MAHATE zajaviła ab paharšeńni situacyi na Čarnobylskaj AES. Piersanał tam nie mianiaŭsia dva tydni
Piersanał ČAES nie mianiajecca ŭžo amal dva tydni — z momantu zachopu rasijskim vojskam. MAHATE vykazała zaniepakojenaść stresavaj situacyjaj i zaklikała da pieramovaŭ ab harantyjach biaśpieki, paviedamlaje DW.
Pavodle infarmacyi Mižnarodnaha ahienctva pa atamnaj enierhii (MAHATE), z taho času, jak 24 lutaha rasijskija vojski zachapili Čarnobylskuju AES, situacyja na joj paharšajecca. Kiraŭnik ahienctva Rafael Hrosi zajaviŭ u aŭtorak, 8 sakavika, što, pa danych ukrainskaha boku, kala 210 technikaŭ i miascovych supracoŭnikaŭ słužby biaśpieki dziažuryli na atamnaj elektrastancyi bieśpierapynna na praciahu amal dvuch tydniaŭ, pakolki pad rasijskim kantrolem nie adbyvałasia źmiena piersanału.
Pa paviedamleńni ŭkrainskaha rehulatara, jany atrymlivajuć vadu, ježu i miedykamienty ŭ abmiežavanym abjomie, i ich stanovišča paharšajecca.
Akramia taho, MAHATE bolš nie maje suviazi sa svaim manitorynhavym abstalavańniem, jakoje harantuje, što ŭsie jadziernyja materyjały znachodziacca na svaich miescach.
«Ja hłyboka zaniepakojeny składanaj i stresavaj situacyjaj, u jakoj akazaŭsia piersanał Čarnobylskaj atamnaj elektrastancyi, i patencyjnymi ryzykami dla jadziernaj biaśpieki, jakija heta ciahnie za saboj», — zajaviŭ kiraŭnik MAHATE.
Rafael Hrosi prapanavaŭ pravieści pieramovy ab harantyjach biaśpieki ŭkrainskich jadziernych abjektaŭ z udziełam pradstaŭnikoŭ Rasii i Ukrainy na terytoryi AES ci ŭ inšym miescy.
Na hety momant ad rasijskaha ŭvarvańnia paciarpieła jašče adna AES — Zaparožskaja — i niekatoryja inšyja abjekty z zapasami jadziernych materyjałaŭ. Adnak uciečki radyjeaktyŭnych rečyvaŭ nie adbyłosia.
U 1986 hodzie na Čarnobylskaj AES zdaryłasia razburalnaja jadziernaja avaryja. Radyjeaktyŭnyja adchody zachoŭvajucca tam i siońnia.
-
«Zaličanaja pa niestandartnaj pracedury». Stała viadoma, jak ščodra padmazvaŭ Epštejn univiersitet, u jakim vučyłasia Karyna Šulak
-
Rubia ŭ apošni momant admianiŭ sustreču ź lidarami Jeŭropy ab pytańni Ukrainy
-
Studzień 2026 hoda ŭvajšoŭ u piaciorku samych ciopłych pieršych miesiacaŭ hoda ŭ śviecie. Jak heta ni dziŭna dla biełarusaŭ
«Jana nie vyhladała ščyraj, była ŭ mascy». Paŭlučenka pra sustreču Kaleśnikavaj ź biełaruskimi žurnalistami12
Kamientary