Prapampoŭku nafty spyniali, bo testavali novuju liniju trubapravoda ŭ abychod sankcyj?
Dniami «Homieltransnafta» abviaščała pra karotkaje spynieńnie prapampoŭki nafty pa naftapravodzie «Družba» ŭ napramku Polščy praz «pazapłanavy ramont» na adnoj z halinaŭ trubapravoda. Pastaŭki ŭžo adnavilisia, ale krynicy «Našaj Nivy» kažuć, što ramont moh być vyklikany testavańniem sistem pierad zaŭčasnym uviadzieńniem u rabotu novaj linii naftapravoda, jaki źviaža Mazyr i Navapołack.
Naftapravod «Homiel — Horki» — heta 207-kiłamietrovaja pieramyčka pamiž halinami «Unieča — Połack» i «Unieča — Mazyr — Adamava».
Inšymi słovami, hety provad maje złučyć paŭnočnuju i paŭdniovuju naftavyja mahistrali, pa jakich nafta pastupaje na «Naftan» i MNPZ adpaviedna.
«Asnoŭnaja meta prajekta — zrabić bolš hnutkaj łahistyku pastavak. Kali naftapravod zapracuje, jon dazvolić pierapampoŭvać syravinu miž Mazyrskim i Navapołackim naftapierapracoŭčymi zavodami, pastaŭlać jaje na «Naftan» […] z Čornaha mora praz Ukrainu, a taksama transpartavać naša čornaje zołata, jakoje zdabyvajecca ŭ Rečyckim rajonie», — tak apisvała mahčymaści naftapravoda dziaržaŭnaja presa ŭ dni jaho zakładki.
Sapraŭdy, mierkavałasia, što ŭviedzieńnie linii «Homiel — Horki» mocna źnizić zaležnaść ad rasijskaj naftavaj palityki, stvaryŭšy alternatyŭnyja maršruty pastavak u Navapołack z Adeskaha porta.
Ale ciapier naŭrad ci varta razvažać u hetych katehoryjach — paśla ŭviedzienych sankcyj i admovy ad prajekta reviersnych pastavak z Polščy situacyja ŭ naftavaj enerhietycy biazradasnaja.
Pry hetym krynicy ŭkazvajuć na mahčymaść abmienu syravinaj pamiž «Naftanam», jaki znachodzicca pad sankcyjami, i Mazyrskim naftapierapracoŭvajučym zavodam, jaki pad ich nie patrapiŭ.
«Trubapravod stanie najvažniejšym łahistyčnym źvianom, jakoje źviaža reziervuarnyja parki dvuch naftapierapracoŭčych zavodaŭ-hihantaŭ na poŭnačy i poŭdni Biełarusi. Jon dazvolić stvaryć stratehičny zapas syraviny dla krainy, zahruziŭšy hetyja pradpryjemstvy rabotaj i źniaŭšy ich zaležnaść ad roznaha rodu subjektyŭnych faktaraŭ, u tym liku fors-mažornych», — pisałasia pra mahčymaści trubapravoda ŭ 2020-m.
Zdać jaho płanavali ŭvosień 2022-ha, budavać pačali miesiac tamu. Buduje liniju «Homieltransnafta».
Krynicy «Našaj Nivy» źviartajuć uvahu, što budaŭnictva trubapravoda viadziecca ŭdarnymi tempami, i «zastajecca zrabić vobmal».
Na samoj «Homieltransnafcie» nam skazali, što zdača trubapravoda płanujecca ŭ krasaviku 2022-ha. A heta na paŭhoda raniej, čym raniej anansavałasia, taki temp —vialikaja redkaść dla dziaržaŭnych prajektaŭ.
Z čym źviazanaje paskareńnie budaŭnictva, nieviadoma, u kampanii nam skazali, što «usio zhodna z dakumientacyjaj».
Ciapier čytajuć
Ananimy — historyi biełarusaŭ, jakim prychodzicca šyfravacca, bo režym ličyć ich dziejnaść «kryminałam»10
Ananimy — historyi biełarusaŭ, jakim prychodzicca šyfravacca, bo režym ličyć ich dziejnaść «kryminałam»
Viadomy partret Kahanca akazaŭsia savieckim fejkam, zatoje znajšłosia adzinaje fota archieołaha Tatura. Razhadanyja fotatajamnicy Biełaruskaha muzieja ŭ Vilni
Kamientary