«Vyhladaje, sprabujuć kantralavać adtok nasielnictva». Čamu ŭ Biełarusi da hetaha času nie admianili zabaronu na vyjezd
Z 19 śniežnia 2020-ha biełarusy nie mohuć svabodna vyjazdžać z respubliki pa ziamli — nonsens dla jeŭrapiejskaj krainy. Tady, amal hod tamu, ułady tłumačyli svajo rašeńnie kłopatam pra zdaroŭje — nibyta, kab nie zavozili karanavirus. Ale z zakrytymi miežami ŭ Biełarusi, navat zhodna z aficyjnaj statystykaj, štodzionna ŭdvaja bolš vypadkaŭ zachvorvalnaści, čym u susiedniaj Polščy. U čym sapraŭdnaja pryčyna zabarony na vyjezd?
Aficyjnuju pazicyju pra začynienyja miežy dniami ahučyŭ padčas strymu eks-ministr zdaroŭja, a siońnia kiraŭnik Hrodzienskaha abłvykankama Uładzimir Karanik.
«Treba razumieć, što miaža na vyjezd zakryta tamu, što my razumiejem, što hramadzianie, jakija vyjechali, jany viarnucca, — kazaŭ Karanik. — My heta bačyli padčas pieršaj i druhoj chvali, kali stajała pytańnie, jak chutka viarnuć z zamiežža 8 tysiač našych turystaŭ i zabiaśpiečyć usich PŁR-testami i dynamičnym nazirańniem.
Tut abmiežavańnie nie absalutnaje. Jość padstavy, pa jakich hramadzianie mohuć spakojna vyjazdžać za miažu, viartacca z-za miažy. Dzieści z nazirańniem, dzieści biez nastupnaha nazirańnia».
Miedyki, ź jakimi my źviazalisia, kažuć, što z sapraŭdnym razmacham epidemii i masavymi zvalnieńniami piersanału siłaŭ daŭno nie chapaje na kantrol choć by ŭnutrybiełaruskich vypadkaŭ i kantaktaŭ.
Taksama pytańnie, čamu nie vypuskać praz naziemnuju miažu całkam vakcynavanych biełarusaŭ? A takich, navat zhodna z aficyjnaj statystykaj, u krainie niamała. Pytańnie adkrytaje.
Krynicy «Našaj Nivy» ź dziaržaŭnych orhanaŭ zaŭvažajuć, što naŭrad ci «kłopat ab zdaroŭi» — asnoŭnaja pryčyna zabarony vyjezdu. U realnaści jany palityčnyja.
«U biełaruskich praviłach dziaržaŭnaj dziejnaści, kab admianić niejkaje abmiežavańnie, niejki dziaržaŭny orhan pavinien vystupić ź inicyjatyvaj, pakul što takich niama, bo pra heta jašče nie vykazvaŭsia Łukašenka. Usie viedajuć, što jon ličyć siabie ekśpiertam u pytańniach miažy, tamu nie lezuć napierad», — tłumačyć nam krynica, blizkaja da Saŭmina.
«Vyhladaje, što zabaronaj na vyjezd sprabujuć kantralavać adtok nasielnictva. Bo isnuje apieratyŭnaja infarmacyja ab tym, što čarha ŭ vizavyja centry dla atrymańnia humanitarnych i nacyjanalnych viz krain ES zavobłačnaja — usio raśpisana na miesiacy napierad, — kaža naš surazmoŭca. —
Prezident Polščy paviedamiŭ, što ŭ jaho krainie asieli ŭžo 150 tysiač biełarusaŭ, nie jasna, ci praŭdzivaja heta ličba, ale što havorka prynamsi pra dziasiatki tysiač — heta padobna da praŭdy, prablema jość.
Aproč taho, zacikaŭlenyja orhany, najpierš Rada biaśpieki i KDB, u ramkach svajho paralelnaha ŭsprymańnia «biaśpieki» ličać, što va ŭmovach zakrytaha nieba płynia ludziej pa ziamli pry adkrytych hranicach mocna ŭzraście. Kantralavać ruch stanie ciažej, i ŭ krainu buduć pastupać «hrošy na praciah revalucyi».
A mahčymaści pahraničnaha kantrolu na ziamli nikoli nie byli zdavalniajučymi».
«Aznačeńnie Biełarusi jak vypalenaj ziamli mnie nie padabajecca». Manałoh biełarusa, jaki niadaŭna źjechaŭ z krainy9
Kamientary