«Na bałotach nie davodziłasia być. Jak vyjdu, to rvanu». Jahor Marcinovič z-za krataŭ raskazvaje pra padarožžy

Pra ciahniki i čevapčyčy

Hladzieŭ «Aroł i reška» pra Bośniju. Uspomniŭ pra čevapčyčy! Pamiataješ hetyja afihienny kaŭbaski? Jak tolki dajechali da Sarajeva, sfotkalisia kala fantančyka i pajšli navaročvać u kafe porcyju. Pa-mojmu, šeść takich kiebabaŭ, upakavanych u lapiošku. Jašče i za simvaličnuju canu. Ja ž tolki paśla dapior, što «čevap» roŭna «kiebab». Prosta ŭ musulmanskim hučańni! Nu i ŭ maim rejtynhu samych smačnych straŭ — čevapčyčy prajhrajuć tolki płovu.

Jechać na ciahniku kruta, kali jość, na što pahladzieć z voknaŭ. Zahuhli na jutubie videa ź ciahnika Bar-Padhoryca. Praz usie bałkanskija hory. Afihienna! Ja jechaŭ unačy, tamu tolki častkova kajfanuŭ. Ale jość i dzionny varyjant dla turystaŭ.

I jašče kažuć, kruciacki maršrut Osła-Bierhien. Zvyčajna ekskursija kala f́jordaŭ kaštuje šalonyja hrošy, a tam pa canie zvyčajnaha ciahnika — niejkija 25-30 jeŭra. Šeść hadzin darohi, ci načnoj, ci dniom. Kali zmahu, katanusia.

A ciahnucca z chutkaściu čarapachi pa načnoj pustoj Ukrainie — tak sabie asałoda. Dla mianie zaŭsiody było šokam, što dahetul jość choć niejki popyt na ciahnik Maskva-Paryž. Kolki jon, try dni kradziecca pa Jeŭropie? Bilet kaštuje šalonyja hrošy. Tolki dla aerafobaŭ. Nu, albo dla tych, chto choča adčuć siabie ŭ pačatku XX stahodździa, kali alternatyvy nie było.

Pra načoŭku ŭ mašynie

Jość dva typy adpačynku, jakija ja nikoli nie sprabavaŭ, ale chacieŭ by niekali pravieryć, ci spadabajecca. Heta kiempinh i kruizy. Jak nazyvajecca mašyna, u jakoj i jeduć, i žyvuć? Karavan? Voś ja ŭjaŭlaju, jak kruta na im było b katanucca pa Isłandyi, pram pa ŭsim uźbiarežžy. Hatelaŭ tam amal niama, tamu alternatyvy mała. I voś tak zavalicca viasiołaj kampanijaj na tydzień, adarvaŭšysia ad cyvilizacyi. Tut ja na paru miesiacaŭ adarvaŭsia, ale heta inšaje.

Soramna pryznacca, ale adna z maich nierealizavanych maraŭ — pieranačavać ŭ padarožžy ŭ mašynie. I ja ŭščylnuju padyšoŭ da realizacyi. Uviesnu 2020 hoda płanavaŭ načoŭku ŭ arendavanym aŭto ŭ Hałandyi. Nie stolki dziela ekanomii, jak prosta dla ramantyki. Ale karanavirus, usie spravy abłom.

Vielmi zdorava, kali dzieciam pryščeplivajuć luboŭ da padarožžaŭ, dajuć mahčymaść ubačyć raznastajnaść śvietu. My z bratam i mamaj u daŭžezny aŭtobusny tur pa Jeŭropie da Paryža ažno paśla pieršaha majho kursa. Troški zajzdrošču novamu pakaleńniu, u jakoha mahčymaściaŭ jašče bolš.

Pra Prypiać i mary ab bałotach

Prypiać ja abažaju ŭ lubym vyhladzie, choć zvyčajnym, choć raźlitym. I kala Pinska lubavacca, i ŭ Turavie i z mastoŭ Mazyra. Samaja efiektnaja raka!

Vielmi šancuje toj miascovaści, dzie naradžajecca top-piśmieńnik, jaki piša pra svaich. U Kołasa voś Stoŭbcy, Pinsk i ŭsio, što pamiž imi. U Šamiakina — homielskija realii, u Mieleža taksama svajo Paleśsie. I sapraŭdy ž u tyja časy ŭ kožnaha rehijona była svaja admietnaść. Ciapier, z urbanizacyjaj, usio źmiašałasia i adnośnisna ŭnifikavałasia.

Prykra, što ja tak i nie pabačyŭ našy bałoty. Kažuć, vielmi pryhožaje biezdarožža za Stolinam (Mierlinskija bałoty, zdajecca). Nam z žonkaj ich raschvalvali baćki Ivana Naskieviča, jaki da niadaŭniaha času ŭznačalvaŭ SK. Jany jakraz žyvuć u Cierabličach, apošniaj vioscy pierad bałotami. Dumaju, praz paru hadoŭ u takija miaściny paciahnucca turysty, u tym liku i zamiežnyja. Tamu chočacca pabačyć hetyja cudy niekratnutymi.

Kruta, što vy źjeździli ŭ Hierviaty. A zaadno nie pahladzieli samy prykolny chosteł Biełarusi? Čytaŭ repartaž pra viaskovuju chatu ź vidam na AES. I realna da karanavirusa turysty tudy ciahalisia. Vielmi niezvyčajnaje miesca.

***

Našych kaleh Jahora Marcinoviča i Andreja Skurko vinavaciać u naniasieńni majomasnaj škody biez prykmiet raskradańnia (č. 2 art. 216 KK). Sens pretenzij u tym, što apłata za kamunalnyja pasłuhi pamiaškańnia była pa taryfach dla fizasob, a treba było płacić pa taryfach dla jurasob. Śledčyja naličyli, što za čatyry hady pradpryjemstvu «Minenierha» byŭ naniesieny ŭron u 3,5 tysiačy rubloŭ. Samo pradpryjemstva z pretenzijami nikoli nie źviartałasia.

Kali łaska, pišycie našaniŭcam:

SIZA-1, vuł. Vaładarskaha 2, 220030, h. Minsk

Skurko Andreju Hienadzieviču

Marcinoviču Jahoru Alaksandraviču

• 0
• 0
• 0
• 0
• 0
• 0
• 0
• 0