Krynicy: jeŭrapiejskija partniory patrabujuć ad novaha ŭłaśnika MTBanka dakazać, što ŭhoda nie fiktyŭnaja
U kancy červienia MTBank, aktyŭ biznesmiena Alaksieja Aleksina, nabyŭ livaniec Ramiea Abdo, jaki ŭ Biełarusi budavaŭ handlova-zabaŭlalny centr Galileo, biznes-centry Rubin Plaza i Silver Tower. Suma ŭhody nie razhałošvałsia, u aficyjnym bankaŭskim relizie było skazana, što «rašeńnie pryniata z ulikam inviestycyjnaj pryvabnaści banka».
Dahetul u biznes-kołach niama zhody, jak razhladać uhodu pa pakupcy banka: niechta ličyć, što heta dekaratyŭny akt, inšyja kažuć, što Abdo moh pakvapicca na pryjemnuju canu, biznes Aleksina trapiŭ pad sankcyi.
Jak stała viadoma «Našaj Nivie», niahledziačy na toje, što bank bolš nie naležyć strukturam padsankcyjnaha biznesoŭcy, pytańni z boku jeŭrapiejskich partnioraŭ uźnikajuć.
«Zachodnija banki zapatrabavali dokazy tamu, što ŭhoda nie fiktyŭnaja. Jany nie chočuć mieć spravy z sankcyjami. Pad dokazami majucca na ŭvazie paćvierdžańni taho, što ŭhoda płanavałasia da ŭviadzieńnia sankcyj suprać Aleksina i da taho, jak navat pra takija płany stała viadoma. Havorka viadziecca pra termin u dva hady da zaviaršeńnia ŭhody», — paviedamili «Našaj Nivie» abaznanyja bankiry.
Što moža pasłužyć u jakaści dokazaŭ?
«Zvyčajna, kali pačynajucca pieramovy ab prodažy bujnoha biznesa, u tym liku bankaŭ, baki padpisvajuć damovu ab nierazhałošvańni, bo inviestaru treba raskryć usiu spravazdačnaść. Ale vy možacie nie damovicca, i voś, kab raskrytyja dakumienty nie pačali «hulać», padpisvajecca damova, pry hetym prysutničajuć śviedki — jurysty, nataryusy. Adbyvajecca acenka aktyvaŭ ź inšaha boku, što taksama niejak dakumientalna afarmlajecca. Kali novamu ŭłaśniku banka ŭdasca pradastavić takich ludziej, prablem možna paźbiehnuć», — kažuć bankiry.
Nahadajem, na minułym tydni ŭ suviazi z amierykanskimi sankcyjami spyniŭ valutnyja pieravody i absłuhoŭvańnie kartak VISA Absalutbank.
Kamientary