Litoŭskaja raźviedka: Łukašenka choča pryznańnia Zachadu i admieny sankcyj
Biełaruski režym chacieŭ by pryznańnia z boku Zachadu i admieny ci chacia b prypynieńnia ŭviadzieńnia novych sankcyj. Pra heta havorycca ŭ spravazdačy ab dziejnaści Departamienta dziaržaŭnaj biaśpieki Litvy za 2021 hod, piša reform.by. Spravazdača apublikavanaja siońnia, 29 krasavika.
«Doŭhaterminovyja mety Łukašenki — lehitymacyja svajho režymu i narmalizacyja adnosin z Zachadam. U najbližejšaj pierśpiektyvie klučavaja zadača Minska — spynić uviadzieńnie novych sankcyj suprać režymu, a pažadana — admianić užo ŭviedzienyja», — ličać litoŭskija raźviedčyki.
Dla dasiahnieńnia svajoj mety, havorycca ŭ spravazdačy, biełaruski režym vykarystoŭvaje roznyja instrumienty, u tym liku pahroźlivuju rytoryku, dypłamatyčny i ekanamičny cisk, prapahandu i dezinfarmacyju, pravavyja instrumienty i nielehalnuju mihracyju:
- Imknučysia zapałochać litoŭskich palitykaŭ i hramadstva, Łukašenka jak publična, tak i pa nieaficyjnych kanałach pahražaŭ dabrabytu hramadzian Litvy i biaśpiecy litoŭskich tavaraŭ, jakija iduć tranzitam praź Biełaruś. Byli pahrozy pavieličeńnia patoku nielehalnaj mihracyi, a taksama kantrabandy tytuniu i narkotykaŭ u Litvu.
- U adkaz na rašeńnie Litvy dać prytułak lidaru biełaruskaj apazicyi Śviatłanie Cichanoŭskaj Biełaruś vysłała ź Minska amal usich litoŭskich dypłamataŭ.
- Raspaŭsiudžvajučy prapahandu, biełaruski režym imkniecca apraŭdać svaje dziejańni, dyskredytavać i vyklikać niedavier da litoŭskaha ŭrada i biełaruskaj apazicyi. Režym vykarystoŭvaje mihracyjny kryzis dla dyskredytacyi susiednich krain ES za mierkavanyja parušeńni pravoŭ čałavieka.
- Biełaruski režym śćviardžaje, što inicyjavaŭ sudovyja rasśledavańni suprać Litvy. Jon taksama vykarystoŭvaŭ mižnarodnyja instrumienty jurydyčnaha supracoŭnictva dla pieraśledu vyhnanych pradstaŭnikoŭ apazicyi.
- Biełaruskaja dziaržaŭnaja kampanija «Biełnaftachim» prypyniła ekspart naftapraduktaŭ praz Kłajpiedski marski port u 2021 hodzie. Vierahodna, što Łukašenka imknuŭsia pakarać Litvu i takim čynam prademanstravać svaju padtrymku Kramlu, jaki byŭ zacikaŭleny ŭ nakiravańni biełaruskich naftapraduktaŭ u rasijskija party i ŭžo niekatory čas uźnimaŭ hetaje pytańnie na dvuchbakovych sustrečach.
- Łukašenka zaachvočvaŭ nielehalnuju mihracyju praź Biełaruś, publična zajaŭlajučy, što Biełaruś nie spynić mihracyju ŭ JEZ. Da arhanizacyi i sadziejničańnia nielehalnaj mihracyi byli pryciahnutyja biełaruskija ŭstanovy i pryvatnyja turystyčnyja ahienctvy, a taksama kantrabandysty ci navat prostyja biełaruskija hramadzianie, jakija akazvali transpartnyja pasłuhi pa prajeździe da miažy. Dobraja dastupnaść u pavietry zrabiła Biełaruś lohka dastupnaj dla irakcaŭ i hramadzian inšych krain Blizkaha Uschodu. Biełaruskija pamiežniki stali vykanaŭcami rašeńniaŭ režymu: zamiest achovy dziaržmiažy jany sadziejničali niezakonnamu jaje pierasiačeńniu.
Kamientary