27 lipienia 1990 hoda Viarchoŭny Saviet BSSR pryniaŭ Dekłaracyju ab dziaržaŭnym suvierenitecie.
Dekłaracyja abviaściła poŭny dziaržaŭny suvierenitet BSSR jak viaršenstva, samastojnaść i paŭnatu dziaržaŭnaj ułady respubliki ŭ miežach jaje terytoryi, pravamocnaść jaje zakonaŭ, niezaležnaść respubliki ŭ źniešnich adnosinach.
25 žniŭnia 1991 hoda Dekłaracyja ab dziaržaŭnym suvierenitecie atrymała status kanstytucyjnaha zakona, na padstavie jakoha byli ŭniesieny źmieny i dapaŭnieńni ŭ Kanstytucyju BSSR 1978 hoda.
19 vieraśnia 1991 hoda Viarchoŭny Saviet BSSR pryniaŭ zakon ab naźvie respubliki, u adpaviednaści ź jakim jana stała nazyvacca Respublikaj Biełaruś. Była ŭviedziena novaja dziaržaŭnaja simvolika — bieł‑čyrvona‑bieły ściah i hierb «Pahonia».
8 śniežnia 1991 hoda ŭ biełaruskaj uradavaj rezidencyi ŭ Viskulach Kamianieckaha rajona Bresckaj vobłaści kiraŭniki Biełarusi, Rasii i Ukrainy denansavali dahavor 1922 hoda ab utvareńni SSSR.
Novaja Kanstytucyja Respubliki Biełaruś była pryniata 15 sakavika 1994 hoda. Pa vynikach respublikanskaha refierendumu 14 maja 1995 hoda ruskaj movie byŭ nadadzieny status druhoj dziaržaŭnaj movy, hierb i ściah Biełarusi — źmienieny.
Z 1991 pa 1996 hady hałoŭnaje nacyjanalnaje śviata Biełarusi — Dzień niezaležnaści — adznačałasia 27 lipienia i było prymierkavana da daty pryniaćcia Dekłaracyi ab dziaržaŭnym suvierenitecie. Paśla prychodu da ŭłady Alaksandra Łukašenki padčas respublikanskaha refierendumu 1996 hoda było pryniata rašeńnie ab śviatkavańni Dnia niezaležnaści 3 lipienia, u dzień vyzvaleńnia Biełarusi ad niamiecka‑fašysckich zachopnikaŭ.
Na dumku Stanisłava Šuškieviča, jaki ŭ momant pryniaćcia Dekłaracyi ab dziaržaŭnym suvierenitecie zajmaŭ pasadu pieršaha namieśnika staršyni Viarchoŭnaha Savieta Biełaruskaj SSR, kali b uvieś hety čas u Biełarusi dziejničała Kanstytucyja 1994 hoda, «biełarusy žyli b zusim inakš». «Na žal, jaje źmianili ŭ bok viartańnia savieckich paradkaŭ. Siońnia ŭ Biełarusi čałaviek nie adčuvaje siabie paŭnavartasna ŭ hramadstvie. Nam ciažka vyjści na vulicu z pratestam, my abmiežavany ŭ atrymańni praŭdzivaj infarmacyi. Faktyčna, źmianiajučy Kanstytucyju, my stracili svabodu», — ličyć palityk.
Dekłaracyja ab dziaržaŭnym suvierenitecie BSSR stała «pieršym krokam u stanaŭleńni Biełarusi jak niezaležnaj dziaržavy i adradžeńni tysiačahadovaj biełaruskaj dziaržaŭnaści», adznačaje deputat Viarchoŭnaha Savieta BSSR 12‑ha sklikańnia Aleh Trusaŭ. «Za 19 hadoŭ ad BSSR, ab isnavańni jakoj nichto nie viedaŭ na Zachadzie, respublika prajšła šlach da niezaležnaj dziaržavy, jakuju viedajuć va ŭsim śviecie, u tym liku dziakujučy jaje kiraŭniku. I sam fakt, što Biełaruś pryznana va ŭsim śviecie, śviedčyć ab tym, što ŭ biełaruskaha naroda jość pierśpiektyva žyć svabodna, hodna i ščaśliva», — pierakanany Trusaŭ.
Kamientary