Sud pieranios razhlad skarhi ab likvidacyi hrodzienskaha «Centra haradskoha žyćcia»
Pasiadžeńnie pa razhladzie apielacyjnaj skarhi dyrektara «Centra haradskoha žyćcia» Paŭła Mažejki prajšło 18 červienia ŭ Ekanamičnym sudzie Hrodzienskaj vobłaści. Sud abjaviŭ pierapynak da 21 červienia. Pavieł abskardžvaje raniejšaje rašeńnie ab likvidacyi jaho ŭstanovy, piša hrodna.life.
Pavieł Mažejka śćviardžaje, što rašeńnie ab likvidacyi «Centra haradskoha žyćcia» ad 12 traŭnia treba admianić, bo źviestki, jakija tady pradstaviŭ prakuror, ničym nie paćviardžajucca. U adkaz na heta prakuror Juryj Siemiančuk pradstaviŭ sudu razdrukavany artykuł ź Vikipiedyi ź bijahrafijaj partyzana-antysavietčyka Jaŭhiena Žychara.
Taksama Pavieł Mažejka źviarnuŭ uvahu suda na adsutnaść podpisaŭ supracoŭnikaŭ Hrodzienskaha dziaržaŭnaha ŭniviersiteta (HrDU) Vadzima Chiluty i Śniažany Siemiarnik na zaklučeńni ekśpiertnaj kamisii ab tym, što na vystavie ŭ «Centry» reabilitavali nacyzm. Mienavita hetyja ekśpierty vyrašyli, što reabilitacyja nacyzmu była realizavana praz ušanavańnie asoby Jaŭhiena Žychara.
Sudździa Siarhiej Lach abviaściŭ pierapynak da 15:00 21 červienia.
Čamu likvidujuć «Centr haradskoha žyćcia»
«Centr haradskoha žyćcia» — heta pryvatnaja adukacyjna-kulturnaja placoŭka. Tut prajšli sotni mierapryjemstvaŭ, vystupali muzyki, prachodzili zaniatki kursaŭ biełaruskaj movy «Mova Nanova», viasnoj 2020 hoda źbirali achoŭnyja ekrany dla miedykaŭ.
Na kiraŭnika placoŭki Paŭła Mažejku, mastaka Alesia Puškina i «inšych asob» 26 sakavika zaviali kryminalnuju spravu pavodle č. 3 art. 130 KK nibyta za dziejańni, nakiravanyja na reabilitacyju i apraŭdańnie nacyzmu. Parušeńniem paličyli vystavu, na jakoj byŭ partret biełaruskaha partyzana.
30 krasavika prakuror Hrodna źviarnuŭsia ŭ Ekanamičny sud z prośbaj likvidavać pryvatnuju ŭstanovu «Centr haradskoha žyćcia». Pryčyna — vystava Alesia Puškina. U pazovie Klišyn spasyłaŭsia na art.81 Kodeksa ab kultury, zhodna ź jakim dziejnaść kulturnaj ustanovy možna zabaranić, kali jana prapahanduje ekstremisckuju dziejnaść.
Ciapier čytajuć
Łojka pra budučaha pierajemnika Łukašenki: Adčuvajecca, što dziadula rychtujecca, prykidvaje i hladzić varyjanty12
Kamientary