Kiraŭnik MZS Abchazii Siarhiej Šamba ličyć niekarektnymi zajavy MZS Biełarusi ab nieabchodnaści vykanańnia biełaruskimi hramadzianami hruzinskich zakonaŭ u Abchazii
Kiraŭnictva Abchazii razumieje pryčynu, z‑za čaho Ministerstva zamiežnych spraŭ Biełarusi rekamiendavała svaim hramadzianam vykonvać hruzinskija zakony pry naviedvańni Abchazii i Paŭdniovaj Asiecii, ale ličyć, što hetyja zajavy byli zroblenyja niekarektna, skazaŭ RIA Novosti kiraŭnik MZS Abchazii Siarhiej Šamba.
«Na žal, pradstaŭnik MZS Biełarusi nie vielmi karektna vykazaŭsia. Navat Hiermanija i Polšča, jakija taksama zrabili padobnyja rekamiendacyi, zrabili heta ŭ bolš miakkaj formie, naprykład, hiermanskija dypłamaty nie rekamiendavali svaim hramadzianam naviedvać Hruziju paśla Abchazii», — zaŭvažyŭ jon.
Pavodle słoŭ Siarhieja Šamby, u Suchumi razumiejuć, što «zajava biełaruskaha dypłamata była vyklikanaja abstavinami, u jakija pastaviła hramadzian Biełarusi hruzinskaje kiraŭnictva, kali pačało zatrymlivać i aryštoŭvać ludziej z‑za taho, što jany pierad hetym pabyvali ŭ Abchazii».
«I jany pavinny byli, kaniešnie, papiaredzić svaich hramadzian ab hetaj niebiaśpiecy, ale zrabili heta nie vielmi taktyčna. Ale ŭžo jość zajavy MZS Biełarusi ab tym, što pytańnie ab pryznańni Abchazii nie źniataje», — skazaŭ Siarhiej Šamba.
Nahadajem, 22 lipienia MZS Biełarusi «pierakanaŭča rekamiendavaŭ» biełarusam uličvać pałažeńni hruzinskaha zakanadaŭstva pry płanavańni pajezdak u Abchaziju i Paŭdniovuju Asieciju. «Ujezd zamiežnych hramadzian u Abchaziju i Paŭdniovuju Asieciju dapuskajecca vyklučna z nakiravańnia Zuhdzidskaha i Haryjskaha municypalitetaŭ. Praniknieńnie ŭ Abchaziju i Paŭdniovuju Asieciju z usich kirunkaŭ bieź śpiecyjalnaha dazvołu hruzinskich uładaŭ zabaraniajecca i karajecca ŭ adpaviednaści z Kryminalnym kodeksam Hruzii», — adznačałasia ŭ paviedamleńni pres‑słužby MZS.
Jak raniej paviedamlaŭ BiełaPAN, viadoma jak minimum pra dvoje hramadzian Biełarusi, u jakich uźnikli prablemy pry ŭjeździe ŭ Hruziju z‑za taho, što raniej jany naviedvali Abchaziju bieź śpiecyjalnaha dazvołu.
Rasija pryznała niezaležnaść Abchazii i Paŭdniovaj Asiecii ŭ kancy žniŭnia 2008 hoda. Akramia Rasii, niezaležnaść Abchazii i Paŭdniovaj Asiecii pryznała tolki Nikarahua. Hruzija ŭ dakaz na heta razarvała dypłamatyčnyja adnosiny z Rasijaj i abjaviła Abchaziju i Paŭdniovuju Asieciju akupavanymi terytoryjami.
Zvaroty Abchazii i Paŭdniovaj Asiecii z prośbaj pryznać ich niezaležnaść pastupili ŭ biełaruski parłamient u kancy 2008 hoda. Hetym časam parłamienckija kamisii ich vyvučajuć.
Pamior paet Uładzimir Karyzna, aŭtar słoŭ da ciapierašniaha dziaržaŭnaha himna Biełarusi8
Pamior paet Uładzimir Karyzna, aŭtar słoŭ da ciapierašniaha dziaržaŭnaha himna Biełarusi
Viadomy partret Kahanca akazaŭsia savieckim fejkam, zatoje znajšłosia adzinaje fota archieołaha Tatura. Razhadanyja fotatajamnicy Biełaruskaha muzieja ŭ Vilni
Kamientary