«Situacyja na miažy paniki». Biznes u transie, bo ni z Rasijaj, ni ź Jeŭropaj pracavać stanovicca niemahčyma
Sankcyi, jakija ŭviali z pačatku vajny, užo adbilisia na pradprymalnikach i kampanijach. «Bank, ź jakim pracujem z rasijskaha boku, nie harantuje zachavanaść pieraviedzienych hrašovych srodkaŭ», — dzielicca adzin z surazmoŭcaŭ. «Usie kampanii, ź jakimi pracuju, prypyniajuć supracoŭnictva», — kaža inšy. Sami rabotniki praź psichałahičny stan niepracazdolnyja. Voś jakuju karcinu my majem na siońnia.
«Usie kampanii, ź jakimi pracuju, prypyniajuć supracoŭnictva»
«Situacyja na miažy paniki», — tak apisvaje abstanoŭku adzin z našych surazmoŭcaŭ. Jon indyvidualny pradprymalnik, navučaje supracoŭnikaŭ kampanij anhlijskaj movie.
«Usie kampanii, ź jakimi ja pracuju, prypyniajuć supracoŭnictva, i tłumačać heta tym, što na zarobki ŭ sakaviku nie chopić. Tyja, chto pracuje pa damovach u valucie, akazalisia «kala izalacyi», i prytok finansaŭ vyčerpvajecca.
Tyja ž, chto pracuje ź biełaruskim rynkam, prosta ŭ transie, pakolki pa starych damovach składana padniać canu, a kurs i staŭki pa kredytach dla jurasob ich prosta źniščajuć. Asabliva ciažka praz toje, što zusim niadaŭna ŭsie padymali ceny praź źmieny ŭ Padatkovym kodeksie.
Ja nie kažu pra toje, što mnohija rabotniki banalna niedziejazdolnyja, pakolki ŭ žachu ad situacyi va Ukrainie, u mnohich tam svajaki, usie pieražyvajuć z-za mahčymaj mabilizacyi», — dzielicca mužčyna.
Sa žniŭnia mnohija jaho zaniatki byli pieraviedzienyja ŭ anłajn. Častka kampanij za miažoj, i niezrazumieła, jak ciapier vieści ź imi raźliki.
«Spyniŭ prodažy ŭ opt i roźnicu»
U inšaha našaha surazmoŭcy mikrapradpryjemstva pa prodažy instrumientaŭ. Tavary jon zakuplaje ŭ Hiermanii. Adhruzki pakul iduć, ale prodažy ŭ opt i roźnicu pradprymalnik časova spyniŭ — praz rost kursaŭ valut.
«Rachunki novyja nie vystaŭlajem, zakazy praź internet-kramu taksama nie prymajem. Mnohija ŭžo, kaniečnie, pieraacanili tavar, ale kurs jeŭra nie adpaviadaje rečaisnaści, strymlivajecca», — miarkuje mužčyna.
Pa jaho padlikach, canu na instrumienty ciapier treba pavyšać na 50%, kali nie bolš. Jon raskazvaje pra toje, jak pracujuć u hetych umovach niekatoryja jaho kalehi.
«Raniej rachunak-faktura vystaŭlałasia z terminam dziejańnia dva-try pracoŭnyja dni. Ciapier niekatoryja firmy vystaŭlajuć jaho z 11 da 14 hadzin, pakul iduć tarhi na biržy.
Adhruzki tolki pa pieradapłacie. Chtości spyniaje dastaŭku tavaraŭ paśla 4 sakavika», — kaža mužčyna.
«Klijent pačaŭ panikavać u piatnicu»
Alaksandr — ajcišnik, pracuje jak IP na amierykanski startap.
«Klijent pačaŭ panikavać u piatnicu, što nie zmoža mnie płacić. Vyrašyŭ adkryć IP i rachunak u banku ŭ Hruzii addalena. Apłaciŭ pasłuhi jurydyčnaj firmy, apraviŭ davieranaści. Paśla hetaha ŭbačyŭ, što z paniadziełka dva hałoŭnyja banki TBS i «Bank Hruzii» nie adkryvajuć rachunki klijentam ź Biełarusi i Rasii. U firmie potym heta paćvierdzili», — raskazvaje mužčyna.
Inšych varyjantaŭ jon pakul nie viedaje — zanadta mała času prajšło, kab praličyć. U inšyja časy «zapasnym aeradromam» była b Ukraina ź jaje servisam dziaržaŭnych pasłuh «Dija», ale ciapier heta niemahčyma.
«Mahčyma, varyjantam budzie Polšča, ale ŭ mianie niama vizy, nie viedaju, jak jaje ciapier rabić. Tearetyčna, vyjście — heta kryptavaluta stablecoin, ale jasna, što nie kožny klijent zachoča tak płacić i raźbiracca ŭ hetym», — razvažaje Alaksandr.
Mužčyna dadaje, što całkam razumieje ŭvod sankcyj, kab skončyć vajnu.
«Šmat razoŭ byŭ va Ukrainie, nikoli nie bačyŭ nacyjanalistaŭ. U mianie repietytar z Čarnihava, ich bambiać «Hradami». U niadzielu adpisvałasia, što arhanizm adklučyŭsia, zasnuła i praspała dźvie sireny».
«Usie scenaryi kiepskija ci vielmi kiepskija»
U Juryja dva prajekty, źviazanyja z vytvorčaściu i budaŭnictvam novaha zavoda. Abodva z pryciahnieńniem zamiežnych hrošaj — z Rasii i ES. U vyniku sankcyj, kaža mužčyna, realizoŭvać ich niemahčyma.
«My zakryvajem adzin prajekt (pa pabudovie zavoda), i skaračajem da minimalnaj aktyŭnaści druhi.
Płaciažy pa «Śbierbanku» nie prachodziać u pryncypie, ceny na tavary pastaŭščyki pačali pierapisvać užo ŭ paniadziełak, i my nie viedajem i nie ŭjaŭlajem sabie ekanamičnyja raźliki pa vyhadnaści dziejnaści prajekta ŭ budučym. Usie scenaryi kiepskija ci vielmi kiepskija», — ščyra kaža mužčyna.
Pa pracy ź ES nadziei ŭžo niama. Što da prajekta z Rasijaj, mahčyma, tam udasca znajści novyja schiemy pracy.
«Prablema, što ciapier naš bank, ź jakim pracujem z rasijskaha boku, kaža, što nie harantuje zachavanaść pieraviedzienych hrašovych srodkaŭ. Płaciož jany adpraviać, ale što jon da nas dojdzie, niama harantyi. Padviešvać hrošy na niejkich rachunkach-karespandentach my nie možam. Ciapier prapracoŭvajem schiemu pa «Alfa Banku» ci niečym inšym».
Budaŭničyja adździełačnyja materyjały Juryju pastaŭlali z Rasii i ES. Ceny na ich užo vyraśli na 50%.
«Staŭki pa pieravozkach mocna padnialisia»
Vodhuk prylacieŭ ad kampanii, jakaja zajmajecca aptovymi prodažami tavaraŭ aŭtamabilnaj tematyki. Impartujuć ich z Rasii i pastaŭlajuć u nievialikija roźničnyja biełaruskija kramy.
«Z 20 pastaŭščykoŭ umoŭna tolki dva mohuć adhruzić tavary, ale ceny nazyvajuć tyja, jakija dziejničajuć tolki siońnia. Astatnija prypynili adhruzki», — kaža Maryja.
Kampanija taksama zajmajecca hruzapieravozkami pa Biełarusi, maje niekalki aŭto.
«Nichto nie viedaje, jak pracavać. Pa pieravozkach asnoŭny sajt dla pošuku hruzaŭ i mašyn — ukrainski, jon ciapier zabłakavany. Pracujem pa našaj bazie. Staŭki pa pieravozkach mocna padnialisia. Kali tydzień tamu pa maršrucie Minsk-Mahiloŭ 1,8 tony my vieźli ŭmoŭna za 150 rubloŭ, to ciapier taki ž hruz viaziom za 250. I nichto nie handlujecca pa staŭkaŭch», — dzielicca žančyna.
Ich hruzavyja mašyny stajać na ŭliku ŭ vajenkamacie. U vypadku vajny ich mohuć zabrać.
Kamientary