Jakija zvyčki časoŭ pandemii varta zachavać dla siabie i płaniety
Ludziam pryjšłosia chutka prystasoŭvacca da novaha śvietu, što apynuŭsia pad udaram karanavirusa. U vyniku źjaviłasia šmat novych zvyčak, niekatoryja ź jakich varta zachavać i paśla pandemii, kab mienš škodzić sabie i płaniecie.
1. Kupla miascovaj pradukcyi.
Kali krainy apynulisia ŭ izalacyi, ludzi byli vymušanyja addavać pieravahu łakalnym vytvorcam, kab nabyć nieabchodnyja pradukty. Heta, u svaju čarhu, značna źnižaje vuhlarodny śled čałavieka, piša CNN.
Vialikaja častka vykidaŭ vuhlarodu vyklikanaja transparciroŭkaj praduktaŭ charčavańnia da miesca pryznačeńnia. Čym mienšy popyt na zamiežnyja pradukty, tym mienš škody atrymlivaje płanieta.
2. Źmianšeńnie pajezdak na pracu
Paśla pačatku pandemii mnohija kampanii pačali pracavać dystancyjna. Heta źmienšyła kolkaść mašyn na darohach, što stała pieravahaj dla navakolnaha asiarodździa. Ekśpierty miarkujuć, što praca z domu paru dzion na tydzień dapamoža źnizić vykidy vuhlakisłaha hazu paśla zakančeńnia pandemii.
3. Źmianšeńnie avijapieralotaŭ
Avijakampanii stali adnoj z tych halin, jakaja najbolš paciarpieła ad pandemii. Zakrytyja miežy prymusili admianić rejsy na niavyznačany termin.
U vyniku jakaść pavietra palepšyłasia va ŭsim śviecie, ale pa miery taho, jak kolkaść palotaŭ raście, pavialičvajecca i kolkaść vykidaŭ vuhlakisłaha hazu.
Heta nie značyć, što treba nazaŭsiody zabycca pra padarožžy. Adnak pandemija pakazała, što, naprykład, šmat biznes-pajezdak možna paśpiachova zamianić videa-kanfierencyjami.
4. Bolš času na pryrodzie
Z pačatkam pandemii niekatoryja źjechali ŭ addalenyja vioski i miastečki dalej ad vialikaj kolkaści ludziej i bližej da pryrody.
Čas, praviedzieny na pryrodzie, palapšaje jak fizičnaje, tak i psichičnaje zdaroŭje. Pa vynikach daśledavańnia, tyja, chto bavić čas na pryrodzie nie mienš za dźvie hadziny na tydzień, radziej skardziacca na drennaje samaadčuvańnie.
5. Našeńnie masak u hramadskich miescach
Asabliva heta aktualna tym ludziam, jakija adčuvajuć siabie chvorymi. Maska abaraniaje nie tolki ad kavidu, ale i ad inšych raspaŭsiudžanych reśpiratornych zachvorvańniaŭ — takich, jak hryp. Karanavirus źmienšyŭ raspaŭsiudžvańnie hrypu va ŭsim śviecie, bo ludzi masava pačali nasić maski. Tamu hetu zvyčku varta zachavać i paśla pandemii, asabliva kali ŭ vas źjaŭlajucca simptomy infiekcyi.
Ciapier čytajuć
Ejsmant: Łukašenka nie zmoža palacieć na Samit miru ŭ ZŠA, bo pavietranaja prastora Jeŭropy dla jaho zakrytaja50
Kamientary