U Nacbanku raskazali, jak časta machlary kraduć hrošy ŭ biełarusaŭ u internecie
Pa vynikach 2021 hoda milicyja adrapartavała, što ŭpieršyniu za piać hod skaraciłasia kolkaść zarehistravanych kibierzłačynstvaŭ. Siłaviki nie ŭdakładniajuć ličby, ale ich publikuje Nacbank. Tak, letaś było zarehistravana 12,3 tysiačy kibierzłačynstvaŭ, i heta prykładna adpaviadaje ŭzroŭniu 2020 hoda.
Najbolš raspaŭsiudžany typ złačynstva — višynh, kali machlary telefanujuć pad vyhladam supracoŭnikaŭ banka i vymańvajuć kanfidencyjnuju infarmacyju va ŭładalnikaŭ kartak abo prosiać ich ździejśnić peŭny płaciož. I kolkaść takich faktaŭ za hod skaraciłasia ŭsiaho na 2,4%.
A voś kolkaść złačynstvaŭ na placoŭcy «Kufar», na jakija masava skardzilisia biełarusy, skaraciłasia na tracinu. Tym časam raście kolkaść złačynstvaŭ, źviazanych z vykarystańniem fišynhavych sajtaŭ, bolšaść ź ich — resursy, jakija imitujuć sistemy dystancyjnaha absłuhoŭvańnia biełaruskich bankaŭ.
Nacbank płanuje dapracavać prajekt ukaza prezidenta «Ab niekatorych mierach pa supraćdziejańni machlarstvu ŭ bankaŭskim siektary». Meta — naładzić supracoŭnictva pamiž Nacbankam, bankami i pravaachoŭnymi orhanami, jakija zajmajucca supraćdziejańniem machlarstvu. Taksama pavinny być vyznačanyja miechanizmy abmiežavańnia raschodnych apieracyj pa rachunkach, jakija machlary vykarystoŭvajuć dla atrymańnia dachodaŭ.
Bankaŭski kodeks budzie dapoŭnieny źmienami ŭ častcy kibierbiaśpieki. Nacbank maje aŭtymatyzavanuju sistemu apracoŭki incydentaŭ infarmacyjnaj biaśpieki, płanujecca, što dostup da bazy atrymajuć i inšyja zacikaŭlenyja baki, zadača jakich — praduchilać kibierzłačynstvy.
Što ŭskładniaje baraćbu z kibierzłačynnaściu ŭ Biełarusi? U tym liku i palityčnaja situacyja. Niepryznańnie palityčnaj subjektnaści viadzie da taho, što zamiežnyja dziaržavy admaŭlajucca pradastaŭlać Biełarusi pravavuju dapamohu, złačyncy pra heta viedajuć i karystajucca momantam. Na heta źviartaŭ uvahu śledčy Centralnaha aparata SK, jaki śpiecyjalizujecca na spravach, źviazanych ź infarmacyjnaj biaśpiekaj. Jość i inšyja prablemy.
U 2014 hodzie ŭ Biełarusi byli źmienienyja praviły rehistracyi elektronnych kašalkoŭ. Heta pryviało da taho, što karystalniki pierajšli na zamiežnyja płaciežnyja sistemy. Tak administratyŭny barjer uskosna ŭskładniŭ pracu biełaruskich śledčych z kibierzłačynstvami: adsačyć złačynnyja apieracyi i datyčnych da ich asob stała składaniej.
Kamientary