Čyrvony Kryž pieradaje na Akreścina srodki hihijeny, ale da palityčnych jany nie dachodziać. Što kažuć u arhanizacyi?
Fihuranty palityčnych spravaŭ nie atrymlivali nie tolki pieradačy ad svajakoŭ, ale i humanitarnuju dapamohu, jakuju ŭ izalatary pieradaje Čyrvony kryž.
Našaniŭcy 12-y dzień siadziać na Akreścina biez hihijeničnych srodkaŭ, dadatkovaj ježy i pitva, niahledziačy na śpioku. Pra takuju arhanizacyju pobytu raskazvali i ludzi, što pabyvali na sutkach za hramadskuju pazicyju. Ci adsočvaje Čyrvony Kryž, kab ich dapamoha trapiła da viaźniaŭ? Ci razmaŭlali jany z administracyjaj Akreścina na hety kont?
Press-słužba arhanizacyi koratka prakamientavała: dla hetaha jany nie majuć paŭnamactvaŭ pa zakonie. «U nas niama dostupu ŭ turmy dla manitorynhu luboha rodu».
Adznačym, što pieršy namieśnik Hienieralnaha sakratara Biełaruskaha Čyrvnoha Kryža Ina Lemiašeŭskaja ŭvachodzić u skład kamisii pry Miniuście, jakaja zajmajecca manitorynham miescaŭ abmiežavańnia i pazbaŭleńnia svabody.
Biełaruski Čyrvony Kryž pieradaje dapamohu ŭ 37 izalataraŭ. Aproč Akreścina, heta Vaładarka, adzin IČU ŭ Mahiloŭskaj vobłaści, 2 — u Viciebskaj, 5 — u Homielskaj, 5 — u Bresckaj, 9 — u Minskaj, 13 — u Hrodzienskaj.
U nabory dla asudžanych uvachodziać myła, šampuń, zubnaja pasta, ščotki, prakładki, tualetnaja papiera, vilhotnyja survetki, knihi, adzieńnie, vada i pradukty, maski i antyseptyki.
Pa padlikach arhanizacyi ź minułaha žniŭnia da červienia ŭ izalatary było pieradadziena bolš za 8100 hihijeničnych naboraŭ, 2950 praduktovych naboraŭ, 2930 litraŭ vady, 2400 adzinak adzieńnia i abutku. Ale što z hetaha atrymali zatrymanyja, zastajecca zahadkaj.
Kamientary