Namieśnik ministra zamiežnych spraŭ Biełarusi Valeryj Varaniecki kanstatuje aktyŭnaje raźvićcio prahramy «Uschodniaje partniorstva».
Pra heta jon zajaviŭ 30 lipienia na pasiadžeńni Pastajannaj kamisii Pałaty pradstaŭnikoŭ Nacyjanalnaha schodu Biełarusi pa mižnarodnych spravach i suviaziach z SND.
«Ciapier my prachodzim pieryjad arhanizacyjna‑techničnaha stanaŭleńnia hetaj prahramy», — skazaŭ namieśnik ministra.
Jon paviedamiŭ, što ŭ červieni ŭ Brusieli prajšli pasiadžeńni ŭsich čatyroch płatform hetaj prahramy.
Pieršaja płatforma zajmajecca pytańniami demakratyi i dziaržaŭnaha kiravańnia, pravoŭ čałavieka, druhaja płatforma — pytańniami ekanamičnaj intehracyi, treciaja — enierhietyčnaj biaśpiekaj. čaćviortaja — kantaktami pamiž ludźmi.
Ciapier usie krainy — udzielniki prahramy «Uschodniaje partniorstva» rychtujuć svaje prajekty, jakija jany raźličvajuć realizavać u ramkach hetaj prahramy. Biełaruś pieradała prajekty, u realizacyi jakich jana zacikaŭlena, udakładniŭ Valeryj Varaniecki.
U vieraśni‑kastryčniku buduć prachodzić nastupnyja pasiadžeńni płatform, na jakich płanujecca pryniać rašeńnie ab realizacyi prahram.
Rabočuju hrupu ad Biełarusi ŭ kožnaj z płatform u zaležnaści ad jaje tematyki ŭznačalvaje namieśnik kiraŭnika taho ci inšaha viedamstva.
Valeryj Varaniecki ŭznačalvaje biełaruskuju rabočuju hrupu ŭ płatformie, jakaja zajmajecca pytańniami demakratyi i dziaržaŭnaha kiravańnia, pravoŭ čałavieka.
