«Nichto nie choča iści ŭ vajenkamat i tym bolš vajavać». U «DNR» i «ŁNR» prachodziać abłavy na mužčyn pryzyŭnoha ŭzrostu
Žychary Łuhanska i Daniecka paviedamlajuć, što vajskovaja kamiendatura pačała zabirać z vulic haradoŭ mužčyn pryzyŭnoha ŭzrostu, piša «Svaboda».
Da ludziej padychodziać, prosiać u ich pašparty, paśla čaho sadziać u aŭtobusy i viazuć na punkty zboru dla dalejšaj adpraŭki ŭ vojska. Rejdy pa mužčyn pryzyŭnoha ŭzrostu taksama prachodziać pa kvaterach, paviedamlajuć «Donbas. Riealii», jakim udałosia pahavaryć z žycharami sieparatysckich utvareńniaŭ Danbasu na ŭmovach ananimnaści.
Usieahulnaja mabilizacyja ŭ tak zvanych «DNR» i «ŁNR» była abjaŭlenaja 19 lutaha. Kiraŭnik «DNR» Dzianis Pušylin źviarnuŭsia da ŭsich mužčyn, jakija žyvuć na terytoryi sieparatystaŭ i «zdolnyja trymać u rukach zbroju», z zaklikam abaranić «svaje siemji, Danbas i ŭsich rasijskich ludziej». Anałahičny zvarot vypuściŭ i kiraŭnik «ŁNR» Pasiečnik.
Žychary paviedamlajuć, što z «ŁNR» zabaroniena vyjazdžać usim mužčynam va ŭzroście ad 18 da 55 hadoŭ, a pa kvaterach miascovym žycharam raznosiać pozvy ab «usieahulnaj mabilizacyi».
Vajskoŭcam taksama dazvolena kanfiskoŭvać u hramadzian i pradpryjemstvaŭ nieabchodnyja dla patreb abarony transpartnyja srodki i majomaść.
Taksama ludziam dasyłajuć SMS-paviedamleńni z zaklikami «stať na zaŝitu svojeho doma i otiečiestva». Płakaty anałahičnaha źmiestu taksama vyviesili na vulicach Daniecka.
«Pryjazdžajuć pa damach, i mužčyn zabirajuć siłaj. U Telmanavie (pasiołak haradskoha typu ŭ Danieckaj vobłaści pad kantrolem «DNR» z nasielnictvam kala 4 tysiač čałaviek) usich chłopcaŭ zabrali, žančyna na rynku tolki što raskazała, — piša adzin z žycharoŭ «DNR». — Našy znajomyja raspaviali, što apiekuna niepaŭnaletniaha dziciaci ranicaj pryjechali i zabrali z kvatery ŭ Daniecku. Dzicia 15 hadoŭ adno doma zastałosia. Da nas tolki što kvartalnaja prychodziła, susieda pytałasia. Dziakuj bohu, jon nie tut ciapier».
Jašče adna žycharka «DNR» raskazała, što supracoŭniki «Narodnaj milicyi DNR» dajuć mužčynam minimum času na zbory, kali zastanuć ich doma.
«Adrazu va UAZik zabirajuć i źjaždžajuć. Rečy chto paśpieŭ — pa minimumie ŭziaŭ, heta toje, što pačuła. Tut nichto nie choča iści ŭ vajenkamat i tym bolš vajavać», — raskazała jana.
«Siabar vyjšaŭ pa chleb. Padlacieli, kažuć: siadaj i pajechali. Jon kaža: kudy? Na front. Pašancavała, što 16 hadoŭ, baćka ŭ adździeł zjeździŭ i zabraŭ jaho», — apaviadaje jašče adzin žychar Daniecka ŭ miascovym pabliku.
U internecie taksama zjavilisia videa, na jakich mužčyn u Łuhansku i inšych haradach, padkantrolnych sieparatystam, zatrymlivajuć na vulicy.
Łuhansk siejčas. Mužčin zadierživajut na ulicie i otpravlajut vojevať protiv Ukrainy pic.twitter.com/vX27bk2DRU
U apošnija hady ŭłady «DNR» i «ŁNR» usimi siłami sprabavali pryvabić miascovych mužčyn na «słužbu» u miascovaje vojska, abiacajučy vysokaje pa miascovych mierkach zabieśpiačeńnie. Ale achvotnikaŭ było niašmat: na heta značna ŭpłyvała toje, što sałdaty ŭ takich padraździaleńniach hinuli z pryčyn chałatnaha staŭleńnia da ich kamandziraŭ.
Krynicy taksama paviedamlajuć, što ŭ Daniecku na vulicach znoŭ zjavilisia rasijskija vajskoŭcy: ich apaznajuć pa charakternaj havorcy.
Pavodle danych dančanina-vidavočcy, jany chodziać pa horadzie ŭ kamuflažy biez apaznavalnych znakaŭ: u asnoŭnym heta vysokija, mocnyja mužčyny, mahčyma, śpiecnaz. Aficyjna Rasija nie paviedamlała ab adpraŭcy svaich padraździaleńniaŭ na terytoryju «DNR» i «ŁNR», adnak ściahnuła da miežaŭ Ukrainy mahutnuju hrupoŭku kolkaściu kala 150 tysiač čałaviek.
Što adbyvajecca vakoł Ukrainy ŭ paniadziełak, 21 lutaha ANŁAJN
Minabarony RB: «Biełaruś i Rasija vyrašyli praciahnuć sumiesnuju pravierku sił reahavańnia»
Ciapier čytajuć
Babaryka pra siabie ŭ 2020-m: Heta nie naiŭnaść. Nie dumaju, što takoha kryvažernaha scenara niechta čakaŭ44
Kamientary