Novyja realii — pastaŭščykam stała niavyhadna pradavać miedycynskuju techniku. Čamu tak adbyłosia?

Ahułam Minzdaroŭja kaža pra 4,6% niaspraŭnaha abstalavańnia ad ahulnaj kolkaści. Jano ramantujecca. 

U toj ža čas z boku miedykaŭ čuvać narakańni, što ŭ niekatorych balnicach abvastrylisia prablemy ź niedachopam raschodnikaŭ, a taksama na zaciahnuty pa časie ramont abstalavańnia. Što adbyvajecca?

Prablemy majuć sistemny charaktar i abumoŭlenyja prycirkaj pastaŭščykoŭ da ŭviadzieńnia 10-pracentnaha padatku na tavary miedycynskaha pryznačeńnia z 1 studzienia 2021. 

U Biełarusi daŭno isnuje zahannaja schiema pastavak lekaŭ i balničnych tavaraŭ, u vyniku jakoj nasielnictva i biudžet pierapłočvajuć miescami ŭ razy.

Ukaz Alaksandra Łukašenki №366 «Ab farmiravańni cen na leki, vyraby miedycynskaha pryznačeńnia i miedycynskuju techniku» ustanaŭlivaje maksimalna mahčymuju handlovuju nadbaŭku ŭ zaležnaści ad pamieru cany ŭ bazavych vieličyniach. Kali niešta zusim tannaje, to možna nakručvać da 20% (havorka pra leki), kali darahoje — da 3% (havorka pra miedtechniku). Uzajemasuviaź pamiž canoj i nadbaŭkaj možna hlanuć tut.

Tamu kampanii ź biełaruskaj jurydyčnaj prapiskaj isnujuć nibyta na miažy vyžyvalnaści, ale realny prybytak asiadaje ŭ firmach-prakładkach va ŭmoŭnym Kipry — tyja kuplajuć techniku ŭ vytvorcy, nakručvajuć canu da žadanaj rentabielnaści i pa joj potym pradajuć biełaruskaj «dačce», jakaja i realizuje tavar «u miežach zakonu». 

Uviadzieńnie 10%-ha padatku prosta spyniła mnohija miedycynskija zakupki ŭ Biełarusi, bo pastaŭščyki nie pajšli na konkursy — cana ŭ aŭkcyjonnych dakumientach sfarmavanaja letaś, i kali pastaŭščyk pahodzicca pa joj udzielničać, to budzie ŭ minusie. 

Umoŭna kažučy, kali pastaŭščyk kuplaŭ u svajho kiprskaha partniora tavar za 100 rubloŭ, kab pradać jaho tut za 105 rubloŭ, to ŭ vyniku jon zapłacić dadatkovyja 10% sa 105 rubloŭ i akažacca ŭ čystym minusie. Tamu pastaŭščykam vyhadna pačakać.

«Usie techničnyja zadańni ciapier treba pierapisvać pa novych cenach. Heta ŭskładziena na zahadčykaŭ adździaleńniaŭ, jakija pavinny daznavacca novyja ceny ŭ pastaŭščykoŭ. Ale źviazvacca z pastaŭščykami ryzykoŭna, bo kantralory mohuć uhledzieć karupcyju ŭ takim uzajemadziejańni. Samo pa sabie ŭviadzieńnie PDV pryvodzić da padaražańnia tavaru, jaki potym dziaržava sama ž i kuplaje pa bolš vysokich cenach. Tendary pravodzić «Miedtechnika» — ličy što padraździaleńnie Minzdaroŭja. Upłyvu na ich z boku balnicy niama, tamu ŭźnikajuć prablemy sa svoječasovym ramontam i zakupkaj raschodnikaŭ», — kažuć abaznanyja miedyki. 

• 0
• 0
• 0
• 0
• 0
• 0
• 0
• 0