Ryta Dakota nabyła dom za niekalki miljonaŭ dalaraŭ kala Halivuda
Biełaruskaja śpiavačka Ryta Dakota razam z mužam Fiodaram Biełahajem płanujuć naradzić dzicia, tamu vyrašyli nabyć ahulnuju nieruchomaść — u ZŠA.
Amal hod artystka raskazvaje padpisčykam u instahramie, što dumaje pra toje, kab naradzić druhoje dzicia. U Ryty ŭžo jość dačka Mija ad pieršaha šlubu z rasijskim śpievakom Uładam Sakałoŭskim.
Raniej śpiavačka kazała, što jany z Fiodaram Biełahajem byli ŭpeŭnieny: im u siamji chopić adnaho dziciaci. Tym bolš, u Mii vielmi dobryja adnosiny z ajčymam. Ale ž u vyniku muž z žonkaj pryjšli da dumki, što ŭsio ž chočuć pavieličeńnia siamji.
Mabyć, momant dla hetaha sapraŭdy davoli zručny — praz zabaronu na vystupy ŭ Biełarusi i Rasii Ryta vymušana pastaviła pracu na paŭzu. Zatoje ciapier jana vučycca muzycy ŭ suśvietna viadomych majstroŭ uzroŭniu Eda Šyrana.
Para razam užo 6 hadoŭ. Ryta raskazała ŭ storys, što i ŭ Fiodara, i ŭ jaje jość svaja nieruchomaść, a voś ahulnaj nie było: «My šmat pracavali hetyja hady nad ahulnym prajektam, zarabili hrošy razam, ale amal nie tracili, žyli davoli ścipła (układvali tolki ŭ tvorčaść, u dadatak i na dapamohu svajakam). Nijakich sumak «Birkin», palotaŭ džetami i hetak dalej. My asensavana źbirali na ahulny dom».
Uźnikła pytańnie, u jakoj krainie nabyć dom. Zrazumieła, što Biełaruś i Rasija na hety momant nie varyjant. Ryta i Fiodar lubiać Bali, ale paličyli, što značna bolš mahčymaściaŭ dla ŭsich jość mienavita ŭ ZŠA. Vaśmihadovaja Mija, naprykład, maryć stać aktrysaj — a heta ŭsio ž praściej zrabić, kali žyvieš u Łos-Andželesie.
U kamientarach Ryta tłumačyła, što ŭ jaje viza talentaŭ, tamu jana moža lehalna žyć i pracavać u Amierycy.
Biudžet siamji na pakupku nieruchomaści składaŭ niekalki miljonaŭ dalaraŭ. Naprykład, adzin z damoŭ, jaki pry prahladzie Ryta paličyła zanadta amierykanskim dla siabie, kaštavaŭ $2,43 miljona. Druhi, jaki śpiavačcy padaŭsia padobnym da ispanskaj tavierny, pradavali za amal za $2,5 miljona.
Muž z žonkaj hladzieli damy i na znakamitych halivudskich pahorkach, ale ž zastalisia rasčaravanyja, bo za vialikija hrošy tam prapanoŭvali davoli staryja damy ź nie najlepšym ramontam.
«Treba bolš zarablać, tady i damy buduć kryšačku tańniejšyja», — reziumavaŭ Fiodar.
U vyniku siamja abrała dla žyćcia dom u horadzie Vest Halivud — heta horad, jaki miažuje z suśvietna viadomym rajonam Łos-Andželesa Halivudam. Ale ž Vest Halivud ličycca navat bolš biaśpiečnym i elitnym miescam praz toje, što tam značna mienš turystaŭ dy biazdomnych.
Dakota ŭžo apublikavała i rum-tur. Śpiavačcy spadabałasia vialikaja zona haścioŭni, vysokija stoli, majstar-spalnia z harderobam i vychadam u sad, dzie raście navat limonnaje dreva. Ryta žartuje, što mienavita jano i stała hałoŭnym arhumientam za toje, kab nabyć hety dom. Śpiavačka pahadziłasia zapluščyć vočy na nievialiki zadni dvor.
Artystka nazvała asabniak domam mary i pryznałasia: niahledziačy na toje, što ŭ ZŠA zvyčajna nieruchomaść pradajuć pustoj, jany vyrašyli nabyć dom z usioj meblaj i navat posudam.
Ryta dadała, što ŭ adnym ryłsie nie atrymałasia pakazać jašče spalniu budučaha dziciaci, haściavy dom i jaje studyju, dy šmat čaho inšaha.
«Naša Niva» — bastyjon biełaruščyny
PADTRYMAĆŽonka Hałyhina adśviatkavała pad Minskam dzień naradžeńnia ŭ ruskim styli — u kakošniku i z tortam-matroškaj ŠMAT FOTA21
Žonka Hałyhina adśviatkavała pad Minskam dzień naradžeńnia ŭ ruskim styli — u kakošniku i z tortam-matroškaj ŠMAT FOTA
Ciahnik Pinsk—Minsk spyniŭsia pad Dziaržynskam biez aciapleńnia. Paśla prybyćcia ŭ stalicu pasažyraŭ razabrali ludzi z sacsietak i raźvieźli pa chatach1515
Kamientary