Pieršyja vypuskniki Akademii inkluziŭnych barysta atrymali pracu ŭ bresckaj kaviarni
Tydzień u kaviarni na Internacyjanalnaj 36, u fłahmanskaj kramie A1, vučylisia varyć kavu studenty Akademii «Inkluziŭny barysta». Novuju prafiesiju atrymali ludzi ź invalidnaściu z roznych kutkoŭ Biełarusi. Troje ź ich užo hatovyja jechać na pracu ŭ Brest — im zrabili aficyjnuju prapanovu. Kaviarnia adkryjecca ŭ sakaviku ŭ centry prodažaŭ A1 na Mašerava 17.
U lutym kiraŭnik prajekta, aktyvist-vazočnik ź Lidy Saša Aŭdzievič pry padtrymcy A1 arhanizavaŭ kursy barysta z dalejšym pracaŭładkavańniem dla ludziej ź invalidnaściu. Pastupiła bolš za 70 zajavak z usioj krainy. Patrabavańni byli prostyja: žadańnie i mahčymaść prajści navučańnie ŭ Minsku i hatoŭnaść pierajechać u Brest.
Paśla anłajn-sumoŭja byli adabranyja piać čałaviek. Čaćviora — vazočniki ź Biarozy, Babrujska, Minska, Połacka i čałaviek nievialikaha rostu z Hrodna. Kožny atrymaŭ siertyfikat, a troje — prapanovu ab pracy. Ciapier ich čakaje samy składany pieryjad — zamacavacca na novym miescy: vyprabavalny termin pačniecca z sakavika.
Dźmitryj Śnitko ź Biarozy — samy małady z usich. Jamu 23. Jaho nazyvajuć «kryštalny čałaviek» z-za redkaj hienietyčnaj patałohii.
«Ja daŭno chacieŭ znajści pracu. U Biarozie heta vielmi ciažka, tamu što i varyjantaŭ mała, i na vazku naohuł nie chočuć brać. Usim patrebny dośvied pracy, a jaho niama. Praz heta i admaŭlajuć u pracy. Pa płanie centra zaniataści ŭ jakaści adaptacyi ja pracavaŭ apierataram EVM hod, ale na hetym usio i skončyłasia. Tamu, viadoma, na kursy jechaŭ ź vialikim entuzijazmam. Jak budzie dalej — čas pakaža. Baćki vielmi rady pieramienam u maim žyćci. Budučy pracadaŭca abiacaŭ dapamahčy z žyllom. Dla mianie heta vielmi važna».
Jašče adzin budučy supracoŭnik kaviarni — 31-hadovy Maksim Jarocki. Čatyry hady tamu jon zvaliŭsia z dreva, z vyšyni šeść mietraŭ, i złamaŭ chrybietnik. Niaščaście pasadziła jaho ŭ vazok, ale nie złamała. Navučyŭsia vieści aktyŭny ład žyćcia i ŭ novych umovach. Kali ŭbačyŭ abjavu, tut ža adpraviŭ ankietu i zamoviŭ śpiecvahon z rodnaha Babrujska ŭ Minsk. Z momantu padzieńnia heta jaho pieršaja praca. Da trahiedyi pracavaŭ aficyjantam, tamu śfiera hramadskaha charčavańnia znajomaja.
«Chočacca raźvivacca, zrabić kaviarniu najlepšaj ustanovaj u Breście, paznajomicca z hetym biznesam znutry i, mahčyma, niešta svajo adkryć u budučyni. Ja lublu razmaŭlać ź ludźmi, atrymlivaju ad hetaha šmat pazityŭnych emocyj. Ja vielmi natchniony, tamu što dla vazočnikaŭ, kali i znachodzicca niejkaja praca, to jak praviła, kamunikacyj ź ludźmi ŭ joj amal niama».
Treci barysta — 33-hadovy Alaksiej Sinkievič z Połacku. Jon taksama lohki na ŭzdym. Da pierajezdaŭ jamu nie pryvykać. Na vazku pierasoŭvajecca ŭžo bolš za 10 hadoŭ. «U 22 hady pajechaŭ u Maskvu na zarobki, kab apłačvać navučańnie ŭ VNU. Try tydni papracavaŭ, i mianie źbiła mašyna na piešachodnym pierachodzie. Pieršy čas siadzieŭ doma, nie ruchaŭsia zusim, byŭ zamkniony. Šturškom stała paralimpijskaje fiechtavańnie». Kab zajmacca, pierajechaŭ ź Viciebsku ŭ Połack. Byŭ pryzioram čempijanataŭ Jeŭropy, śvietu, etapaŭ kubka śvietu. Abjeździŭ paŭśvietu.
Siońnia ŭsie jaho pačynańni padtrymlivaje žonka z maleńkaj dačkoj, hatovaja iści za im usiudy. Z Sašam Aŭdzievičam Alaksiej paznajomiŭsia jašče ŭ Viciebsku. «Zaachvocili mianie dobraj kavaj. I mnie heta padabajecca, lažyć duša. Płanavaŭ adkryć svaju kaviarniu ŭ Połacku, navat častku abstalavańnia kupiŭ, ale nie znajšoŭ dastupnaj arendy. Kaviarnia ŭ Breście dla mianie — šaniec ažyćciavić svaju maru. Adčuvaju tolki adnu pieraškodu: baćki ŭ Viciebsku, a heta amal 700 km ad Bresta, unučku buduć redka bačyć. Ale spadziajusia, što kaviarni buduć i ŭ inšych haradach adčyniacca. Tamu pačnu ŭ Breście, a tam pahladzim».
U płanach «Inkluziŭnaha barysta» i A1 i dalej adkryvać novyja kaviarni. Tamu z časam budzie mahčymaść pracaŭładkavacca i ŭ inšych vučniaŭ inkluziŭnaj Akademii.
Kamientary