Aleh Trusaŭ: Tavarystva biełaruskaj movy adnovicca pry pieršaj mahčymaści
Historyk i palityk, adzin sa stvaralnikaŭ i kiraŭnikoŭ zakrytaha ŭładami Tavarystva biełaruskaj movy imia Francyska Skaryny Aleh Trusaŭ raspavioŭ pra heta «Radyjo Racyja»: «U našaj dziejnaści amal ničoha nie źmianiłasia, jak my havaryli pa-biełarusku, tak my i budziem havaryć. Jak zmahalisia za biełaruskija škoły, tak i budziem zmahacca».
Aleh Trusaŭ — historyk i palityk, były deputat Viarchoŭnaha Savieta 12 sklikańnia, adzin ź lidaraŭ Biełaruskaj sacyjał-demakratyčnaj partyi (Hramada). Tamu i śpiektr temaŭ, jakija jon abmierkavaŭ u razmovie z žurnalistami — šyroki: ad losu Tavarystva biełaruskaj movy da losu krainy.
— Adbyŭsia čarhovy, 21-y źjezd Biełaruskaj sacyjał-demakratyčnaj partyi «Hramada». Što cikava, u krainie nie ścichajuć represii, ale partyjam dazvalajuć praciahvać dziejnaść u adroźnieńnie ad hramadskich arhanizacyj, jakija amal što ŭsie całkam źniščanyja. Čamu?
— Treba skazać, što hramadskija arhanizacyi byli bolš šmatlikija. Kali ŭ TBM było jak minimum 6,5 tysiačy, to ŭ našaj partyi ad siły trochi bolš za tysiaču. Tamu pieršy ŭdar naniesieny pa hramadskich arhanizacyjach, bo jany značna bolš upłyvovyja, i mieli bolš šyrokija sietki i struktury. Što tyčycca partyj, to jany nievialikija i lepš kantralujucca ŭładami. Čym mienš ludziej, tym praściej kantralavać. Chutčej za ŭsio, partyi jašče pakidali, bo dumali, što źmieniać kanstytucyju, buduć partyjnyja śpisy. A hramadskija arhanizacyi byli najbolš masavyja, tam byli dziasiatki tysiač hramadzian, kali ŭsich skłaści. Čamu? Bo ich šmat, jany adzin adnoha viedajuć, i jany pradstaŭlajuć niebiaśpieku padčas vybaraŭ i akcyjaŭ.
— Što rabić hetym zakrytym arhanizacyjam? Pahadzicca z tym, ci znoŭku pačniecca praces adnaŭleńnia?
— Nie viedaju, jak inšyja arhanizacyi, ale siabry TBM jak pracavali na Biełaruś, tak i pracujuć. U našaj dziejnaści amal ničoha nie źmianiłasia, jak my havaryli pa-biełarusku, tak my i budziem havaryć. Jak zmahalisia za biełaruskija škoły, tak i budziem zmahacca. Straciła ŭłada, bo ŭ nas byŭ ofis, i my płacili ŭładam 2000 rubloŭ, ciapier prosta nie budziem płacić. Pry pieršaj mahčymaści my adnovimsia.
I ŭvohule, ličyć Aleh Trusaŭ, usia Biełaruś vielmi chutka akryjaje i ŭzdymiecca, kali pazbavicca inśpiravanaha z Uschodu cisku.
Kamientary