Minharsud pakinuŭ u sile kryminalny prysud it-biznesoŭcu Siarhieju Kaŭryhinu za źbićcio ŭ lifcie ajcišnika Siarhieja Karpava. 11 miesiacaŭ tamu Kaŭryhin padaŭ apielacyjnuju skarhu ŭ haradski sud na vyniesieny raniej prysud.
— Rady, što ŭdałosia davieści spravu da kanca i moj kryŭdziciel paniasie zasłužanaje pakarańnie, — raspavioŭ dev.by Siarhiej Karpaŭ.
18 kastryčnika 2020 hoda Siarhiej Kaŭryhin u lifcie źbiŭ susieda-prahramista Siarhieja Karpava. Historyja adbyłasia ŭ domie, jaki adnosicca da kaapieratyva «EPAM Sistemz-Žyłbud», kala PVT. U lifcie nie źmiaścilisia Karpaŭ, Kaŭryhin, jaho žonka i dzieci — heta i spravakavała ahresiju z boku Kaŭryhina.
26 sakavika 2021 hoda sud Pieršamajskaha rajona Minska pryznaŭ Kaŭryhina vinavatym pa artykule 153 KK («Naŭmysnaje pryčynieńnie lohkich cialesnych paškodžańniaŭ») i pryznačyŭ jamu štraf pamieram 150 bazavych vieličyń (4350 rubloŭ), a taksama abaviazaŭ pakryć paciarpiełamu maralnuju škodu, vydatki na advakata i daktaroŭ (2850 rubloŭ).
Kaŭryhin svaju vinu nie pryznaŭ i padaŭ apielacyju ŭ haradski sud. Sud pryznačyŭ kompleksnuju sudova-miedycynskuju ekśpiertyzu, jakaja pavinna była jašče raz vyvučyć paboi, naniesienyja Siarhieju Karpavu. Praz 11 miesiacaŭ (i 3 sudovyja pasiadžeńni) skarhu Kaŭryhina sud adchiliŭ.
Čym viadomy Kaŭryhin
Siarhiej Kaŭryhin bolš za 10 hadoŭ pracavaŭ u EPAM. Spačatku raspracoŭščykam, potym cimlidam. Syšoŭ u 2017 hodzie. Paśla hetaha da viasny 2020 hoda zajmaŭ pasadu Delivery Director u kanadskaj kampanii biełaruskaha pachodžańnia Axamit. U 2020 hodzie staŭ arhanizataram i aktyŭnym udzielnikaŭ šeściaŭ u padtrymku dziejnaj ułady.
U śniežni 2020 hoda Kaŭryhin zarehistravaŭ IT-kampaniju Innovative Future Technologies. Jana zajmajecca raspracoŭkaj ličbavaj płatformy dla aŭtamatyzacyi biznes-pracesaŭ —naprykład, raspracoŭvaje instrumient dla rasšyfroŭki dakumientaŭ i rukapisnych tekstaŭ.
Paśla pačatku vajny va Ukrainie Kaŭryhin pościŭ na svajoj staroncy ŭ LinkedIn vyjavu litary Z u vyhladzie hieorhijeŭskaj stužački. Znak časta vykarystoŭvajecca tymi, chto padtrymlivaje ŭvarvańnie Rasii va Ukrainu.
Kamientary