Prysiažnyja ZŠA apraŭdali padletka, jaki zabiŭ ludziej padčas biesparadkaŭ
Sud prysiažnych zasiadacielaŭ pryznaŭ padletka Kajła Rytenchausa nievinavatym u naŭmysnym zabojstvie dvuch čałaviek i pryčynieńni škody jašče adnamu padčas biesparadkaŭ paśla zabojstva ciemnaskuraha mužčyny ŭ Kienošy (štat Viskonsin) u žniŭni 2020 hoda, paviedamlaje telekanał CNN.
Niahledziačy na mierkavańnie abvinavačvańnia, što 18-hadovy Rytenchaus dziejničaŭ «złačynna i biezrazvažna», kalehija z 12 čałaviek prysiažnych vyrašyła, što padletak abaraniaŭsia.
Rašeńnie prysiažnyja zasiadacieli prymali na praciahu čatyroch dzion, paviedamlaje CNN. U hety čas jany vyvučali videa, na jakim bačna, jak Rytenchaus stralaje ŭ troch čałaviek.
Baćki adnaho z zabitych padletkam mužčyn, Entani Chubiera, aburylisia prysudam, pieradaje telekanał. Pa ich słovach, apraŭdańnie Rytenchausa aznačaje, što «ŭzbrojenyja hramadzianie mohuć spravakavać hvałt u lubym horadzie i stralać u ludziej na vulicach». Jany abiacali praciahnuć baraćbu za spraviadlivaje pakarańnie maładoha čałavieka.
23 žniŭnia ŭ Kienošy palicyjanty niekalki razoŭ strelili ŭ śpinu afraamierykancu Džejkabu Błejku, paviedamlaŭ CBS News. Heta adbyłosia tady, kali jon źbiraŭsia sadzicca ŭ mašynu. Palicyjanty padyšli da jaho ź pistaletami, i, jak tolki Błejk adčyniŭ dźviery mašyny, adzin z palicejskich siem razoŭ streliŭ u jaho. Jak pisała miascovaje vydańnie Kenosha News sa spasyłkaj na vidavočcaŭ, da incydentu Błejk sprabavaŭ raźniać bojku dźviuch žančyn. Paśla stralaniny ŭ jaho ŭ Kienošy pačalisia masavyja biesparadki. Dla ich likvidacyi Tramp nakiravaŭ u horad Nacyjanalnuju hvardyju ZŠA.
17-hadovaha Rytenchausa abvinavačvali ŭ tym, što padčas biesparadkaŭ 25 žniŭnia 2020 hoda jon dałučyŭsia da hrupy ŭzbrojenych ludziej ź vintoŭkaj AR-15, paviedamlaje CNN. Padletka pieraśledvaŭ Džozef Rozienbaum, jaki kinuŭ u jaho płastykavuju ŭpakoŭku. Rytenchaus zastreliŭ jaho i pasprabavaŭ źbiehčy z rajona. Tady jaho sprabavaŭ dahnać natoŭp ludziej, i Rytenchaus streliŭ u Entani Chubiera, jaki ŭdaryŭ jaho skiejtbordam, i paraniŭ Hajhu Hraskrojca, uzbrojenaha pistaletam.
Kamientary