«Ja z usimi vami raspraŭlusia nie pa-dziciačy. Prosta pahražaju». Zjaviłasia aŭdyja z hołasam, padobnym da Karajeva
U internecie zjaviŭsia novy zapis, na jakim hołas, padobny da hołasa byłoha ministra ŭnutranych spraŭ Juryja Karajeva, raspaviadaje ab zadačach milicyi pa achovie ŭčastkovych kamisij u dzień vybaraŭ. Nastrojvaje ŭsich na surjoznuju mabilizacyju, kab rychtavalisia da najhoršaha — pratestoŭcaŭ budzie šmat. Sielektarnaja narada z kiraŭnikami UUS abłaściej, zapeŭnivajuć u siecivie, prajšła 6 žniŭnia 2020 hoda. Robim blizki pierakaz pramovy.
Dać upeŭnienaść členam učastkovych kamisij
«Samaje hałoŭnaje — heta ŭpeŭnienaść u vas učastkovych kamisij až da taho, što chaj prajeducca vašy hrupy sami, biez usialakich vyklikaŭ, pa ŭčastkach, pa 5-7 čałaviek, paznačać siabie ŭ formie, skažuć staršyni, voś moj telefon — telefanujcie.
Zadača na hetyja dni daterminovaha hałasavańnia — zaścierahčy ich ad pahroz, tamu što mnie navat z radavych učastkaŭ škoł telefanujuć, maje asabistyja znajomyja — zavuč, dyrektar — bajacca. Vielmi surjozna pastaŭciesia da hetaha.
Mnie pra kožny hety vypadak albo Kačanava, albo Šejman u režymie anłajn, nie raźbirajučy, noč ci dzień, kažuć».
Nie dapuścić pratestoŭcaŭ u Minsk
«Minskaja vobłaść — heta pieršaje kalco abarony. Začynicie ŭsich u turmu. Turmu ja maju na ŭvazie — unutry rajona. Načalnik milicyi Kruhłaha nie pavinien nikoha z Kruhłaha vypuścić.
Z Klimavičaŭ nichto nie pavinien vyjechać. Kali kožny načalnik milicyi ŭklučycca… A kali kožny ź ich prafukaje, to pamnožcie heta na 140 rajonaŭ. Heta 1400 — taja krytyčnaja masa, jakaja ŭ Minsku budzie mieć značeńnie. Tamu što ź minskimi my ŭžo raźbiaromsia sami.
Ale kali kožny z vas «delehuje» pa 10 čałaviek u Minsk, to heta budzie vielmi niapravilna. Ja z usimi vami raspraŭlusia nie pa-dziciačy. Prosta pahražaju. Heta navat nie žart, ja surjozna kažu».
Usie pavinny na ŭsich stukać
«Prosta pieradaju zadaču hałoŭnakamandujučaha. Usio nasielnictva — našy, nie našy, apazicyjaniery, pamahatyja amierykanskich zialonych bieretaŭ — usie, usie pavinny na ŭsich stukać. Kali nie tyja ludzi zjavilisia… Kali niehry ŭ kamuflažy, z zaplečnikami, parašutami — kab my viedali pra heta praz nasielnictva. Pramaja kamanda hałoŭnakamandujučaha».
U dzień vybaraŭ
«Telehram-kanały (pryznanyja ekstremisckimi — zaŭv. NN) zaklikajuć hałasavać masava na 18:00, kab zastacca na ŭčastkach, błakavać i patrabavać padliku hałasoŭ pry ich. Viadoma, hetaha być nie pavinna.
Hladzicie sami, pa kolki čałaviek vy možacie dać im sabracca. Dzieści ŭ vioscy 5 čałaviek — heta ŭžo masavyja biesparadki, a na Kamiennaj Horcy piać — heta, moža, adzinočny pikiet.
Ale hałoŭnaje, nie dać sabracca natoŭpu, jaki potym budzie ciažka prabić mašynaj ź biuleteniami. Vaša zadača, kab jana biez achviar dajechała da rajonnaha vybarkama.
I možna pieršy pot ź iłba vycierci, kali ŭ rajon buduć dastaŭleny biuleteni, a ŭsie členy kamisii buduć dastaŭleny dadomu za žalezny płot i žalezny zamok biez paražeńniaŭ psichiki i cieła.
Šejman paabiacaŭ, što daść pa druhoj mašynie dla členaŭ učastkovych kamisij, jakija nie jeduć supravadžać biuleteni. Kab ni adzin člen kamisii nie viartaŭsia dadomu adzin, dryžučy ad strachu.
A to na jaho napaduć aktyŭnyja hramadzianie i buduć patrabavać: pryznavajsia na videa, što ty falsifikavaŭ, inakš my ciabie zabjom, tvaich dziaciej, tvoj dom spalim, mašynu spalim i h. d. Jany pavinny dabracca da chaty biez uździejańnia hetych ludzišak.
Ujavicie sabie, što jany buduć na kožnym učastku. Voś z hetaha i zychodźcie. Adpracoŭvajcie horšy varyjant. Usie ŭčastki trapiać pad pahrozu.
Tamu družyńnikaŭ, jakich vam udałosia nahrebci, adviadzicie na supravadžeńnie členaŭ vybarkamaŭ».
Pra mabilizacyju
«Treba ludziej u dapamohu — uziali z vajskovaj častki. U vajskovych častkach unutranych vojskaŭ padličyć usich, mabilizavać usich. U rajadździełach padličyć usich. Niedatyčnych u hety dzień być nie pavinna.
Pra zekaŭ, jakija padtrymlivajuć Cichanoŭskaha, i pra bunt na zonie
«Tyja viaźni, jakija byli ŭ kamandzie hramadzianina C., ab jakich nieadnarazova kazaŭ kiraŭnik dziaržavy, — 44 zeki, 13 recydyvistaŭ — mohuć mieć namier… A moža heta panty — nu čym zek moža dapamahčy ŭ revalucyi Cichanoŭskamu?
Nu a raptam? Tamu pavyzyvajcie ich i paspytajcie, jak režym, jak apieratyŭniki pracujuć, što z hetaj nahody kažuć.
Zrazumieła, ja ŭsich kanvojnikaŭ u Minsk vyklikaju, tam zvodnaha atrada niama ŭ zonu ŭvajści i pałkami pahładzić. Kulamioty na vyškach pastavim, kali na toje pajšło. Bo my tam unutranyja vojski kanfiskavali, zastałosia dva składy achovy.
U zonu SACHR i AMAP, jak u dobryja časy, nie pryšlu — jany tut zaniatyja, ale słych puścić, moža być, pryjdziecca, što my ich u barakach i spalim, kali na toje pajšło».
Aficyjnych kamientaroŭ MUS nakont hetaha zapisu nie było.
Kamientary