ES vyłučaje dadatkovyja €30 młn dla padtrymki biełaruskaj demakratyčnaj supolnaści — a chto i jak ich budzie dzialić?
U ES płanujuć vydzielić dadatkovyja 30 miljonaŭ jeŭra dla padtrymki biełaruskaj demakratyčnaj supolnaści — u tym liku moładzi, niezaležnych ŚMI, pradpryjemstvaŭ i dziejačaŭ kultury, vymušanych pakinuć Biełaruś. Pra heta paśla sustrečy sa Śviatłanaj Cichanoŭskaj u siabie ŭ Tvitary paviedamiła kiraŭnica Jeŭrakamisii Ursuła fon der Lajen. Adnačasna z hetym na adras ofisa Cichanoŭskaj z boku prapahandy i nie tolki pačali hučać abvinavačvańni, što hetyja hrošy buduć patračanyja na isnavańnie ich kamandy i da «prostych» biełarusaŭ nie dojduć. A jak budzie? Spytali ŭ pradstaŭnika ofisa.
Daradca Śviatłany Cichanoŭskaj Franak Viačorka kaža, što ofis zajmajecca tolki palityčnaj kamunikacyjaj i nijakaha dačynieńnia da raźmierkavańnia finansavaj dapamohi z boku ES nie maje.
«U Jeŭrakamisii jość ułasnyja instrumienty realizacyi prajektaŭ: niedziaržaŭnyja arhanizacyi, ŚMI, univiersitety padajuć svaje zajaŭki, idei i prapanovy ŭ Jeŭrakamisiju napramuju (abo praz partnioraŭ). Naprykład, EHU moža źviarnucca z prośbaj padtrymać studentaŭ stypiendyjami, ŚMI — paprasić dapamahčy z cykłam filmaŭ ci sieryjaj tekstaŭ, a pravaabaroncy — z peŭnaj pracaj.
Dla hetaha jość adpaviednaje rehulavańnie i miechanizmy, kantrol spravazdačnasi. My viedajem, što jon dosyć žorstki, i mahčymaść karupcyi tut niemahčyma ŭjavić: za kožnaj kapiejkaj staić vializny kantrol».
Jašče adna z zadač ofisa — staracca ŭpłyvać na toje, kab vyłučanyja srodki najpierš traplali tym, chto pracuje ciapier u Biełarusi i dla jaje — arhanizacyjam, miedyja, NDA. U tym liku, kali kiraŭnictva ci ofisy vymušana znachodziacca ŭ inšych krainach.
«Naša zadača ŭ tym, kab hetaja dapamoha była maksimalna ełastyčnaj.
Sprava ŭ tym, što tradycyjna jeŭrapiejcy padtrymlivajuć adukacyjnyja prahramy, vydavieckija prajekty, analityčnuju pracu, praviadzieńnie mierapryjemstvaŭ. My ž starajemsia pierakanać, što siońnia najpierš treba źviartać uvahu na arhanizacyi, što padtrymlivajuć represavanych», — kamientuje Franak.
Franak pryznaje, što isnuje prablema z tym, kab hetyja hrošy dakładna dajšli da adrasata ŭ Biełarusi:
«Kab vyrašyć hetuju prablemu, siarod inšaha, my padymajem pytańnie, kab heta była kryptavaluta jak rabočy sposab dapamahać biełarusam. Ahułam, paŭtarusia, my nie možam upłyvać na raźmierkavańnie finansavaj dapamohi, ale starajemsia rabić tak, kab hetaj dapamohi chapała. Praŭda, pakul jaje niedastatkova: tyja ž ŚMI, arhanizacyi, jakija raniej byli samaakuplalnyja i pracavali za košt rekłamy, ciapier rabić hetaha nie mohuć».
Sam ofis na vyłučanuju Jeŭrakamisijaj dapamohu pretendavać nie płanuje.
Ciapier čytajuć
«Nie spadabalisia pradukty na palicy — i pišuć tudy esemesku». MUS nazvała Threads pahrozaj biaśpiecy i zajaviła pra zatrymańni21
«Nie spadabalisia pradukty na palicy — i pišuć tudy esemesku». MUS nazvała Threads pahrozaj biaśpiecy i zajaviła pra zatrymańni
«Viedajecie, Łukašenka nie prezident». Jany tak uśmichnulisia, kiŭnuli». Departavany z Hruzii Leŭ Michiejeŭ raskazaŭ, jak ź im abychodzilisia ŭ Armienii33
Kamientary