Smajlik-haŭniaška i bčb-vałasy. Zhadvajem samyja absurdnyja prysudy hoda
Biahučy hod uvojdzie ŭ historyju jak čas žorstkich prysudaŭ, jakimi karali ŭdzielnikaŭ pratestaŭ i apanientaŭ režymu. I absurdnych pratakołaŭ na pustym miescy. Zhadali tolki maleńkuju častku rašeńniaŭ suda, ad jakich adymała movu.
18 hod za pierasyłku fotazdymka
Dzianis Urad pracavaŭ u Hienštabie Uzbrojenych sił. U adzin z pracoŭnych dzion jon sfatahrafavaŭ list ministra ŭnutranych spraŭ ministru abarony i «adpraviŭ polskamu telehram-kanału».
Chłopca abvinavacili ŭ zdradzie dziaržavie i pryhavaryli da 18 hod źniavoleńnia. Jaho termin byŭ pieršym nastolki žorstkim siarod palityčnych da taho, jak asudzili Siarhieja Cichanoŭskaha i fihurantaŭ «spravy anarchistaŭ».
Dzianis Urad z žonkaj
Dva hady chatniaj «chimii» za smajlik-haŭniašku pad fotazdymkam milicyjaniera
Za kamientaryi ŭ internecie ŭ hetym hodzie sudzili aktyŭna, ale kab pradstaŭnika ŭłady źniavažyŭ smajlik — takoha śviet jašče nie bačyŭ. Suprać Volhi Krondy ź Ivacevič, jakaja adna haduje dzicia, raspačali kryminalnuju spravu pa artykule 369 Kryminalnaha kodeksa: dla hetaha dastatkova było pakinuć pad pastom pra milicyjaniera ŭ sacsietkach kamientaryj: «čałaviek…» i try emodzi z haŭniaškaj. Pasiadžeńnie pa spravie było zakrytym. Volzie prysudzili dva hady chatniaj «chimii».
«Chimija» za admovu zdavać kvateru pamočnicy prakurora
Viadomaja svaimi palityčnymi prysudami pamočnica prakurora Alina Kaśjančyk źjechała z arendnaj kvatery pa prośbie haspadyni Volhi Sinialovaj. Zdavałasia b, ničoha strašnaha — dziaŭčyna znajšła sabie novaje žytło ŭ Minsku.
Ale chutka suprać Volhi zaviali kryminalnuju spravu pavodle 190-ha artykuła («Parušeńnie raŭnapraŭja hramadzian»). Žančyna atrymała dva hady chatniaj «chimii».
Sutki za padziaku Maksimu Znaku sa sceny
Na ŭručeńni dypłomaŭ vypusknica jurfaka BDU Kaciaryna Vińnikava ŭ svajoj pramovie padziakavała jurystu-palitviaźniu Maksimu Znaku i zvolnienym vykładčykam.
Nieŭzabavaje ŭ jaje ŭ internacie adbyŭsia pieratrus, byŭ kanfiskavany noŭtbuk, dziaŭčynu zatrymali. Sudździa Maryna Klimčuk vyniesła rašeńnie: 15 sutak pa pieršaj častcy artykuła 24.23 KaAP za niezakonnaje pikietavańnie.
Try hady za sprobu spynić mašynu DAI, kab jana nie najechała na ludziej
Indyvidualnaha pradprymalnika, dyrektara kancertnaha ahienctva Horse&Vega Ivana Kaniaviehu abvinavacili adrazu pa troch artykułach KK za padziei ŭ Minsku z 9 na 10 žniŭnia: pa č. 1 art. 342 KK (aktyŭny ŭdzieł u hrupavych dziejańniach, jakija hruba parušajuć hramadski paradak), art. 364 KK (hvałt u dačynieńni da supracoŭnikaŭ milicyi), č. 1 art. 218 KK (naŭmysnaje źniščeńnie abo paškodžańnie majomaści).
Zhodna z tekstam abvinavačvańnia, mužčyna vyjšaŭ na prajeznuju častku na skryžavańni vulic Bahdanoviča-Kupały-Staražoŭskaj, što pryviało da parušeńnia pracy transpartu.
Taksama jon pieraškadžaŭ dziejnaści orhanaŭ pravaparadku, ź jaho boku zychodziła pahroza ŭžyvańnia hvałtu ŭ dačynieńni da ich — Ivan nanios minimum dva ŭdary rukoj pa słužbovym aŭtamabili DAI.
Ivan pryznaŭ, što ŭdzielničaŭ u niesankcyjanavanym masavym mierapryjemstvie, ale admaŭlaŭ lubyja złačynnyja namiery: pa mašynie DAI chłopiec pahrukaŭ, kab jana spyniłasia i nie zajechała ŭ natoŭp.
Niahledziačy na ŭsie arhumienty z boku abarony, Ivanu prysudzili try hady pazbaŭleńnia voli ŭ papraŭčaj kałonii ahulnaha režymu.
Pikietavańnie čyrvona-biełymi vałasami
U biełaruskich milicyjanieraŭ alerhija na spałučeńnie čyrvonaha i biełaha koleraŭ: u lubym ich spałučeńni jany paśla 2020 hoda bačać pikiety — u adzieńni, śniažynkach na aknie ci ŭpakoŭcy ad televizara LG na bałkonie. Paćvierdžańniem tamu stała čarhovaja absurdnaja historyja: supracoŭnikam milicyi nie spadabaŭsia koler vałasoŭ 19-hadovaj Viktoryi Lovinaj.
U hetym jany ŭbačyli padstavu dla zatrymańnia. Sudździa taksama «acaniła» fryzuru dziaŭčyny, znajšoŭšy jaje «cikavaj i aryhinalnaj» i aštrafavała za heta na 2320 rubloŭ pa artykule 24.23 KaAP.
Realnyja terminy za prafiesijnuju dziejnaść žurnalistcy i doktaru
U sakaviku 2021 hoda žurnalistka Kaciaryna Barysievič była asudžanaja na šeść miesiacaŭ kałonii za artykuł na «Tutbaj» (ciapier pryznany ekstremisckim), u jakim jana raspaviała, što zabity Raman Bandarenka byŭ ćviarozym.
Za heta ž pakarali doktara BCHMD Arcioma Sarokina (na dva hady pazbaŭleńnia voli z adterminoŭkaj na hod). Na dumku prakuratury, jany vydali miedycynskuju tajamnicu ab stanie Bandarenki, što paciahnuła ciažkija nastupstvy: «pavyšeńnie napružanaści ŭ hramadstvie i stvareńnie atmaśfiery niedavieru da kampietentnych dziaržaŭnych orhanaŭ».
Kaciaryna adbyła svoj termin i vyjšła na volu ŭ mai, kali partał, dzie jana pracavała, užo byŭ dzień jak razhromleny. My parazmaŭlali ź joj praz hod paśla zatrymańnia.
Prysud zastrelenamu Hienadziu Šutavu
Hienadź Šutaŭ paciarpieŭ padčas akcyi pratestu ŭ Breście 11 žniŭnia 2020 hoda i pamior u vajennym špitali praz vosiem dzion. U mužčynu streliŭ kapitan Sił śpiecyjalnych apieracyj Raman Haŭryłaŭ.
Jak tak zdaryłasia? Pa viersii śledstva, Hienadź Šutaŭ razam ź siabram Alaksandram Kardziukovym padyšli da vajskoŭcaŭ Ramana Haŭryłava i Arsienija Halicyna, jakija prybyli ŭ Brest «dla achovy hramadskaha paradku», i pačali vykazvać im pretenzii nakont pieraśledu ŭdzielnikaŭ pratestu. U abvinavačvańni hučyć, što brastčanie nanosili ŭdary mietaličnaj truboj i sprabavali zavałodać zbrojaj.
Adzin z pravaachoŭnikaŭ uspryniaŭ dziejańni mužčyn «jak realnuju pahrozu žyćciu i zdaroŭju», u vyniku kanfliktu i prahučaŭ streł — Hienadź byŭ paranieny ŭ hałavu i pamior.
Abodvuch fihurantaŭ pryznali vinavatymi ŭ supracivie (Šutava — paśmiarotna). Kardziukova, da taho ž, — u zamachu na zabojstva siłavika. Ën atrymaŭ 10 hod kałonii.
224 dni aryštu na dvaich za reposty ŭ pryvatnaj pierapiscy
U hetym hodzie sudy nie paśpiavali vynosić novyja ekstremisckija «naminacyi», a siłaviki ŭzialisia za reposty ŭ Telehramie i inšych sacsietkach z krynic, pryznanych takimi. Adnoj z samych hučnych spraŭ u hetaj płyni stali bieśpierapynnyja sudy nad siamiejnaj paraj — Nastaśsiaj Krupienič-Kandraćjevaj i jaje mužam Siarhiejem. Ich zatrymali ŭ lipieni 2021-ha i z taho času nie vypuskali ź izalatara, vypisvajučy novyja pratakoły.
Na pačatku listapada paru asudzili na sutki čarhovy raz, ale paśla niečakana dla ŭsich adpuścili z Akreścina. Nastaśsia i Siarhiej amal adrazu pakinuli Biełaruś. My rabili ź imi vialikaje intervju, dzie jany padrabiazna raspaviali pra ŭsie pieražytyja žachi.
Piać sutak aryštu za śviečku ŭ aknie na hadavinu zabojstva Bandarenki
Supracoŭnica Akademii navuk Biełarusi Natalla Kapyćka 12 listapada zapaliła śviečku na aknie ŭ pamiać ab zabitym hod tamu Ramanie Bandarenku. Jak patłumačyŭ jaje muž: «Milicyjaniery ŭ toj viečar fotkali ŭsie vokny sa śviečkami. Jeździli i fotkali».
Natallu vyklikali ŭ adździaleńnie dla tłumačeńniaŭ i aryštavali. Heta stała čarhovym prysudam za salidarnaść biełarusaŭ.
Braty-bliźniaty pryjšli pracavać u milicyju. Adzin ź ich pierapłyŭ raku i ŭciok ź Biełarusi, kab nie zajmacca palityčnymi spravami. Pahutaryli ź im1212
Kamientary