Jak paviedamlaje «Gazeta Wyborcza», budaŭnictva linii elektrapieradačy stała najbolš važnym pradmietam abmierkavańnia dvuchdzionnaha pieršaha Biełaruska‑polskaha ekanamičnaha samita.
Biełaruski bok u Varšavie pradstaŭlaŭ vice‑premjer Andrej Kabiakoŭ i ministr enierhietyki Alaksandr Aziarec. — Palapšeńnie biełaruska‑polskich adnosinaŭ ź pieršych dzion majho kiraŭnictva było vysokim pryjarytetam, —adznačyŭ paśla premjer‑ministr Polšy Donald Tusk.
Biełaruskija pradstaŭniki ŭ asnoŭnym kazali pra budaŭnictva enierhietyčnaha masta pamiž dźviuma krainami. Siońnia jość dźvie linii elektrapieradačy, ale jany nievialikija. Pieršaja — «Biełastok‑Roś» mahutnaściu 230 MVt. Druhaja linija złučaje Brest i Vulka‑Dabrynskaja. Jana naležyć pryvatnamu inviestaru i maje maleńkuju mahutnaść — 120 MVt. Abiedźvie nie pracujuć.
Heta situacyja chutka moža źmianicca. Polskaja enierhietyka z 2013 hoda budzie jašče bolš abkładzienaja vydatkami ŭ suviazi z vykidam ŭ pavietra vuhlakisłaha hazu. Enierhietyka zhodna z klimatyčnym pakietam ES budzie zmušana kuplać ŭsio bolš i bolš pravoŭ na vykid SO2. Ale Biełaruś nie źjaŭlajecca čalcom ES, tamu hetyja standarty jaje nie tyčycca. Z hetaj pryčyny Polša zacikaŭlenaja ŭ imparcie elektraenierhii.
Adzin z samych bahatych palakaŭ Jan Kulčyk užo viadzie pieramovy z «Biełenierha». Jaho kampanija žadaje pabudavać vuhalnuju elektrastancyju ŭ Biełarusi z mahutnaściu prykładna 1000 MVt. — Heta prajekt koštam 1 młrd jeŭra, tok z elektrastancyi budzie nakiravany ŭ Polšču, — kaža Marta Vysocka, advakat chołdynhu. — Vuhal taksama budzie pryvozicca i z Polščy, a ŭmovy jaho dastaŭki, zrazumieła, buduć ekanamična efiektyŭnymi. — dadaje jana. Zaraz Kulčyk šukaje partnioraŭ, jakija zmahli b dapamahčy stvaryć i finansavać stancyju. Nieviadoma, ci abrała kampanija miesca dla budaŭnictva.
«Gazeta Wyborcza» taksama adznačaje, što linija spatrebicca i z‑za taho, što ŭ 2015 hodzie ŭ Astraŭcy, vierahodna, budzie pabudavanaja pieršaja atamnaja elektrastancyja. Biełaruś zaraz bolš prasunułasia ŭ budaŭnictvie AES, čym Litva, ź jakoj Polša taksama buduje liniju elektrapieradačy.
