Desantniki, jakija sarvali vysadku rasijan u Hastomieli i ŭratavali Kijeŭ, raskazali pra toj boj
Płan Pucina pa imhniennym zachopie Kijeva praduhledžvaŭ vysadku desantu na aeradromie z samalotaŭ Ił-76. Śmiełaść troch małych hrup ukrainskich desantnikaŭ źmiašała karty.
Rasijskija čynoŭniki i prapahandysty šmat hadoŭ chvalilisia, što Maskva moža zachapić Ukrainu za niekalki dzion. Im u hetym padpiavaŭ Alaksandr Łukašenka. Ale supraciŭleńnie ŭkrainskaj armii, takich sałdat, jak Charčanka, i dobraachvotnikaŭ zapavoliła prasoŭvańnie rasijskich vojskaŭ, a ŭ rajonie aeraporta Hastomiel akupantaŭ i ŭvohule atrymałasia spynić. Supraćstajańnie ŭ aeraporcie stała pačatkam mocnaha ŭkrainskaha supraciŭleńnia i adnoj z hałoŭnych pryčyn, čamu rasijskija vojski dahetul nie vykanali svaje mety va Ukrainie, piša Wall Street Journal.
Vajna pryjšła ŭ Hastomiel u 7 ranicy 24 lutaha, kali kryłataja rakieta ŭzarvałasia za niekalkich mietrach ad žyłoha doma i vybiła ŭ im vokny. Miascovy aeraport maje doŭhuju ŭźlotna-pasadačnuju pałasu, što robić jaho pryvabnaj cellu dla desantnikaŭ.
Padraździaleńnie ŭkrainskaj Nachvardyi, jakoje abaraniała aeraport, prysutničała ŭ Hastomieli nie ŭ poŭnym składzie — bolšaja častka ciažkaj techniki i asabovaha składa znachodziłasia na froncie ŭ Danbasie. Tym nie mienš, u aeraporcie znachodziłasia elitnaja bryhada chutkaha reahavańnia, jakaja taksama mieła vopyt bajavych dziejańniaŭ na Danbasie.
Praź niekalki hadzin paśla rakietnaha ŭdaru lejtenant Nachvardyi Andrej Kuliš zavarvaŭ čaj dla dvuch tavaryšaŭ, jon pačuŭ šum viertalotaŭ. Try dziasiatki ich lacieli nizka, nad samaj ziamloju, kab zastacca niezaŭvažanymi dla ŭkrainskich radaraŭ. Ruskija abrynuli škvał rakiet i kulamiotnaha ahniu na aeraport i vajskovuju bazu kala jaho, zmusiŭšy ŭkrainskich abaroncaŭ jaje pachavacca ŭ schoviščach.
Na baku rasiejcaŭ była tatalnaja pieravaha ŭ kolkaści i ŭzbrajeńni. Jak kaža Kuliš, «my byli jak z nažom suprać pistaleta».
Padčas bajoŭ na Danbasie jaho padraździaleńnie nie procistajała avijacyi, bo tam rasijskija siła nie vykarystoŭvali jaje. Ale abaroncy Hastomiela chutka zrazumieli, jakoj pavinna być ich taktyka.
Jany raśsiejalisia pa ŭsioj bazie i aeraporcie i pačali ahoń adstrelvacca z usiaho, što ŭ ich było: aŭtamatyčnych vintovak, zienitnaj zbroi i niekalkich PZRK. Rasijskija vajskoŭcy paźniej śćviardžali, što desant vysadziŭsia z 200 viertalotaŭ, ale ŭkrainskija čynoŭniki i sałdaty kažuć tolki pra 30 viertalotaŭ. Jany latali hrupami pa dva-try kruhami, nanosiačy ŭdary pa aeraporcie i bazie.
U vyniku pieršaha ž abstrełu byŭ mocna paškodžany samalot An-225 «Mryja» — najvialikšy transpartny samalot u śviecie. Jak kaža Kuliš, jon bačyŭ słup dymu, što padymaŭsia z anhara, dzie «Mryja» stajała na ramoncie. Abaroncy kažuć, što jany zdoleli rakietami źbić try viertaloty ruskich.
Paśla amal troch hadzin boja rasijskija viertaloty pačali pryziamlacca. Adtul vysadžvalisia desantniki, zajmali pazicyi viejeram i adkryvali ahoń.
Va ŭkrainskich abaroncaŭ chutka skončylisia supraćpavietranyja rakiety, inšaj zbroi taksama nie chapała. Ciapier, kali vorah byŭ nie tolki ŭ pavietry, ale i na ziamli, kamandzir abaroncaŭ addaŭ zahad adstupić. Rasijanie zajavili, što jany źniščyli ŭ Hastomieli 200, jak jany kažuć, «nacyjanalistaŭ», ale, jak kaža lejtenant Kuliš, u jaho padradzialeńni byŭ tolki adzin paranieny.
Pakul ruskija asvojvali aeraport, ukrainskaja raźviedka atrymała infarmacyju pra płany akupantaŭ — vysadzić u Hastomieli desant z 18 transpartnych samalotaŭ Ił-76, jakija ŭžo čakali kamandy ŭ Biełarusi. Ukrainskaje kamandavańnie nakiravała ŭ aeraport desantnaje padraździaleńnie Anatola Charčanki, što znachodziłasia niedzie za 100 kiłamietraŭ. Ich misijaj było padabracca jak maha bližej da ŭźlotna-pasadačnaj pałasy, kab padbić pry pasadcy chacia b pieršy z samalotaŭ.
Vysadka ŭ Hastomieli
Desantniki vysadzilisia ź viertalotaŭ na poli na zachad ad aeraporta. Kali jany padbiralisia da pasadačnaj pałasy, u ich nad hałovami zašumieŭ bieśpiłotnik — ich zaŭvažyli. Ukraincy kinulisia napierad, ale ŭtknulisia ŭ 7-mietrovuju bietonnuju ścianu z kalučym drotam naviersie. U desantnikaŭ nie było pry sabie vybuchoŭki, tamu Charčanka razrezaŭ kalučy drot i pačaŭ dapamahać tavaryšam pierałazić cieraź jaje. Piaciora paśpieli, a paśla na ich abrynuŭsia kulamiotny ahoń ruskich.
Try ŭkraincy atrymali ciažkija ranieńni. Charčanka zaprasiŭ dapamohu ad inšaha padradzialeńnia desantnikaŭ, ale jano zabaviłasia ŭ darozie. Tym časam ruskija abrynuli na ŭkraincaŭ ciažki ahoń, adna z hranat uzarvałasia zusim blizka. Charčanka sprabavaŭ supakoić sałdat pa inšy bok ad ściany, bo chvalavaŭsia, što pa ich šumie ruskija zrazumiejuć, dzie ich šukać.
Desantniki prakapali łaz pad ścianoj, a Charčanka źviazaŭsia z artylerysckim padraździaleńniem i zaprasiŭ udar pa vorahu z poŭdnia. Tym časam desantnaje padraździaleńnie, što zatrymlivałasia, atakavała ruskich z poŭnačy, inšyja ŭkrainskija vajskoŭcy ruchalisia z poŭdnia na hramadzianskim transparcie.
Z pola za toj samaj ścianoj ŭkraincy pačali bić supraćpavietranymi rakietami. U takoj situacyi ruskija admovilisia ad płana vysadki ź Iłaŭ-76 — pasadka ŭ Hastomieli, dzie praciahvaŭsia žorstki boj, była b dla ich zanadta ryzykoŭnaj.
Tym časam z poŭnačy da aeraporta padychodziła kałona rasijskaj bronietechniki. Charčanka vyrašyŭ adstupać, dvoje ź jaho bajcoŭ byli ŭžo nieprytomnyja. Desantniki adyšli na poŭdzień — pavolna, bo išli z paranienymi, Charčanka i sam byŭ paranieny ŭ nahu.
Raptam ukraincy pačuli huł rasijskaj bronietechniki, što nakiroŭvałasia ŭ ich bok. Jany zładzili zasadu, źniščyli varožy tank i abstralali inšyja mašyny. Rešta mašyn raźviarnułasia.
Desantniki nie zdoleli adbić Hastomiel, ale rasijskuju pavietrana-desantnuju apieracyju jany sarvali. Dziakujučy hetamu ŭkrainskaje kamandavańnie paśpieła pierakinuć padmacavańni i spynić rasijskuju armiju na linii miž Hastomielem i susiednimi haradami. Upartyja bai praciahvajucca ŭ rajonie Bučy, Makarava, Baradzianki.
Udava aktyvista Maksima Čarniaŭskaha raskazała pra jaho pakuty pierad suicydam5
Kamientary