u pieršym šerahu, vioŭ natoŭp za saboj. Vinavataść Pražeńnikava całkam paćvierdžanaja videazapisami z Akreścina, kali jon naklejvaŭ zalepku na kameru», — skazaŭ dziaržabvinavaŭca.
Prakuror ličyć, što mienavita Pražeńnikaŭ pavinien pakryć pazoŭ «Miensktransu» ŭ poŭnym abjomie.
I prosić pryznačyć jamu pakarańnie: 1 hod 6 miesiacaŭ pazbaŭleńnia voli ŭ kalonii ahulnaha režymu.
U apošnim słovie Ihar Pražeńnikaŭ skazaŭ, što na toj momant u jaho było imknieńnie da lepšaha žyćcia.
«Kali skažu, što ja paddaŭsia natoŭpu — nie sahrašu. Heta byŭ junacki maksymalizm. Ja nie apazycyjaner, nie revalucyjaner, ja nie niasu idei ŭ masy.
Za kratami pryjšło asensavańnie, što ja patrebny tolki svajoj siamji, maci. Vinu całkam pryznaju, škaduju pra toje, što zrabiŭ», — skazaŭ Ihar Pražeńnikaŭ u svaim apošnim słovie.
Prysud budzie abvieščany ŭ sudzie Frunzenskaha rajonu 17 lutaha ŭ 12:30.
U Biełarusi nazirajucca prablemy ź internetam. Voś što pišuć pra heta ludzi2
Kamientary