«Pracavać niama kamu». Na biełaruskaj čyhuncy — novaja chvala palityčnych zvalnieńniaŭ (dabralisia i da kiraŭnictva)
Na biełaruskaj čyhuncy praciahvajucca zvalnieńni. Dniami vakantnymi zrabilisia topavyja pasady Bresckaha adździaleńnia. Pa infarmacyi «Našaj Nivy», byłyja namieśniki načalnika adździaleńnia staralisia nie čapać padnačalenych, ad čaho sami trapili ŭ niamiłaść. I hety kiejs nie adziny ŭ krainie: dabralisia navat da haziety «Čyhunačnik Biełarusi». Pasprabavali daviedacca, što jašče adbyvajecca na čyhuncy i čym heta niebiaśpiečna.
«Adnojčy moža adbycca surjoznaje zdareńnie, ažno da krušeńnia ciahnika»
U raździele sajta «Kiraŭnictva» nasuprać pasady pieršaha namieśnika načalnika adździaleńnia i jašče troch namieśnikaŭ načalnika adździaleńnia Bresckaj čyhunki pakul stajać prabieły zamiest imionaŭ ludziej.
«Źniknieńnie» źviazvajuć z tym, što jany admovilisia zvalniać supracoŭnikaŭ pa palityčnych matyvach paśla taho, jak na pradpryjemstva pad hryfam «dla słužbovaha karystańnia» dasłali hatovyja śpisy ludziej, jakija prymali ŭdzieł u akcyjach pratestu.
Ličycca, što jany sfarmavanyja na asnovie bilinhu i apracavanych fota- i videamateryjałaŭ z archivaŭ kamier videanazirańnia.
Najaŭnaść hetych śpisaŭ paćviardžajuć dziejsnyja supracoŭniki čyhunki, jakija prymali poštu. Praŭda, ich dakładny źmiest nieviadomy — kožny kiraŭnik, jaki adkryvaje ich, fiksujecca i niasie piersanalnuju adkaznaść za raspaŭsiudžvańnie dadzienych.
My sprabavali źviazacca sa zvolnienym kiraŭnictvam Bresckaha adździaleńnia, ale jany zapužanyja i bajacca davać kamientaryi. Na samim pradpryjemstvie słuchaŭku nie ŭziali.
Pradstaŭnik rabočaha ruchu pa čyhuncy Siarhiej Vajciachovič paćviardžaje fakty zvalnieńniaŭ načalstva ŭ Bresckim adździaleńni i kaža, što jany nazirajucca pa ŭsioj krainie.
«Zvalniajuć mašynistaŭ, dyśpietčaraŭ, jakija siadziać u Minsku ŭ centry ŭpraŭleńnia pieravozkami. Chacia apošnija pavinny być niedatykalnymi: kab stać dobrym dyśpietčaram, treba spačatku hod piać adpracavać dziažurnym pa stancyi. Pa našaj infarmacyi, śpis dla prapracoŭki na «Biełčyhuncy» źmiaščaje kala 1,5 tysiačy proźviščaŭ.
Ciapierašniaja začystka na čyhuncy moža być źviazanaja ŭ tym liku z tym, što 23-24 listapada ŭ Maskvie prajšła narada z pradstaŭnikami dziaržaŭ-členaŭ ADKB nakont pytańnia stvareńnia adzinaj sistemy techničnaha prykryćcia čyhunak. Tam u asnoŭnym abmiarkoŭvali vajennyja ešałony z RF. I ŭ tym liku, jak mnie paviedamili, padymałasia pytańnie nakont začystki inšadumstva ŭ ekspłuatacyi. Siarod tych ludziej, chto zabiaśpiečvaje pieravozny praces. Kab na vypadak čaho, nie było nijakich źlivaŭ pra vajennyja sastavy i ŭsio takoje».
Siarhiej upeŭnieny, masavyja zvalnieńni — pryčyna taho, što na čyhuncy raście kolkaść vypadkaŭ parušeńnia biaśpieki ruchu ciahnikoŭ.
Tak, za šeść miesiacaŭ 2021 hoda naličyli 51 taki vypadak suprać 36 za anałahičny pieryjad 2020-ha.
«Na dniach na stancyi Mularaŭka (Homielskaje adździaleńnie čyhunki) na padjaznych šlachach adbyŭsia schod vahonaŭ na skidalnaj strełcy. Chapaje i inšych parušeńniaŭ biaśpieki ruchu: tolki za vychadnyja zafiksavanyja dva prajezdy na zabaronnyja sihnały śvietłaforaŭ. I, na moj pohlad, usio heta — vynik zvalnieńniaŭ, sychodu dobrych śpiecyjalistaŭ i niedachopu kadraŭ. Tendencyja takaja, što adnojčy moža mieć miesca surjoznaje zdareńnie, ažno da krušeńnia ciahnika», — kamientuje Siarhiej.
«Razoŭ dziesiać vyklikali ŭ milicyju»
Zachar (imia źmienienaje pa prośbie hieroja) adpracavaŭ hruzavym mašynistam u Viciebskim adździaleńni čyhunki amal 10 hod. Ën kaža, što na pracy chadzili čutki, što kiraŭnictvu pryjšła niejkaja papiera z zahadam zvolnić peŭny pracent ludziej, z astatnimi — pravieści hutarku i ŭziać «na ałovak», ale jon nie byŭ hatovy, što patrapić u pieršuju katehoryju.
«Prosta sa mnoj raniej pravodzili razmovy praz toje, što ŭ mianie była administratyŭka pa artykule 23.34 (usio tady abyšłosia štrafam). Paśla hetaha razoŭ dziesiać vyklikali ŭ milicyju. Adzin raz u prakuratury čytali lekcyju pra źmieny ŭ administracyjnym i kryminalnym kodeksach, potym niejak zaprašali na detektary chłuśni pravierycca.
A apošni raz, za paru tydniaŭ da ahučvańnia rašeńnia pra majo zvalnieńnie, mianie vyklikali ŭ kabiniet da namieśnika. Tam užo prysutničali ideołah, načalnik kadraŭ. Jany skazali, što na mianie pryjšła papiera z MUS za toje, što na avatarcy va «UKantakcie» ŭ mianie napisana «Svabodnaja Biełaruś». Dy na biełym fonie čyrvonym koleram. Ale sa mnoj prosta praviali prafiłaktyčnuju razmovu i skazali prybrać karcinku, i ŭsio».
Adnak užo ŭ kancy listapada Zachara vyklikali da načalstva znoŭ. Pierad uvachodam u kabiniet načalnika depo paprasili źniać vierchniaje adzieńnie i dastać z kišeniaŭ usiu techniku.
«U kabiniecie siadzieŭ naš hałoŭny ideołah z toŭstaj tečkaj, hartaŭ staronki. Ad jaho ja vysłuchaŭ, što takija, jak ja (z administratyŭkaj), nie pavinny na čyhuncy pracavać, što my nie vartyja takoj pracy. Ad jaho ja taksama pačuŭ, što zahad ab maim zvalnieńni pryjšoŭ z takich «viarchoŭ», što nichto mnie nie dapamoža i ŭ sud možna nie źviartacca.
Kali b ja nie pahadziŭsia zvolnicca pa pahadnieńni bakoŭ, abiacali niepryjemny zapis u pracoŭnaj knižcy. Nu, i pry hetym papiaredzili, što na dziaržpradpryjemstvach mnie niama čaho łavić bližejšym časam».
Praces «łupcavańnia» nazirała načalstva Zachara, ale pry hetym, jak jon kaža, nie pramoviła ni słova.
«U ich, vidać, nie było słovaŭ. U mianie za dziesiać hod usio ž sabrałasia niamała dypłomaŭ i hramat. Plus u nas i tak pracavać niama kamu, ludziej nie chapaje katastrafična: padrychtoŭka mašynista zajmaje nie adzin hod. A ideołah kaža: «Vy nam nie patrebnyja».
Pa infarmacyi Zachara, siarod jaho znajomych płanujuć zvolnić jak minimum jašče adnaho mašynista i pamočnika. Mnohija paśla zvalnieńniaŭ źjazdžajuć pracavać za miažu, inšyja pieravučvajucca i šukajuć miescy ŭ pryvatnych arhanizacyjach.
«Jany žyvuć adnym dniom»
Jašče adzin eks-supracoŭnik čyhunki Anton pracavaŭ u adnoj z asnoŭnych słužbaŭ kiravańnia darohi da kastryčnika (imia i kankretnaja pasada źmienienyja pa prośbie hieroja, tamu što jon ličyć svaju historyju paznavalnaj i pieražyvaje za siamju, što zastajecca ŭ Biełarusi, — zaŭv. red.). Anton raskazvaje, što pieršaja chvala razboru palotaŭ z načalstvam pačałasia jašče ŭ studzieni—lutym: jak minimum, heta aktualna dla adździeła čyhunki, dzie byŭ uładkavany mužčyna.
«Kahości adrazu paśla razmovy z načalnikam kadravaj pracy zvalniali pa «ŭłasnym žadańni», inšym nie praciahvali kantrakty, kamuści davali padpisać «pakajanny» list-papiaredžańnie z abiacańniem nidzie nie śviacicca i nie vykazvacca. Ale ich usio adno zvolnili ŭ druhuju chvalu — užo vosieńniu, razam sa mnoj.
Ci byŭ ja ŭ niejkich śpisach (jakija ŭsie abmiarkoŭvali, ale nichto ich nie bačyŭ) — nie viedaju, ale ja nikoli nie chavaŭ, što mnie nie padabajecca toje, što ŭ krainie adbyvajecca, chadziŭ na mirnyja akcyi pastajanna. Mahli, kali vyličvali pa bilinhu, i mianie vyličyć», — razvažaje Anton.
Paśla zvalnieńnia Antona ŭzialisia i za inšych jaho kaleh: z adździeła zvolnili jašče dvuch čałaviek. Heta minimum, pra jaki viadoma mužčynie.
«Vidavočna, što heta sistemnaja praca, a nie palityka adnoj asobnaj słužby. Śpisy spuskajucca źvierchu. Pry hetym mnie padajecca, što navat u kiraŭnictva čyhunki na hety momant niama i blizka razumieńnia, što i jak dalej budzie adbyvacca. Jak jany buduć nabirać na čyhunku ludziej, kim zamianiać zvolnienych. Pakul ich chvaluje tolki adno: pazbavicca ad tych, chto nie patrebny, ŭ adpaviednaści ź niejkimi pradstaŭlenymi śpisami. Jany žyvuć adnym dniom», — ličyć Anton.
Jak mučyli Cila Švajhiera i centry haradoŭ, kab stvaryć karcinku dla sudzimaha za machlarstva prateže Dźmitryja Baskava15
Kamientary